Read Gangte JOSHUA 22 Bible Online

JOSHUA 22 - Gangte bible

JOSHUA 22

¹Khutichun, Joshua’n Reuben te, Gad te leh Manasseh nam kimkhatte chuh a sama,

²a kawm u ah, “LALPA suok Mosi’n thu a hun piek taphawt na pawm zel u a, ka thu hun piek taphawt le na pawm zel sek u a;

³Zie chanpi hih tuni tieng hin na suohpih teu chuh na thahtham puou a, LALPA na Pathien un hih dinga thu a hun piek uh na zawp sek ziekun,

⁴LALPA na Pathien un a kawmuh a a na gen tâk bang khan, na suohpih teu hi chawlhdamna a na pie ta a; zieziekchun, LALPA suok Mosi’n Jordan gal suohlam a na chanvo ding u a gam a hun piek nau, na In lam hawu achun chieh kit tau in.

⁵LALPA suok Mosi’n LALPA na Pathien u chuh hehpih a, a lampi chengcheng chuh hawh a, a thupiek haw chuh pawm a, amah chuh tuchak kêi a, na lunggil chengcheng u leh na thagau chengcheng u a a na sem ding a thu a hun piek u khah, zie thupiek leh dân haw chuh chingthei takin vawp phat guo zing un,” a ti a.

⁶Khutichun Joshua’n amau haw chuh a vangsak a, a chieh sak ta a, tichun a In lam hawu ah a chieh tau a.

⁷Chun, Manasseh nam kimkhatte khah Mosi’n Bashan gam ah chanvo a pie a; a kimkhat dangte vang chuh Joshua’n tumlam pang Jordan gal ah a suohpih teu lak ah chanvo a pie zaw a. Chun, Joshua’n a in lam uh a a chiehsak ding lai khan a vangsak a,

⁸A kawm u ah, “Na In lam hawu achun hausa takin chieh kit tau unla, gancha tamtak tawh, dangka haw tawh, sana haw tawh, sumeng haw tawh, thik haw tawh, silhlechen tamtak tawh; na melmateu lak ah na thil lâk hawu tawh kihawm guol un,” ti’n a gen a.

⁹Chun, Reuben suonte leh Gad suonte leh Manasseh nam kimkhatte chuh a vaikit u a, Kanaan gama Shiloh apat chun Israel chate kawm apat in LALPA’n Mosi manga thu a na piek tâk bang khan a chanvo ding uh a a na guotsa Gilead gam lama chieh dingin a kipandawk tau hi.

¹⁰Chun, Kanaan gamsung a Jordan lui gamgi Geliloth a va tun u chun Reuben suonte, Gad suonte leh Manasseh nam kimkhatte chun Jordan lui pang achun maichâm lientak kidawh tak a siem tau a,

¹¹Chun, Israel chate chun, “Ngaitiem u, Reuben suonte leh Gad suonte leh Manasseh nam kimkhatte khan Kanaan gam chin tak Jordan gamgi ah Israel chate’n a kânna mun tak u ah maichâm a siem ui,” tih mi gen a zau a.

¹²Zie chuh Israel chate haw chun a na zak un, Israel suon mipi chengcheng chuh amau haw va do dingin Shiloh khuo ah a kikhawm tau hi.

¹³Chun, Israel chate chun Gilead Gama Reuben suonte leh Gad suonte leh Manasseh nam kimkhatte kawm achun thiempu Eleazar chapa Phinehas a sawl u a;

¹⁴Amah tawh milien sawm, Israel te phung laka inkuon lawiupa pên khat chiet tawh, ziehaw chuh Israel chate asâng-asâng laka phung upa pên chiet ahiu hi.

¹⁵Chun, Reuben suonte, Gad suonte leh Manasseh nam kimkhatte kawmah Gilead gam achun a chieh tau a, a kawm u ah,

¹⁶“LALPA mipi haw chengcheng in, Israel te Pathien chunga na hihkhelh uh hi bang ahi, tuni hin LALPA chunga kiphin guo a maichâm siem in LALPA chuh na kiheisan uh ahim?

¹⁷LALPA mipi haw laka gawtna a tun ziek khan, tuni chan hinle thieng nailo I hiu a, Peor muna gitlohna khah ei uh a dinga neu taluo a na ngaih uh ahim?

¹⁸Ahih leh, tuni a hih LALPA chuh kiheisan na guot taktak uh ahim? LALPA chunga na kiphin tâk ziek u hin, Amah chuh zing leh chuh Israel mipi haw chengcheng chungah lungna tei in a.

¹⁹Na gam luoh uh hi a buok ahih chun, LALPA gamsung, LALPA hobuk umna mun ah hung mai unla, kei uh haw lak ah hung chêng mai un; amahvang chuh LALPA I Pathien uh maichâm tihloh maichâm dang siem in LALPA chungah kiphin kiu unla, kei uh haw chung ahin le kiphin diek kiu in.

²⁰Zerah chapa Akan khan thil zek a khan thil a hihkhiel a Israel mipite chung akhan lungnatna a kie hilo ahim? Akan kha amah hihkhelhna ah amah mai in a mangthai chuom puoh kha, a tiu a puo,” ti’n a gen u a.

²¹Khutichun, Reuben suonte, Gad suonte leh Manasseh nam kimkhatte chun Israel phung lawiupate chuh a dâwng u a, a kawm u ah,

²²“LALPA, pathiente Pathien! LALPA, pathiente Pathien chun a he a, Israel ten le heu hen; ka maichâm siem uh hi LALPA kiheisan guo a kiphin guotna ahim, thilhihkhelh guotna ahim a siem ka hih u chun, tuni hinle ei hâwi dah mai un.

²³Hâlmang thil piekna’n ahim, nek ding thillatna ahim, chamna thillatna ahim dinga siem ka hih u chun, amah LALPA ngêi in hun ngaihtuoh mai hen.

²⁴Tunung leh na suonteu in ka suonteu kawm ahin, ‘Nangun, LALPA, Israel te Pathien hi banga na mat phaknau a um a ahim?

²⁵Nanguh haw Reuben suonte leh Gad suonte haw, LALPA’n nanguh leh kei uh dingin Jordan hi gamgi dinga a siem ahi; LALPA ahin chanvo na nei ding um,’ hun ti kha’n au ti a, chittheihna ziekin, umzie nei taka ka hih uh ahi, na suonteu in ka suonteu chuh LALPA lauhna châng helo in hun siem thei ding ahiu a.

²⁶Zieziekchun, hung tiem u, maichâm siem hitiu, hâlmang thillat leh kithawihna dingin vang hilo in:

²⁷Kei uh haw leh nanguh haw leh, I nung u a I suonte hawu kikal a hetpih dingin, tichun I hâlmang thillat teu leh I kithawihnateu leh, I chamna thillat teu hin LALPA na I sep theihna dingun leh a suonteu inle tunung leh ka suonteu kawm achun, LALPA ah chanvo na nei puou hi, a hun tihloh na dingun,

²⁸Zieziekchun, hiti hih hi’n tin, tunung leh I kawm u ah ahim, I suonteu kawmah ahim, khutibanga a hun tih hun u a ei uh haw’n, ‘En tau u, ei suonteu in LALPA maichâm tawbang a siem u hih, hâlmang thillatna ding leh kithawihna ding hilo in; kei uh haw leh nanguh haw kikala hetpihtu dingin a hih uh ahi zawi,’ a hun tih dinguh a ka siem uh ahi.

²⁹LALPA chung achun kiphin in tuni hin LALPA kiheisan a LALPA I Pathien uh maichâm, hobuk kawma maichâm tihloh hi hâlmang thillat na’n ahim, nek ding thillat na’n ahim, kithawih na ding ahim a maichâm siem ka hih loh zieu mai chuh,” a tiu a.

³⁰Chun, thiempu Phinehas leh a kawma mipi luchang, Israel te phung lawiupate chun Reuben suonte leh Gad suonte leh Manasseh suonte thu gen a het u chun a kipâk tau a.

³¹Chun, thiempu Eleazar chapa Phinehas chun Reuben suonte, Gad suonte leh Manasseh suonte kawm achun, “LALPA chunga thil na hihkhelh loh ziekun, tuhin vang LALPA chuh I laku ah a um ngêi nai tih I he tau hi; tichun Israel chate hi LALPA khut apat na hukdawk uh ahi ta hi,” a ti a.

³²Khutichun, thiempu Eleazar chapa Phinehas leh mapuite chuh Reuben suonte leh Gad suonte kawm apat Gilead gam apat chun Kanaan gam lam a Israel chate kawm lam ah chun a chieh kit tau a, thu chuh ava tun kit uh a.

³³Zie thu chun Israel chate chuh a sukipak ta a; chun, Israel chate chun Pathien chuh a pakcha tau a; tichun Reuben suonte leh Gad suonte chuh vak do a, a umnau gam vak hihsiet ding thu chuh a gen kit ta puou hi.

³⁴Chun, Reuben suonte leh Gad suonte chun zie maichâm chuh Ed a min vawh u a; “LALPA chuh Pathien a na hi ngêi na hi tih I kal u ahin hetpihtu ahi hi,” a tiu hi.