Read Gangte JOSHUA 23 Bible Online

JOSHUA 23 - Gangte bible

JOSHUA 23

¹Chun, hiti hi ahi a, kum bang zah ahim a hunghih nung in LALPA’n Israel te chuh a kimvel a melma chengcheng lak apat chawlhna a piek nung chun Joshua chule a hung upa’n a hung têk ten ta a.

²Tichun, Joshua’n Israel te chengcheng, a upateu leh a lawiupateu, a vaihawmteu leh a luchang teu chuh a sama, a kawm u ah, “Kei chuh ka upa a, ka têk ten ta a.

³LALPA na Pathien un nangmau haw zieka zie nam haw chengcheng chunga a hih dân hi na muu a; LALPA na Pathien un, amah mawng in ahi, a hun do sak chuh.

⁴Ngaitiem u, zie nam um nalaite hih, zie nam ka hihmang tâk haw chengcheng gam haw hi tawh, Jordan apat a ni tumna lam tuisuohgiet lien tieng hielin na chiteu gochan dingin ka hun hawp sak na hiu hi.

⁵Chun, LALPA na Pathien un na masang u ahin nawhdawk intin, na muh phâk loh un nawhdawk suok kêi intin; tichun LALPA na Pathien un na kawm u a a gen tâk bang khan a gam u chuh nei ding na hiu hi.

⁶Zieziekchun, Mosi Dan lehkhabu a zik chengcheng haw hih changlam ahim, veilam ahim a na petsan loh na dingun chingthei tak leh hangsan takin pawm unla, hih un;

⁷Zie nam na lak uh a um nalai haw hi tawh kivawp lo a, a Pathien hawu min le lam lo a, a min lo a kipautiem lo a, a nau le sem lo a, khûn a chibai le bûk lo a tuni tienga na hih zing bang u hin,

⁸LALPA na Pathien u chuh tudet zing zawu in,

⁹LALPA’n na masang u ah nam lopi tak leh hattak te chuh a nawhdawk suok kêi ta a; nanguh haw masang ahin tuni tiengin kuomah pang thei mawngmawng a um puou hi.

¹⁰Na lak uh a mi khat in mi sangkhat delh intin; na kawma a gensa bang khan, LALPA na Pathien un ahi, nanguh a dinga a hun do sak sek chuh.

¹¹Zieziekchun LALPA na Pathien u chuh hehpih dingin chingthei takin um un.

¹²Khutilochun na petsan khâk u a, ziehaw nam, a um nalai haw na lak uh a a na chêng zing te hi na zuih u a, amau haw tawh zi leh pasal a na kichên u chun,

¹³LALPA na Pathien un ziehaw namte hi na mitmuh u chun hun nawhdawk sak ta hiel puo’n tin, LALPA na Pathien un gam phatak a hun piek uh apat hin, na manthai suok kêi macheng uh amau haw chuh nanguh haw dingin thâng leh piel leh, na nungzang uh a dinga zêpna mawlh leh, na mit uh a dingin ling hung hi zaw ding ahi tih chientakin heu in.

¹⁴“Chun, ngaitiem u, tuhin leichung chengcheng dân bang in chieh ding ka hi tai; LALPA na Pathien un na chungchâng uh a pha lama a na gen tâksa chengcheng khah a thâwn khatchale a um puoi tih na lunggil chengcheng u leh na lungthim chengcheng un na heu a; na chung u ah a hungtung suok ta a, khatchale a thâwn a um puoi.

¹⁵Chun, hiti hi hung hi’n tin, LALPA na Pathien un thilpha na kawm u a a gen chengcheng khah na chunguh a a hung tun suok mah bangin, LALPA na Pathien un zie gam phatak a hun piek uh apat a hih a hun sukmangthai macheng, LALPA’n thil phalote na chungu ah hun tun sak in a.

¹⁶Chun,LALPA na Pathien uh thugawlh, zawp dinga a hun piek uh hi na bawhsiet uh a, Pathien dangte na nasep u a, khûn a chibai na bûk u chun, LALPA lungnatna chuh na chung u ah um intin, gam phatak a hun piek uh apat hin mangthai pai zieng ding na hiu hi,” a ti a.