Read Gangte JOSHUA 24 Bible Online

JOSHUA 24 - Gangte bible

JOSHUA 24

¹Chun, Joshua’n Israel nam chengcheng chuh Shekem ah a sam khawm a, Israel upahaw, a puitu teu, a vaihawm hawu, a lawiupa lien hawu a sama; chun Pathien masang ah a hung khawm tau a.

²Chun, Joshua chun mipite kawm achun “LALPA, Israel Pathien in hiti hin a tii: ‘Na pulepateu khah malai in Lui gal lam akhan a um u a, Abraham pa Terah ngêi kha le; amau chun pathien dangte na a sem u a.

³Chun, na puu Abraham kha Lui gal apat in ka puidawk a, Kanaan gamsung chengcheng ah ka pui a, a suonte ka supung a, amah chuh Isak ka pie a.

⁴Isak chuh Jakob leh Esau ka pie a; chun, Esau chuh a chanvo dingin Seir tânggam ka pie a; himahleh, Jakob leh a chate chuh Aigupta ah a va chieh suk u a.

⁵Chun, Mosi leh Aron ka sawl a, Aigupta gam chuh a lak u a thilmak hihin ka gawt a; zie zawh chun ka hun puidawk ta a.

⁶Chun, na pulepateu chuh Aigupta gam apat in ka puidawk a, chun, tuipi na va tung u a; tichun Aigupta mite chun na pulepateu chuh kangtalai haw leh sakawl chung chuong mite tawh Tuipi San tiengin a delh u a.

⁷Chun, amau chun LALPA a vak sam u a, Aigupta mite tawh a kikal u chuh a hun hih thim mup ta a, tuipi achup tum sak a; tichun Aigupta gam a ka thilhih kha na mit ngêi in na muu a; zie nung chun, gamthip a khan sawttak na um u a.

⁸“ ‘Chun, Jordan Lui gal suohlam pang a um Amor te gam achun ka hun pui a; chun, a hun na do u a, tichun, amau chuh na khut u ah ka pie a, a gam u chuh na luoh tau a, amau chuh ka hun sukmang sak tai.

⁹Chun, Moab leng Zippor chapa Balak khah a hung kipan a; Israel te a hun do a; chun, Beor chapa Balaam khah hansie hun buokkhum sak dingin a sap sak a;

¹⁰Himahlele Balaam thu khah ka na ngaihthak sak puoh a; zieziekchun nanguh a hun vangsak zaw ta a; khutichun a khut apat chun ka hun hukdawk tai.

¹¹Chun, Jordan lui na galkai u a, Jerikoh khuo na va tung u a; Jerikoh khuo a mite chun a hun na do u a. Amor te, Periz te, Kanaan te, Hit te, Girgash te, Hiv te, Jebus te kha tawh, tichun amau haw chuh na khut u ah ka pie ta a.

¹²Na masang u ah khuoingal ka sawl a, zie chun na masang u ah amau haw chuh a delh dawka, Amor te leng nih ngêi khah; na chemzâm uh ahim, na thalpiu ahim ziek le ahi diek puoi.

¹³Chun, na sepdawk uh hilo hiel gam leh nanguh siem hilo hiel khawpi te ka hun pie a, ziehaw achun na um u a; na phuh uh hilo grep leh olive huon a gah chuh na neu a,’ ti’n.

¹⁴“Zieziekchun, LALPA chuh kihchau unla, tihtakzet leh diktak in a na chuh sem unla, na pulepateu in luigal lehlam a Aigupta gama a na a sep sek uh pathien haw khah paih vek unla; LALPA na sem un.

¹⁵Chun, LALPA nasep hi phalo guola na ngaih u chun, tuni hin kuo na ahi nasep ding uh tel un; na pulepateu in lui gala a na a sep uh pathien haw khah ahim, na chênnau gam Amor te pathien haw khah ahim ana nasep dinguh? Himahleh, kei leh ka inkawte hin chuh LALPA na ahi ka sep dinguh,” a ti a.

¹⁶Chun, mipite chun a dâwng u a, “pathien dangte nasem dingin LALPA Pathien chuh nusieh hiel puo’ng kau,

¹⁷Amah LALPA ka Pathien uh ngêi in a puo, kei uh leh ka pulepateu tawh Aigupta gama suok apat a ei puidawk a, ka mitmuh u a melchikna nasatak tak haw hih a, ka chieh na cheng u leh, ka hawhpai nau ale mipi chengcheng ei vengbit zel pa chuh;

¹⁸Tichun LALPA’n ka masang ngêi uh ahin namtin, zie gam a um Amor te ngêi chuh a nawhdawk suok kêi a; zieziekchun ahi kei uh haw’n le LALPA na hi ka sep dinguh; amah chuh ka Pathien uh ahi ngâl a,” a tiu a, a dâwng u a.

¹⁹Chun, Joshua’n mipite kawm achun, “LALPA na chuh sem thei puo’n lau; amah chuh Pathien thiengtho ahi ngâl a; Pathien thikthusie ahi a; na bawhsietna hawu leh na gitlohna hawu chuh hun ngaidam puo’n a.

²⁰LALPA chuh na nutsieh u a, nam dang pathiente na nasep u leh vang, na chung u ah na pha sem mahleh thil phalo hun tunsak in tin, hun hih mangthai ding ahi,” a ti a.

²¹Chun, mipite chun Joshua kawmah, “Hilo e! LALPA na sem ding ka hiu hi,” a tiu a.

²²Chun, Joshua’n mipite kawmah, “A na sep guo’n LALPA chuh na tel tau hi tih thu hetpihte chuh nangmau haw ngêi hi na hiu hi,” a ti a. Amau chun, “A hetpihte ka hi tau hi,” a tiu a.

²³Chun, Joshua chun, “Khuti ahih chun na lak uh a nam dang pathien umte chuh kawihmang kêi unla, LALPA Israel Pathien lam achun na lunggil uh hei un,” a ti a.

²⁴Chun, mipite chun Joshua kawmah, “LALPA ka Pathien uh na chuh sem ung ka tingun, a thu awi zel ung kau,” a tiu a.

²⁵Khutichun, Joshua’n zie ni chun mipite kawmah thu a gawlh a, Shekem achun dân leh vaihawmna a guot sak a.

²⁶Khutichun, Joshua’n zie thu haw chuh Pathien dân bu ah a zik a; chun, suong lien tak a la a, LALPA mun thiengtho kawm a gangpi thing nuoi ah a phut ta a.

²⁷Chun, Joshua’n mipite kawm achun, “Entiem u, zie suong hi I thuu ei hetpih hi hen; LALPA’n I kawmuh a thu a gen chengcheng chuh a za suok kêi ahi. Zieziekchun na thu hetpih uh hi ding ahi a, khutilochun na Pathien u hi kihet mawhsak kha’n lau,” a ti a.

²⁸Khutichun Joshua’n mipite chuh amau chanvo dinga a piekna gam chiet ah a chieh sak ta a.

²⁹Chun, hiti hi ahi a, zie thil haw nung chun Nun chapa Joshua, LALPA suok chuh, kum za leh kum sawm khat ahih in a thi ta a.

³⁰Chun, Gash mâllam pang, Ephraim tâng gama amah chanvo gamsung Timnath-Serah achun a vui tau hi.

³¹Chun, Joshua damsung leh upate Joshua sanga damsawt te, LALPA’n Israel te a dinga thil a hih chengcheng hete damsung chun Israel te chun LALPA na a sem zel u a.

³²Chun, Israel chate’n Aigupta gam apat Joseph guh a hun puok toh u khah Sekem khuo a mun, Sekem pa Hamor chate apat a Jakob in dangka zakhat a a châwk a khan a vui u a. Tichun zie chuh Joseph suonte gochan a hung hi tai.

³³Chun, Aron chapa Eleazar chuh a thi a; Ephraim tâng gam a chanvo a a piek uh, a chapa Phinehas khawpi Gibeah achun a vui tau hi.