Read Gangte JOSHUA 3 Bible Online

JOSHUA 3 - Gangte bible

JOSHUA 3

¹Chun, a zingkal kit chun Joshua leh Israel chate chengcheng chuh vaima takin a tho u a, Shittim mun apan chun a kichawn u a, Jordan lui a tung u a: a galkaih mau in zie tak achun a giek u a.

²Chun, hiti hi ahi a, ni thum nung in lawiupate chun giehmun chuh a va enviel u a,

³“LALPA na Pathien uh thugawlh bawm, thiempu Levi chite’n a zawn na muh tieng u leh na umnau mun apat hin kichawn unla, zui un.

⁴Amahvang chuh nangmau tawh a kikal chuh teh a tawng sangnih vel hi ding ahi: naih kiu in, tichun na chiehna ding uh lampi chuh hun kâwkmuh ding ahiu ui; Tuma’n zie lampi hi na hawh kha ngei puoh ngâl uh a,” ti’n mipite chuh thu a pie a.

⁵Tichun Joshua’n mipite kawmah, “Kihihthiengtho un: zing leh LALPA’n na lak u ah thilmak takte hih ding ahi,” a ti a.

⁶Chun, Joshua’n thiempute kawm achun, “Thugawlh bawm hi zawn unla, mipite ma pui un,” ti’n a gen a. Khutichun thugawlh bawm chuh a zawn u a, mipite ma chuh a pui tau a.

⁷Chun, LALPA’n Joshua kawmah, “Mosi kawma ka um bang khan na kawm ale um ding ka hi tih a het theihna dingun, tuni hin Israel te chengcheng mitmuh ah hun limbawl ding ka hi.

⁸Chun, Thugawlh bawm zawn thiempute chuh, Jordan lui pang na tun tieng u leh, Jordan lui achun ding zing un, ti’n thu pie’n,” a ti a.

⁹Chun, Joshua’n Israel chate kawm achun, “Hung unla, LALPA na Pathien uh thu hi hung ngaitha tiem u.

¹⁰Pathien hing chuh na lak u ah a um hi tih na hetna dingun, na masang u ahin Kanaan mite, Hit mite, Girgash mite, Amor mite, leh Jebus mite hi nawhdawk teitei ding ahi tih he’n lau.

¹¹Entiem u, leichung pumpi LALPA thugawlh bawm chun na masang u ah Jordan lui kân ding ahi.

¹²Khutichun Israel namte lak ah sawmlenih, phung tin thasang in mi khat zel teldawk un.

¹³Chun, hiti hi hi’n tin, leichung pumpi LALPA bawm zawn thiempute kêngpêk chun Jordan tui a sukkhak tieng leh saklam apat a tui hung luong haw chuh châwl intin; tichun mun khat ah hung kiting khawm viehvuoh zieng in a,” a ti a.

¹⁴Chun, mipite chun Jordan lui kân dinga a giehbuk u apat a pawt u chun, thugawlh bawm zawn thiempute chuh mipite masang achun a chieh u a;

¹⁵Thugawlh bawm zawnte chuh Jordan lui a va tung u a, bawm zawn thiempute keng chun Jordan lui a vak tawh phet chun, (buh lak hun lai leh Jordan lui chuh a kuong chengcheng ah a let zing sek a,)

¹⁶saklam apat a tui hung luong suk lai chuh a châwl ta a, gamla taka Zarethan panga Adam khawpi achun a kiting khawm viehvuoh zieng a; chun, Arabah Tuipi, Tuipi Al lama luong suk lai chuh a châwl ta a.

¹⁷Chun, Israel te chengcheng chun lei hul chung a hawh u a, mipite chengcheng chuh Jordan lui a kaih suok macheng u chun, LALPA thugawlh bawm zawn thiempute chuh Jordan lui lailung tak a chun a ding zing tau a.