Read Gangte JOSHUA 9 Bible Online

JOSHUA 9 - Gangte bible

JOSHUA 9

¹Chun, hiti hi ahi a, Israel chate guolzawhna thu chuh Jordan gala leng haw chengcheng tâng gama te, phai gama te, Tuisuohgiet lien tak dung a chêng a Lebanon tienga um chengcheng te: Hit mite, Amor mite, Kanaan mite, Periz mite, Hiv mite, Jebus mite hawn a hun het u chun,

²amau haw chuh kithutuok taka Joshua leh Israel te chuh do ding chun a kikhawm khawm tau a.

³Himahleh, Gibeon khuo a um Hiv mite chun Joshua’n Jerikoh khuo leh Ai khuo a a thilhih dân a hun het u chun;

⁴A dawha bawl u a, palai bangin a kisiem u a, dip lui taktak sabiltung a puoksak u a, uain thei lui tak, a sie kibelh tawh;

⁵kengtawbek lui taktak kibelh neuno hi a but u a, puonsie tak takin a kivan u a; a nek dinguh a a hun ken uh chângthâk haw chuh nîng hethut leh a apsa ngên ahi a.

⁶Tichun, Joshua kawmah Gilgal a a giehmun uh achun ava chieh u a, amah leh Israel mipite kawm achun “Kei uh hi gamla tak apat a hung ka hiu a: khutichun ka kawm u a hin kichamna thugawlh ei siem sak un,” a tiu a.

⁷Himahleh Israel te chun Hiv mite kawm achun, “Kei uh haw laka chêng a na hi khatto unlau; bangti’n na kawm u ah thugawlh ka siem thei ding um?” a tiu a.

⁸Chun, amau chun Joshua kawmah, “Na suokte ka hiu hi,” a tiu a. Joshua chun a kawm u ah, “Kuote na hiu hi? Khawilam apat a hung na hiu hi?” a ti a.

⁹Chun, amau chun a kawmah, “LALPA na Pathien min ziekin na suok te hi gamla tak apat a hung ka hiu a; na minthan ziete, Aigupta gama na thilbawl chengcheng te,

¹⁰Jordan lui gala Amor lengte nih Heshbon gam lengpa Sihon te, Bashan gam lengpa Ashtaroth khuo a um Og te chunga na thilbawl haw chengcheng kha ka na he ngâl u a.

¹¹Chun, ka upateu leh ka gam uh a chêngte chengcheng in ka kawm u ah, lamkal a dingin nek ding keng unla, amau haw va hopih unla, ‘Kei uh hi na suokte ka hiu hi; ka kawm u a hin kichamna thugawlh ei siem sak un, va tiu in, ei tiu hi,’ a tiu a.

¹²Ziehi ka chângthâk hawu ahi; na kawmuh a hung dinga ka hung pawt niu in ka nek dingun ka In uh apat a a lum a ka hun chawih uh ahi a; himahlele tuhin chuh entiem u, a gaw ta a, a ap zo tai.

¹³Chun, zie uain thei hi ka thun u khan a thak ahi a; entiem u a êksuok ta hi; zie ka puonhawu leh ka kengtawbek hawu hile ka hung nau a gamla bêka a lui zo kêi ta hi,” a tiu a.

¹⁴Khutichun, mite chun a nek ding hun kenteu chuh a la tau a, LALPA kama thuhilhna a ngên puou hi.

¹⁵Tichun Joshua chun amau haw tawh kichamna a bawla, amau haw chuh hing hawih dingin a kawm u ah thugawlh a siem ta a; chun kikhawm khawm lawiupate chu le a kawm u ah a kipautiem tau hi.

¹⁶Chun, hiti hi ahi a, a kawmuh a thugawlh a siem zawh uh a ni thum nung in, a khuo kiengteu, amau haw laka chêng zing ahiu hi tih a hedawk tau a.

¹⁷Chun, Israel chate chuh a chieh zel u a, a ni thum ni chun a khawpiteu chuh a va tung u a; a khawpi hawu chuh: Gibeon, Kephirah, Beeroth leh Kiriath-jearim ahi.

¹⁸Chun, kikhawm khawm miliente chun LALPA, Israel Pathien sama a kawmuh a ana kipautiem tâk ziekun, Israel chate chun a hing hawih tau hi, tichun kikhawm khawm chengcheng haw chuh miliente chung achun a phun tau hi.

¹⁹Himahlele, milien haw chengcheng te chun kikhawmkhawmte kawm achun, “LALPA Israel Pathien sâm in a kawm u ah ka na kipautiem ta ngâl uh a; zieziekchun amau haw chuh I suknat loh dinguh ahi.

²⁰Hiti bang hin a chung u ah bawl leuhing, hing hawih hitiu; khutilochun a kawm u ah I na kipautiem tâk ziekun I chunguh ahin Pathien lungnatna hung tung mai ding ahi,” a tiu a.

²¹Chun, miliente’n a kawm u ah, “Hing hawih in um u hen,” a tiu a. Khutichun, lawiupa te’n a na tiem bang u chun, kikhawm khawm haw a dingin thing chawm leh tuikhai in a pang tau hi.

²²Tichun, Joshua’n amau haw chuh a sap sak a a kawm u ah, “Bangati a nei thep mai uh ahim? Gamla taka pat a hung ka hiu hi na tiu a, chulah ka laku a chêng zing na hi ngâl u a;

²³Zieziekchun hansiedawl na hung hi tau hi, bangtik lai inle na lak uh a mi khenkhat hi suok hi zing untin, ka Pathien In a dingin tuikhai in um zing unlau,” ti’n a gen a.

²⁴Chun amau chun Joshua chuh a dâwng u a, “LALPA na Pathien in a suok Mosi kha gam pumpi hi nanguh hun pie’n tin, a gam luoh mite chengcheng hi na masang uh apat hih mangthai zel ding ahi tih thu a na piek khah na suokte hi a na hilhchien bêka; zieziekchun nangmau haw ziekin ka hinnau hi chân ka lau bêk uh a, hitibang hin ka na hih mai uh ahi.

²⁵Tuhin ngaitie, na khut a um ka hiu a; na gel dân a pha leh dik a na het bang bang chun ka chunguh ahin hih zel mai in,” a tiu a.

²⁶Khutichun a chungu ah hiti hin a hih ta a, Israel chate lak apan chun a hukdawk a, amau haw chuh a that ta puou a.

²⁷Chun, Joshua’n, zie ni chun Israel mite ding leh Maichâm a ding a thing tan leh tuikhai ding chun a suok in a siem ta a, tuni tieng hin LALPA’n amah Hona ding muna a guot na mun achun a sem zing tau hi.