Read Gangte 2 THESSALONIKA 1 Bible Online

2 THESSALONIKA 1 - Gangte bible

2 THESSALONIKA 1

¹Paul leh Silvanas tawh Timothe apat chun Pathien I Pau leh LALPA Isu Krista a um, Thessalonika khuo a Sapchuom haw lawi kawmah;

²Pa Pathien leh LALPA Isu Krista kawm apat, lungsietna leh chamna na kawm u ah um hen.

³Suohpihte haw, nangmau haw chungchâng thu ahin, Pathien kawmah kipahthu gen zing ding him ka hiu hi. Zie chuh kei uh dingin hih ding kilawm mawng a hi a; na taksannau chuh nasa taka a hung khanlet tâk ziekin leh mi dangte chunga nangmau haw chietin hehpihna na neih uh chuh a hung pun zawksem tâk ziekin.

⁴Zieziekchun ahi, kei hawn le, Pathien sapchuomte kawma nang haw ka hun kisuonpih sek uh chuh. Sukgimtheih a na umnau leh, na thuokgimna chengcheng uh ale, taksanna det leh, thuokhat taka na um tum tak kei ziek u chun, ka hun suon uh na hiu hi.

⁵Ziehaw chuh, Pathien gama um hawia guot na hiu ui tih. Pathien vaihawmna dik kiphawtchienna ahi a, zie gam zieka chuh thuok na hi him ui.

⁶Pathien in thil dik chuh hih in; nang haw hun thuok sakte chung achun gimtheihna hun tun intin;

⁷tichun, nangmau haw chunga leh, keihaw chung ahin chawlhdamna ei pie’n a. Zie chuh, LALPA Isu van a kipat, a vânsâwlchâk hattak tawh,

⁸Pathien nawlh a, LALPA Isu Chanchin Pha zawp nuom lote gawt dinga, mei kuong tawh a hung tieng leh hih ina.

⁹Tichun, LALPA apat leh, a lopina thilhih theihna apat a, khenchuom a um in, kumlekhuo a manthaina gawtna chuh thuok un au.

¹⁰Zie Ni a, a mite chengcheng apat a lopina mu ding leh, a gingchate apat a limbawlna lawh dinga a hung tieng chuleh, ka thu hun hilhteu kha na taksan ziekun, nang haw le tel ding na hiu hi.

¹¹Zieziekchun ahi, nang haw ka hun pauchampih zing sek uh. A hun sapna mu taka na hin theihna dingun, I Pathien uh kawm achun ka ngên sek u a. A thilhih theihna chun, phatna na deih chengcheng u leh, taksanna zieka na nasep cheng chenguh chuh hun sukbukim sak ta he’n.

¹²Khutichun, I Pathien u leh, LALPA Isu Krista lungsietna bang zelin, I Lalpau Isu min chuh nangmau ah limbawl in um thei intin; nang haw le amah ah limbawl in um thei un lau.