Read Gangte 2 THESSALONIKA 2 Bible Online

2 THESSALONIKA 2 - Gangte bible

2 THESSALONIKA 2

¹Himahlele, suohpihte, I Lalpau Isu Krista hungna leh, a kawma I va kikhawp khawmna ding thuu achun, “LALPA ni khuo chuh a tung ahi tai,” tih ngaihtuohna ziekin ahim,

²a hihloh leh, hilhlawkna ahim, ka thugenteu ahim leh, ka lehkhathâk hawu akhan keihaw mawng in le gen khak in a um hi tihna ziek ahim a na lungthim uh a lînglau pai zen lohna ding leh, buoi le a buoi lohna dingin, ka hun nget uh na hiu hi.

³Bang lama le kuomah thep in um kiu in. Puksietna chuh a hungtun masak zet a, Dan bawhsiepa, mangthai chapa chuh a hung kiphuon macheng chun, zie nikhuo chuh tung ding ahi puoh ngâl a.

⁴Amah chun pathien a vawh tâk phawt u leh, sakhuo chengcheng do in, a chung u a um guo’n amah kilimbawl ina. Chun, Pathien Ho-In achun lut in, chu’n tin, Pathien bangin kigen ina.

⁵Na kawmuh a ka um lai khan, zie thu haw chuh ka hun hilh sek na hiu hi tih, na gêldawk sek puou maw?

⁶Tu a zie thil hungtunna ding chuh, bang ahim khatin a dal nalai a, zie chuh bang a hih na heu hi. A hun cha achun Dan bawhsiepa chuh hung kilang ina,

⁷Dan bawhsietna thuguk chun tuhin le a sem zing ngâl a; himahlele, a hungna ding dal pên chuh lâkmang a a um masang cheng chun, a hungtung ding chuh hungtung puo’n a.

⁸Zie kilakmang tieng chu leh, Dan bawhsiepa chuh hung kiphuong intin; himahleh, LALPA Isu’n amah chuh a kama hu’n sulum intin; amah umna vak tak chun sumangthai ina.

⁹Zie Dan bawhsiepa chuh Setan thilhih theihna tawh hung in tin, melchikna leh thilmak lêm tampi hih intin.

¹⁰Mangthai dingte chung achun kithepna tin cheng chuh hun mang ina. Tichun, hukdama umna dinga thudik chuh deihlo leh lungsietna chuh a pawm nawp loh ziekun mangthai un au.

¹¹Khutichun, lepchieh thu chuh a ginchak zawkna dingun, Pathien in gitloh thilhih theihna nasepna chuh, amau haw ah a tun sak ta a.

¹²Thudik gingcha lo a, gitlohna thila kipâk zawte chun, mawh a chan vek theihna dingun.

¹³Suohpih, LALPA deihtakte haw, Thagau Thiengtho thilhih theihna zieka, thudik gingcha a, hukdama um dinga, a masapen a Pathien in a hun tel na hih ziekun, na chungchâng thuu ahin, Pathien kawma kipahthu gen zing ding him ka hiu ui.

¹⁴Zie a ding chun Pathien in, Chanchin Pha ka genteu hin a hun sap na hiu hi; LALPA Isu Krista lopina chang ding leh, kikawppih dingin a hun sap na hiu ui.

¹⁵Zieziekchun, ka suohpihteu haw, ding det un la, ka thugenteu leh, ka lehkhathâk hawu a, thudik ka hun hilhteu chuh tuchak zing un.

¹⁶Tichun, I Lalpau Isu Krista mawng leh, Pathien I Pau, ei hehpihpa leh, a lungsietna vanga, hansanna thâwn lo leh, kinepna det ei piepa chun,

¹⁷hun tîlkhoh in, thilhih leh thugen phat tin cheng ah hun suhat ta hen.