Read Gangte 2 THESSALONIKA 3 Bible Online

2 THESSALONIKA 3 - Gangte bible

2 THESSALONIKA 3

¹A tawpna pen in, suohpihte, LALPA thu hi nangmau haw laka a um bang khan, machawn zawsem leh limbawla a um theihna dingin ei pauchampih zingun.

²Chun, Pathien in, minunsiete leh mi gilote laka ei hukdawkna dingin le ei paucham sak un, mi cheng chengin thu kigenhaw chuh a gingcha suok kêi puoh ngâl u a.

³Himahlele, LALPA chuh a taksanum a, amah chun hun suhat in, Thil gilo laka kipat chun nanguh hun vengbit ina.

⁴Thu ka hun piek tak uh kha na zawp sek u a, na zawp kit zel u le LALPA achun ka hun ginchak uh na hiu hi.

⁵LALPA chun, Pathien hehpihna leh, Krista thuokhatna chuh hethiem zawsem dingin hun pui ta hen.

⁶Chun, suohpihte, ka kawmuh apat thu a muh bang u a um lo a, hindan thadah taka um, suohpih tincheng lak apat kikiengkawih dingin, I Lalpau Isu Krista min in thu ka hun piek na hiu hi.

⁷Nang haw mawng in le, ka hih bang u a hih ding tih, na he mah mah ngâl u a. Na kawmuh a ka umlai u khan, ka thadah ngei puou kha.

⁸Kuomah khut apat, mawk in na chângthâk uh ka ne kha diek puou ui. Khutih malak in, na lak uh a kuomah ka sukgiksak lohna dingun, a sun a zan a gim taka nasem kawmin, ka nek zawk uh ahi kha.

⁹Nei panpihnau ngek thei lo ka hih ziekuh hilo in, nanghaw’n na zuih ding u a, hun tatmuh dingin ka hih zawk uh ahi.

¹⁰Na kawmuh a ka umlai u khan le, zie thu hi ka hun hilh uh na hi tau kha: “Kuo’n le, na a sep nawp loh chun, nek le ne kihen,” tih ahi.

¹¹Ziehaw hi, na lak uh a khenkhat, hin thadah taka hing leh, na himhim sem lo a, mi simmawh in a tumta zaw sek ui tih ka zak ziek u a ka gen uh ahi.

¹²Zieziekchun, khutibang mite chuh, thipkêi a sem ding leh, amau hinna ding kisep dawk dingin, LALPA Isu Krista min in thu ka piek uh ahiu hi.

¹³Himahlele, suohpihte haw, nanguh vangin thilpha bawl chim kiu in.

¹⁴Amahvang chuh, mi kuo ahim khatto, zie lehkhathâk a ka thugen hawu hi, zawp nuom lo um un au. Khutibang mi chuh a um chun, a hung zahchâk theihna dingin, kivawppih lo in, melgiel zawu in.

¹⁵Himahlele, melma bangin vang bawl kiu inla, suohpih bangin ko zawu in.

¹⁶Chun, chamna LALPA mawng chun, hun tin leh bang chengah, chamna nanguh hun pie ta he’n. LALPA chuh na bawnchau a kawmah um hen.

¹⁷Ziehi, keimah khut ngeia ka hun zik ahi: Paul apat in chibai. Ziehi ka lehkhathawn tin chenga ka zik, melchikna dinga ka zik dân chuh ahi.

¹⁸I Lalpau Isu Krista hehpihna chuh na bawnchau a kawmah um ta hen.