Read Gangte 1 TIMOTHE 1 Bible Online

1 TIMOTHE 1 - Gangte bible

1 TIMOTHE 1

¹Paul, Pathien ei hukdampau leh, Krista Isu I kinepnau thupiek banga, Krista sawlchak apat chun,

²Taksanna a ka cha taktak, Timothe kawmah: Pathien I Pau leh, Krista Isu I Lalpau kawm apat, lungsietna le, zahngaihna le, chamna le hung um ta hen.

³Makedonia gama ka chieh ding kuon a, ka hun ngek guol khan, Ephesi khuo a um zing dingin ka hun ngek na hi. Zie taka mi khenkhat, thugin diklo sinsakte khah na sukhaih dinguh ahi.

⁴Amau haw chuh, thusim maimai leh, pi le pu khanggui thu sutsen loh, kinielna mai châwk dawk seka; taksanna zieka Pathien nasepna lama phachuom lo thute khah haihsan dingin hilh ah.

⁵Ka hilh lawhna pên chuh, lunggil thiengtho leh, sie le pha hetna thieng tak leh, taksanna taktak apat a hung pawt, hehpihna chuh a neih theihna dinguh ahi.

⁶Mi khenkhatte chuh vak kawi in, zie chuh a kiheimagsan u a, thu manloh genna lam achun a petmang zaw tau hi.

⁷A thugen uh umzie leh, kimuong taka a genteu chuh bang a hih he sam lo in, Pathien Dan sinsaktu hih a nuom sek ui.

⁸Dan chuh, a mat ding dân taka mat a hih chun, a phai tih I he ngâl u a.

⁹Ziehaw hi he leuhing: Dan hi mi diktatte dinga siem a hi puoh a; dân khawksalo leh, dân bawhsiete ding leh, Pathien khawksalo haw leh, mi gilote ding leh, mi thiengtho lo haw leh, Pathien zah lo haw ding leh, pate that haw leh, nute that haw ding leh,

¹⁰kideihchak nuom haw ding leh tawkuohûk haw ding leh, mihiem-gukmang chîng haw ding leh, lepchieh a, thugin dik tawh kikalh lama hetpihtu lêm a pang te dinga siem ahi ngâl a.

¹¹Zie thu sinsak chuh, Chanchin pha a kimu, Pathien lopi leh vangsaka kipata Chanchin pha, zie phuong dinga vawp saka ka umna pên chuh ahi.

¹²Nasepna dinga hatna ei piepa, Krista Isu I Lalpau kawm achun kipahthu ka gen hi. Masang in gensie pên leh a sugimthei pên leh, a bawlsie pên a na himahlengle,

¹³Taksanum a ei ngaih tâk ziek hin. Himahlele, taksanna ka neih nai loh ziek leh, ka thilhih chuh bang ahih helo a ka hih a hih ziekin, Pathien chuh ka chungah a zahngai a.

¹⁴Tichun, I Lalpau chun, a zahngaihna nasatak chuh ka chunga hun sungtha’n, Krista Isu tawh kipumkhatna zieka I neih uh, taksanna leh lungsietna chuh ei pie ta a.

¹⁵“Krista Isu, mi gilote hukdam dingin, khawvel ahin a hung hi,” tih hi a taksanum in, pawm tâk mawng ahi. A lak uh a mi gilopen ka hi a;

¹⁶Himahlele, Pathien chuh ka chunga zahngai in, kei, migilo pente laka gilopen chunga hi, Krista Isu thuokhhatna bukim chuh suklat ahi a; tunung a amah hun gingcha a, kumsawt hinna hung chang dingte etsakna dingin ei hun mang ta a.

¹⁷Leng lienpen, kumsawt a um, thi theilo, muh theih loh, Pathien khat mai pa kawm achun, limbawlnate, lopinate, kumsawt, kumsawt in um ta hen! Amen.

¹⁸Ka cha Timothe, masang a na chanchin a hilhlawk bang u khan, zie thupiek hi ka hun vawpsak na hi. Zie thu haw chuh phataka na do theihna dingin gâlthuom bangin mang inla;

¹⁹Chun, taksanna dettak leh, sielephahetna thieng tak chuh vawp zingin. Mi khenkhatte’n a sielephahetnau chuh ngaihsak lo in, taksanna lam achun kuong kek bangin a keksie sek ui.

²⁰Ziehaw lak achun Humenaia leh Aleksandar a tel ui; Pathien gensiet a haihna dingun. Setan khuta pie’n, ka gawt ahi.