Read Gangte 1 TIMOTHE 3 Bible Online

1 TIMOTHE 3 - Gangte bible

1 TIMOTHE 3

¹“Kuole, sapchuom lamkai a pang nuom chuh, na pha sem nuom ahi,” tih hi a dik hi.

²Khutichun, sapchuom lamkai chuh, paulap bei, zi khat nei, kikhitthei, lungthim diktak pu, mi kitûp, mi lawpdan thiem, sinsak dân thiem,

³zungawl vei lo, thagumsuoh chîng lo, mi nunnem leh kinakpih ding hawl lo; dangka sum ngailul lo;

⁴zahum taka a chate thunun a, amah insung khawsak vaihawm thiem mi hi ding ahi.

⁵Mi’n, amah insung khawsak bawn a vaihawm thiem loh chun, bangti’n a, Pathien sapchuom haw a chinsui a, a vaihawm theih ding?

⁶Taksanna lama mi piting tak hi ding ahi, khutilochun, kikaisak a, kiletsak in um intin, Diabol mawhchanna chuh chang kha’na.

⁷Ziehaw lo chun le, sapchuom pawlama mite pahchak in le a um ding ahi, khutilochun, gensieta um in, Diabol thâng ah âwk kha’na.

⁸Khutibang mah in, sapchuom nasep panpihte chuh, mi zahum hi ding ahiu hi; Kamtam te, uain heh te, lepna diklo a huoiham te ahi dinguh ahi puoi;

⁹taksanna thudik suklata um chuh, sielephahetna thieng taka tuchak mi a hih dinguh ahi zawi.

¹⁰Amau haw chuh patep in um masau hen la, chun, zie patepna chuh a zawh uh leh, na chuh sem u hen.

¹¹Zie tawbang mah chun, a ziteu chule, nungchang pha leh mawk holim hât hilo in; bang chenga pilvang tak leh taksanum a hih dinguh ahi.

¹²Sapchuom nasep a panpihtute chuh, zi khat nei, a chateu leh, amah insung khawsak vaihawm thiem mi hiu hen.

¹³Zie tawbang a panpihtu, a nasep ding phataka semte chun, amau a ding ngeia dinmun phatak nei in, Krista Isu a taksannau thu chuh, hangsan takin a gen thei sek uh ahi.

¹⁴Chawmlo kal a na kawma hung kinem in, zie thu haw hi na kawma ka hun zik ahi.

¹⁵Himahlele, ka hung hak khakpalh leh, Pathien inkawte laka mi chuh, bangtia um ding ahim tih, na het theihna dingin ka hun zik ahi; ziehaw chuh Pathien hing sapchuom, thutak khuom leh kingakna chuh ahiu hi.

¹⁶Chun, I Pathien ngaihsakna thuguk chuh, niel guol loh a lopi ahi ngâl a: “Phehlevo a hung kiphuong a, Thagau a thiem chang a; Vânsâwlchâkte’n le a muh uh, Jentel te laka tângsappih a, Khawvel pumpi a mite ginchak a, Lopina a puih toh takpa chuh.”