Read Gangte 1 TIMOTHE 4 Bible Online

1 TIMOTHE 4 - Gangte bible

1 TIMOTHE 4

¹Himahlele, hun nunung achun, mi khenkhatte chuh, mi lepchiehte gukhahna zieka puihmang a um in, thagau haw leh thithate sinsakna thu lunggulh in, taksanna chuh hun haihsan un au tih, Thagau chun kichien takin a gen a.

²Amau chuh, mi thephat, lepchiehte, a sielephahetnau thik-âm a deh lup tawbang ahiu a, zie sinsakna haw chuh a thehzak uh a.

³Zie tawbang mite chun kichên a khap uh a, sa nek a khap u a. Himahlele, Pathien in zie haw chuh, thudik he a, amah gingchate chun, kipahthu gena, paucham zawh nunga nek dingin a siem ahi ngâl a.

⁴Pathien thilsiem tincheng hi a pha ngâl a, nawlh ding bangmah a um chuom puoi, himahleh, thil cheng chuh, Pathien kawma kipahthu gena pawm ding ahi;

⁵Pathien thu leh pauchamna chun, Pathien pawm takin a siem ta ngâl a.

⁶Zie kithu-hilhna haw, taksanna thu leh, kihilhna dik, tutienga na zuih sek, nangmah mawng thagau lama na kivakna sek hi, suohpihte kawma na piek chun, Krista Isu sawntawlawi phatak hi’n la.

⁷Amahvang chuh, Pathien zah lohna leh, teksiete holimna thusim maimai chuh la ki’n la, Pathien khawksak dingin kisawizawi zaw’n.

⁸Taksa kisawihzawina hin phatchuomna huntieng a nei na a, Pathien khawksakna vang hin chuh, tu a umsa leh, hung um kit ding piek tiemna a neih ziekin, thil tin chengah a phachuom hi.

⁹Zie thu kigen hi, pawm ding leh ginchak dingin thu diktak ahi.

¹⁰Khutichun, Pathien hinga chuh I kinepnau I ngak ziekun, I semgim uh a, I kinem hâm hâm uh ahi ngâl a, amah chuh mi chengcheng hukdampa ahi a, a gingchate Hukdampa ahi diek nalai hi.

¹¹Zie kithu-hilhna haw leh sinsakna haw hi pie sawn ah.

¹²Na chapanna kuoma’n ngaidau kihen, thugen lama le, tawihzie lama le, hehpihna lama le, thagau lam ale, taksanna lama le, thienthona lama le a gingchate tatmuh hi zaw’n.

¹³Ka hung masang sieh, mipi laka Pathien lehkhathu sim leh, thugen le, mi sinsak le na gunchuh ah.

¹⁴Nangmah a um, Thagau thilpiek, hilhlawk banga, upate khut ngak khuma, Pathien in a hun neihsak kha ngaihthah kih,

¹⁵Mi chengcheng muh a na masawnna a lat theihna dingin, zie thil haw achun taimat suoh inla. ziehaw achun kimang zo ah.

¹⁶Nangmah leh na thu sinsak achun chingthei in. Zie thil haw chuh hihzawm zingin. Khutibang na hih chun, nangmah leh, na thu ngaithate chengcheng hukdam ding hi chin a.