Read Gangte 1 TIMOTHE 5 Bible Online

1 TIMOTHE 5 - Gangte bible

1 TIMOTHE 5

¹Teksie deuhte chuh gai ki’n la, pa bangin thêm zawh; tanglak deuhte chuh suohpih bangin,

²teksepi haw chuh nu bangin; nungak deuhte chuh suohpih bangin, thiengtho takin bawl zaw’n.

³Meithai taktak, amah chauh a umte chuh limbawl un.

⁴Amahvang chuh, meithai kuo’n le, chate ahim, tute ahim nei leu, amau inkuon sung lama Pathien khawksakte um ding dân tawh kituoka a nasep dinguh chuh. hih masau he’n la, amau hinte chunga phat thuk ding sin u he’n; zie chuh Pathien kipahlam ahi ngâl a.

⁵Meithai taktak amah maia um, a enkawl ding umlo chun, Pathien chungah kinepna a nei chak a, a sun a zan a paucham in, panpihna a ngên sek ahi.

⁶Himahlele, meithai, amah nawpchenna lama kipie chuh, a damlai ngêi inle, a thisa ahi.

⁷Paulap beia a um theihna dingun. zie kithu-hilhna haw chule pie’n.

⁸Himahlele, kuo’n le amah mite ding ngaihtuoh khawl lo a, amah insung a mi neupen ding nasan a ngaihtuoh khawl loh chun, taksanna chuh a kizuksan a, ginglo mite sanga gilo zaw ahi.

⁹Meithai chuh kum sawmgup a thak, nuoi lam mi chuh zik tel kih. Zie ban achun, pasal khatvei neisa.

¹⁰thilpha hih lama mi pahchak a um; numei, a chate phataka dâwn tei a, malzinte a In a na lawp thiem a, mi thiengthote keng a na sil sak a, mi lunggimte na khuotuoh a; amah mawng thilpha hihna lama kipumpiek mi hi ding ahi.

¹¹Himahleh, meithai nungak deuhte vang chuh zik se ki’n; a phehlevo utchaknau chun pasal neih kit a utcha sek uh a, ziehaw chun Krista kawm apat puih mang in a um sek ui.

¹²Khutichun, a thutiem masau kha bawhsie’n, mawhchang in a um sek ui.

¹³Zielo chun le, In tina vak lawn viel in, a hih loh ding piu thilhih in, thatdah leh mawk holim a pan sek ui.

¹⁴Khutichun, meithai ana nungak deuhte chun pasal nei u hen la, cha le nei u hen, In sung vaihawm u hen la; I melmateu ei gensietna ding hun mawngmawng pie dah leu ka nawp ahi.

¹⁵Tuhin le, meithai khenkhatte chuh Setan lam ah a kihei ta ngâl u a.

¹⁶Chun, gingtute laka numei kuo’n le, a inkuon uh sung ah meithai nei ta leu, amau chuh a etkawl phat ding ahi, sapchuomte chunga puokgik a siem sak loh ding ahi, meithai taktak te chuh a khawmtuoh theih zawkna dingin.

¹⁷Sapchuom upa vaihawm phate chuh a lehnih a limbawl kham a ngaih hiu hen; thugen leh sinsakna lama semgimte vang chuh, limbawl kham a ngaih hi diek u hen.

¹⁸Pathien lehkhabu chun, “Bâwngchal in buh a chil pet chun a mûk ka’n ki’n,” a ti a, “Nasempa chuh lawh mu ding mawng ahi,” le a ti a.

¹⁹Sapchuom upa a heknau chuh, hetpih nih ahim, thum ahim kam apat a hih loh chun pawm ki’n.

²⁰Thil sukhielte chuh mi chengcheng masangah suohsalh ah, mi dang te’n le a lauh theihna ding un.

²¹Zie thu haw hi langneih chuom na nei leh, uohchuom nei a bangmah hih lo in, Pathien leh Isu Krista leh vânsâwlchâkte mitmuh in, zawp dinga phachuomngai taka ka hun hetsak na hi.

²²LALPA nasepna dinga lat thiengtho a hih theihna dingin, kuomah chungah na khut nga phut ki’n la; mi dangte gitlohna achun le tel diek ki’n la, nangmah mawng kihihthiengtho zing zaw’n.

²³Tui mai dâwn ta ki’n la, na gil ziek leh, na damloh sek ziekin uain le tawmcha cha mang sek in.

²⁴Mi khenkhatte gitlohna chuh muh theih zieng dingin langchang takin a um sek a, a gitlohnau chuh a masang uh a vaihawmna ah a chieh masa sek hi. Himahleh, mi khenkhatte gitlohna vang chuh a vainung leh muhin a um chauh sek hi.

²⁵Khutibang mah chun, thilhih phat kilang thei diek a um a, khutibanga kilang lo haw chule selguk theih a hi diek puoi.