Read Gangte 2 TIMOTHE 1 Bible Online

2 TIMOTHE 1 - Gangte bible

2 TIMOTHE 1

¹Paul, Krista Isu tawh kipumkhatna zâla hinna thutiem I neih uh phuongzak dinga, Pathien phasak lam a Krista Isu sawlchak apat,

²Ka cha deihtak Timothe kawm achun: Pathien I Pau leh Krista Isu I Lalpau kawm apat lungsietna leh, zahngaihna leh, chamna le hung um ta he’n. Kipah thugenna leh Tîlkhohna

³Ka pilepute hih sek bangin, sielephahetna thieng tak nei a a na ka sep sek Pathien kawm achun kipahthu ka gen sek a. Sun le zan a hai lo in ka pauchamna haw achun ka hun hetzing sek ziekin, a kawm achun kipahthu ka gen ahi.

⁴Na mitthi luon geldawk zingin, kipaka ka dim theihna dingin, nang hun muh le ka nuom mah mah hi.

⁵Taksanna taktak, nangmah a um chuh ka gel zing ngâl a, zie taksanna chuh a tûngin na pi Lois ah a um a, na nu Eunik achun tawh a um a, nangin le zie chuh na nei ngêi hi tih chientakin ka he ngâla.

⁶Zieziekchun, na chunga ka khut ngak zieka Pathien thilthawnpiek, nangmah a um khah mûtkuong dingin ka hun geldawk sak kit na hi.

⁷Pathien in lauhna thagau ei pie puoh a, thilhih theihna leh hehpihna leh lung kitûp tak neihna thagau ei piek zawk uh I hi ngâl u a.

⁸Khutichun, I Lalpau thu hetpih a pan chuh zahchâkpih ki’n la, kei, amah zieka suongkul lut hile ei zahchâkpih diek ki’n. Zie malak chun, Chanchin Pha zieka haksa thuok hi, Pathien in thuok theihna a hun piek bang zelin nei thuokpih zaw ta’n.

⁹Amah chun ei hukdam ta a, amah mipite ngêi hi dingin ei sama, I thilhih teu ziek hilo in, amah guot ngêi leh a hehpihna ziekin a hi zawi. Zie hehpihna chuh leisiet kisiem masang in Krista Isu achun ei piek uh I hiu a,

¹⁰Himahlele, tuhin, I Hukdampau, Krista Isu hungna ahin, I kawm u ah suklatin a um tai. Amah chun thihna thilhih theihna chuh sumangthai in, Chanchin Pha chun, thi theilo hinna chuh a sulang tai.

¹¹Pathien in zie Chanchin Pha chuh phuong dinga, sawlchak leh sinsaktu dinga ei tel ahi a,

¹²Zieziekchun ahi, zie thil haw hi ka thuok chuh. Himahlele, ka zakcha a puoi, ka taksan pên pa chuh ka he a, a kawma ka vawp sak chuh zie Ni a ding chun a vawppha thei hi tih chientakin ka he ngâl a.

¹³Nanga dinga etsakna ka hun piek guol u khan, thudik tak ka hun sinsakteu kha tudet kei inla, chun, Krista Isu tawh I kipumkhatna ziek u a I chan uh, taksanna leh hehpihna akhan um zingin.

¹⁴Eimau a um, Thagau Thiengtho thilhih theihna zal chun, na kawma vawp saka um kha vawppha ta’n.

¹⁵Asia gama um chengcheng te’n ei nungngat u khah na he a, a lak u achun Phugel leh Hermogena a tel ui.

¹⁶LALPA chun Onesphora inkawte kawm achun zahngaihna sulang hen, amah chun tamtak vei ei suhalh ta ngâl a. Chun, suongkul a ka um hile ei zahchâkpih diek puoh a;

¹⁷Himahlele, Rome khuo a hung tuntun chun, ei hawl pai zieng a, ei muhdawk masang cheng chun ei hawl ta a.

¹⁸LALPA chun zie Ni chuleh a chungah zahngaihna chuh latsak ta he’n! Ephesi khuo a keia dinga a sep nasat zie kha na he mah mah ngâl a.