Read Gangte 2 TIMOTHE 2 Bible Online

2 TIMOTHE 2 - Gangte bible

2 TIMOTHE 2

¹Khutichun, nang ka cha, Krista Isu tawh kipumkhatna zâla hehpihna ahin, thilhih theihna nei in um ta’n.

²Chun, hetpih tamtak te laka ka kama thu na zak cheng khah, ziehaw mawng chuh mi taksanum, midang le sinsak sawn thei dingte kawm achun vawp sak in.

³Krista Isu sepaih phatak guolin haksa thuok ei thuokpih ah. Sepaih a pang dinga lapa chuh a sukkipak theihna dingun,

⁴Sepaih kuomah kido lai in tu damsung khawsakna haw hin a kisunawk ngêi puou hi.

⁵guolsiek bawlna haw achun mi’n bawl mahleu le, dân guola a bawl loh chun, khuksak in a um kha puoi.

⁶Loneipa semgim chuh a gah chang masapen hi ding ahi ngâl a.

⁷Ka thugen hi geltuok tie; LALPA chun thil bangakai ah het theihna hun pie ding ahi ngâl a.

⁸Isu Krista, David phung a mi chuh ka Chanchin Pha a kigen guola mithi lak apat thokitpa a um hi tih gel zingin.

⁹Zie Chanchin Pha chuh ka gen zieka thuokin, dân bawhsie banga kawl buh sak natieng hielin ka um ahi kha. Himahlele, Pathien thu chuh kan in a um puoh a,

¹⁰Krista Isu zâla hukdamna chuh, kumlekhuo a lopina tawh a muh theihna dingun, Pathien mi telte ziekin thil bang cheng chuh ka thuok muolsuok sek hi.

¹¹Zie thu kigen hi taksanum ahi: “A thihna ah I thih tâk ngâl u chun, A hinna ah le hing hitiu;

¹²I thuok muolsuoh u chun, A vaihawmna ah vaihawm hitiu; Amah I kilepsan u chun, Ama’n le ei kilepsan ina;

¹³Eihaw taksan um lo in um mahleu hing, Amah chuh a taksanum zing hi; Amah leh amah a kithem thei puoh ngâl a,” tih hi.

¹⁴Zie thu haw chuh na mite hetsak kit inla, thu maimai chunga a kiniel lohna dingun, ziehaw chuh a zate dinga sietna chauh ahih zawk ziekin; LALPA min in phachuomngai takin hilh in.

¹⁵Thutak thu diktaka khen zah châk na ding neilo nasemtu bangin, Pathien mitmuha pha bukim a kilang dingin phachuom ngai ah.

¹⁶Amahvang chuh, Pathien khawksak lohna lama phunchiek bautam haw chuh kikiengkawihsan sek ta’n; khutibang mite chuh Pathien khawksak lohna lam achun khawk zawsem un tin,

¹⁷Zie tawbang sinsakna chun, phehlevo meimasie nek guolin ne zo zel ina. a lak u ah Humenaia leh Phileta a tel ui.

¹⁸Thutak lampi chuh kiheimangsan in, Thawhkitnau chuh a kichai tai, ti’n mi khenkhatte taksanna chuh a sulînglau sek uh ahi.

¹⁹Himahlele, Pathien suongphum dettak chuh suk tawih ding guol ahi puoh a; a chung achun zie thu haw hi zik ahi: “LALPA chun amah a haw chuh a he a,” tih leh, “LALPA min lo taphawtte chun gitloh taihsan hen,” tih hi.

²⁰Himahlele, In lopi achun, ûmlebel, sana leh dangkati a kisung mai a um puoh a, thing leh bellei tung a kisiem le a um sek a; a bang lopi taka mat ding a um a, a bang lopi lo deuh a mat ding a um hi.

²¹Zieziekchun, mi zie thil haw laka chuh a kisukthien chun, ûmlebel thieng, LALPA mat theih, nasep pha tin chenga dinga kiguosa, lat thiengtho chuh hi’n a.

²²Himahlele, tanglak utna haw chuh taihsan inla, lungthim thieng a LALPA sam ta chengte chu tawh, diktatna le, taksanna le, hehpihna le, chamna le delh zawu in.

²³Amahvang chuh, kinakna a suoh sek hi tih he’n, kinielna ngawlhuoi leh ngaihsamte lak achun tel se dah ah.

²⁴LALPA sawntawlawi chun a kilanpih ding a hi puoh a. Himahleh, mi chengcheng chunga nunnem, sinsak thiem leh thuokhat ahih zawk ding ahi.

²⁵Pathien thutak a het na ding u a kisikna hun lemchâng a piek khâk leh ti a amah dodilte chuh thunuoigawlh taka a hilh ding ahi.

²⁶Khutichun, Diabol thâng a awkte chuh Pathien deih bang sem dinga a hung suohchak theih na dingun.