Read Gangte 2 TIMOTHE 3 Bible Online

2 TIMOTHE 3 - Gangte bible

2 TIMOTHE 3

¹Chun, ziehi heu in, ni nunung lam leh hun haksa taktak bang hung um ina.

²Mi, amah kihehpihte, dangkasum ngailulte, mi kilekte, mi kiletsakte, Pathien gensiete, nulepa thu ngailote, kipahna zie helote, Pathien ngaihsak lote,

³lungsietna neilote, nunnem lote; kichampih mawh hielte, mi hêk hatte, mi lauh-umte, thilpha deihlote;

⁴dawha thuk te, khawksak neilote leh, chapona a dimte; Pathien hehpih sanga amah kipahna mai deih zawte hung hi ding ahi ngâl uh a;

⁵Pathien khawksak batna khat nei un tin uh, himahlele, a thilhih theihna tak chuh deih puo’n au. Zie tawbang mite laka apat chuh kikiengkawih ah.

⁶Zie tawbang mite laka khenkhatte chuh mi In a chieh a, a gitlohna ziekuh a thiemmawh kichana puokgik tak puo a um leh, gitlohna tin chenga puihmang a um numeite man sekte khah ahiu hi.

⁷Zie tawbang te chuh, het guo zing ngâl a, himahlele, thutak he ngeilo te chuh ahiu hi.

⁸Janne leh Jambre te’n, Mosi a dodal bang u khan, ziete chun le thutak a dodal sek uh a; lungthim siesa, taksanna lam achun Pathien deih loh lam mi ahiu hi.

⁹Himahlele, zie kalval chuh chieh chawn diek puo’n au, a ngawl zieu chuh mi chengcheng kawmah hung kilang ding ahi ngâl a. Zie chuh Janne leh Jambre chunga tung tawbang phet khah a hi ngâl a.

¹⁰Himahlele, nangin chuh ka thu sinsakte, ka umdante, ka thiltup te na zui a; ka taksannate, ka dawhhatnate, ka lungsiet ziete, ka zaidawhnate,

¹¹sukgimtheih a ka um nate, ka thuokgimna te kha le na he nai. Antiokei khuo te Ikonium khuo te, Lustra khuo te a sukgimtheihna nasatak mai ka chunga hungtunghaw, ka thuok ziete khah na he a! Himahlele, ziehaw chengcheng lak apat chun LALPA chun ei hukdawk ta a.

¹²Ahi, kuole, Krista Isu tawh kipumkhata, Pathien khawksak a um guo chun, sukgimtheihna haw chuh thuok ina.

¹³Migilo leh mi thep hatte vang chuh, mi thep bawl leh thepthak a um in, hung sie zaw deuh deuh un au.

¹⁴Himahlele, nang vang, sinsak a na umna leh, dettaka na taksan, thudik achun um zing in.

¹⁵Nang hun sinsaktute chuh kuo ahi tih leh, Krista Isu taksanna zieka hukdamna mu kham a hun suching thei Pathien Lehkhabu thiengtho chuh na naupan lai apat hesa na hi ta ngâl a.

¹⁶Pathien Lehkhabu tincheng hi, Pathien hatkhum a piek ahi a, sinsakna lam ah le, thil hihkhielte gaihna dingin le, mawh chansakna lama le, hindan dik kisinsakna lama le,

¹⁷Diktatna kisinsakna lama le a mattak hi; khutia chuh, Pathien nasem mi chuh bukim taka um a, nasep pha tin chenga dinga chuh thuom a a um theihna dingin.