Read Gangte 2 TIMOTHE 4 Bible Online

2 TIMOTHE 4 - Gangte bible

2 TIMOTHE 4

¹Zieziekchun, Pathien mitmuh a mihingte leh mithite vaihawm sak ding pa, Krista Isu mitmuh achun, Leng guola vaihawm a hung kilak ding a hih ziekin, phachuomngai taka ka hun hilh na hi:

²Thu chuh gen ah, a hun inle, a hun lo in le, bawl zel ah; lungnem taka sinsak kawmin a mawhnau hetsak inla, gai inla, tîlkhoh ah.

³Kihilhna dik a ngaih ngâp loh hun uh hungtung ding a hii, a bil uh a thak ziekin amau deihlam chietin, sinsaktu ding a kawm u ah puikhawm un tin uh,

⁴a nakhang uh thutak lam achun sungawng un tin uh, thusim holimna lam zuonin pet ta’n au.

⁵Nang vang chuh bangakai ah pilkieu inla, haksa thuok inla, Chanchin Pha gen lam na sem inla; na zenviel nasep kha muolsuoh ah.

⁶Kei vang chuh tuhin le lat a um ka hi ta ngâl a, ka pawtdawk phat a tung tai.

⁷Guolsiek pha chuh ka bawl zo ta a; ka kitaihsiekna lam chuh ka siek zo ta a, taksanna chuh ka kivawp zing ahi tai;

⁸Tuhin chuh diktatna Lallukhuk chuh kei dingin kawih in a um ta a, zie chuh LALPA a ngaihtuohpa diktat chun zie Ni chu leh ei pie’n a; kei kawm mah ah hilo in, a kilâkna ngai ta chengte kawma le hi’n a.

⁹Kin takin ka kawmah hung guo hâm in;

¹⁰Dema’n tulai khawvel thilte hi a ngaihlul ziekin ei taihsan ta a, Thessalonika khuo ah a chieh ta a; Kresken chuh Galati gam ah a chieh ta a;

¹¹Tita chuh Dalmatia gam ah a chieh nawn a, Luke mai ka kawmah a um ta a. Mark khah chiel inla, hun pui ah, amah chuh zenvielna lam achun kei dingin a phachuom ngâl a.

¹²Tukika vang chuh Ephesi khuo ah ka sawl tai.

¹³Na hung tieng leh, Troas khuo a Karpas kawma puonâk chuol ka nutsieh kha, lehkhabu kha tawh hun chawi inla, savun lehkhabu ngêi kha hun chawi in.

¹⁴Aleksandar, sumsan sunthiem khah ka chungah a gilo mah mah sek hi; LALPA chun a thilhih dungzui in dinthuk ina;

¹⁵Amah apat khan nangmah ngêi le kivêng pha’n, ka thugenteu nasatak in a dodal sek ngâl a.

¹⁶Ka thiemna thu ka gen masak tum khan, kuomah cha’n ei panpih puoh ngâl a, ei thahthak zawk uh ka hi. Pathien in a sietnau chuh khuksak hawn kiu hen!

¹⁷Chanchin Pha kei zieka gen kima a um theihna’n leh, Jentel te chengcheng chun a zak theihna dingun, LALPA chun ei hum a, ei sukhat zawk ahi a, chun, sakeibaknei kama um kha hukdawk in ka hung um zaw ahi tai.

¹⁸LALPA chun gitlohna chengcheng apat ei hukdawk intin, a van gam achun bit takin ei tun ina. Amah kawm achun kumkhuotuong in lopina um hen! Amen.

¹⁹Prisilla leh Akuila, Onesphora inkawte kha tawh nei hun chibai sak in.

²⁰Erastas chuh Korinth khuo achun a um zing ta a, Trophimas chu la Milleta khuo ah damlo in ka taihsan ta a.

²¹Phalbi masang in hung guo hâm hâm ta’n. Eubula te, Puden te, Lina te, Klaudia te hin a hun chibai ui; zie tawbang mah chun suohpih dang chengte hin le a hun chibai ui.

²²LALPA chuh na thagau kawmah um ta hen. Pathien hehpihna chuh na bawn u a kawmah um ta hen.