Read Gangte TITA 3 Bible Online

TITA 3 - Gangte bible

TITA 3

¹Vaihawmtute leh thuneitu te nuoia kitulut ding leh, a thuu zawp ding leh, thilpha bawlna lam chenga kisazo ding leh,

²kuomah gensie lo ding leh, thusie bawl lo ding leh, mi chengcheng kawma kingaihniemna tincheng taklang a, nunnem dingin amau haw hetdawk sak kit ah.

³Ei uh le makhan ngawl tak leh thu a nung lo leh, diklo I hiu a. Utchakna leh, nawpna tincheng suok a um I hiu a. I hinkhuou chuh mi muhdahna leh itthikna’n I mang uh a; mi dangte’n ei hawu a, ei un le mi dangte I hawt kit uh ahi.

⁴Himahlele, Pathien, I Hukdampau nunnemna leh hehpihna chuh a hung kiphuon phet chun,

⁵ei uh ei hukdam ta a. Zie chuh eimau mawng in thil I hih phat ziekuh hilo in, himahleh, amah mawng hehpihna chun, Thagau Thiengtho a pienthakna leh hinna thak a chuh ei sil in, ei hukdam I hi tau hi.

⁶Pathien in zie Thagau Thiengtho chuh Isu Krista I Hukdampau zalin, nasa taka let hiela I chunguh a a sunthâk tak khah.

⁷Khutichun, a lungsietna zieka thiemchan saka na um in; kumsawt a hin kinepna dungzuia goluoh dinga siem in um thei hitiu.

⁸“Pathien gingcha sate chun thilpha hih ding ngaihtuoh zel hen” tih hi taksanum ahi. Zie thu haw chuh hâng taka na gen ka nawp ahi. Zie thu haw chuh mihiemte dingin a pha’n, a sawt hi.

⁹Himahlele, kinielna ngawlhuoi leh khanggui thu sautak leh, kinakna leh Dan thu zieka kinakna thute chuh kikiengkawih san ta’n; ziehaw chuh thil sawtlo leh thawnsan ahi ngâl a.

¹⁰Kibungkhenna siem mi chuh, khatvei nihvei ko nung in deih ta ki’n;

¹¹Khutibang mi chuh a chieh khiel ahi a, a gilo hi tih na heu hi, amah leh amah mawh kichan sak ahi.

¹²Artema ahim, Tukika ahim na kawma ka hun sawl tieng le chuh, Nikopoli khuo ah ka kawmah hung hâm hâm ta’n; tak achun phalbi sung chenga um ka guo ngâl a.

¹³Zenas, Dan he pa leh, Apollos chun bangmah a a tâksap lohna dingun, a zinnau achun taima takin kaihuoi ta’n.

¹⁴Ka miteu chun le, thil tâksap tak tak haw âwng a huk theihna dingun, a hun teu chuh thilpha hihna a mat dân ding sin u hen la; hindan mantheihlo takin hing dah u hen.

¹⁵Ka kawma um cheng chengte hin a hun chibai ui. Taksanna a ei hehpihte khah ei hun chibai sak in. Pathien hehpihna chuh na bawnchau a chungah um ta hen.