Read Gangte PHILIMON 1 Bible Online

PHILIMON 1 - Gangte bible

PHILIMON 1

¹Paul, Krista Isu zieka suongkultâng leh I suohpihpau Timothe chun, I deihtak uh leh I sepgim pih uh Philimon kawmah leh,

²I suohpihnuu Apphi kawma leh, I sepaih pih uh Arkippa kawma leh, na In a sapchuom kikhawmhaw kawm achun;

³Pathien I Pau leh LALPA Isu Krista kawm apat, lungsietna leh chamna um hen.

⁴LALPA Isu lam leh, mi thiengthote chengcheng lama na taksanna thute chuh ka zak in,

⁵ka pauchamna achun na min lo zingin, ka Pathien kawm achun kipahthu ka gen sek hi.

⁶Taksanna a nang haw tawh I kivawpkhawmnau chun, Krista tawh kipumkhatna zâla hamphatna hung um chuh, het thuk zawksemna a tun theihna dingin ka paucham sek hi.

⁷Suohpihte, na lungsietnau chun lawpna nasatak leh, tîlkhohna nasatak ei pie ahi! Mi thiengtho cheng chengte lunggil chuh na chawkhalh tau hi.

⁸Chun, Krista a suohpih khat hihna zalin, hih ding dawl te chuh hihin ti’n thu ka hun pie ngam a.

⁹Himahleh, kei Paul hi upa tak, Krista Isu palai leh, tu a amah min zieka suongkul tâng himahleng, ka hun lungsietna ziekin a nget a ka hun nget thawh na hi.

¹⁰Ka cha Onesma, bulput kawma ka hinpa ding hin na kawma ka nget sak a hi.

¹¹Amah chuh makhan nanga dingin phatchuomna a nei puoh a, tuhin vang chuh kei leh nanga dingin a phachuom mah mah tai.

¹²Amah mawng hi, ka lunggil a gel zing kawmin na kawmah ka hun sawl kit a hi tai.

¹³Amah hi, Chanchin Pha zieka suongkul a ka tan sung hin, nang sika ei zenviel theihna dingin ka kawma umsak zing hi ka nawp ahi.

¹⁴Abang hileh, nang lung lo in bangmah hih ka nuom puoi; nangmah phasakna ngeia na hih chuh ka hun deihsak zawk ahi. Zieziekchun, nangin lem na sak loh chun bangmah hih puo’ng ka.

¹⁵Chun, chawmkhat a hun kikhenpih hi, kumlekhuo a amah hi na neih den na ding ahi zaw mawh die!

¹⁶Tuhin chuh, suok mai hita lo in, suok sanga phazaw mah mah, Krista a suohpih ahi zaw ta hi. Keia dingin bangti tiengin ahi diek tam! Nanga ding vangin taksa lam leh LALPA a suohpih ahi zaw sem na ding e!

¹⁷Khutichun, lawi leh guola nei ngaih chun, kei nei lawp sik in amah hi na lawp ta’n.

¹⁸Chun, na chungah bang hita leh. sukkhelh ahim, bang ahim khat a bat chun, kei bat in kawih inla;

¹⁹Kei Paul in ka khut mâwnga ka zik ahi, keima’n dit sak ing ka; (keia na bat ti a ngên vang kei puoi).

²⁰Khutichun, suohpihpa, LALPA zalin, lungsiet takin zie deihsakna hi ei na hih sak tei inla, Krista a suohpih bangin, ei sukipak ta’n!

²¹Ka gen sanga nasa zaw bawnin hih inla tih ka het ziekin, na ki-awih gingcha’n, na kawma ka hun zik ahi hi.

²²Zielo chun le, tunna ding ei na guonggalh sak in, Pathien in na bawn u a na pauchamna teu dâwng in, na kawmuh a hung ka kinem ngâl a.

²³Epaphra, Krista Isu min zieka ka suongkul lutpih pa hin a hun chibai hi.

²⁴Ka naseppihte, Markas te, Aristarkas te, Dema te leh Luke te hin le khutibang mah chun a hun chibai ui.

²⁵I Lalpau Isu Krista lungsietna chuh na bawn u a chungah um ta hen. Amen.