Read Gangte HEBRAI 1 Bible Online

HEBRAI 1 - Gangte bible

HEBRAI 1

¹Pathien in malai in ei suontuteu kawmah tamtak vei chuh, lam chuom chuom in; thiemgaute mang in thu a na gen ta a.

²Himahleh, tuhun tâwp ahin, eihaw kawmah a Chapa achun thu a gen tai. Amah achun Pathien in vannuoi pumpi hi a siem a, amah mawng chuh thil bangakai nei dingin Pathien in a teldawk nawn a.

³Amah chuh Pathien lopina eng leh, Pathien hihna kibatpih ngêi, a thu thilhih thei taka bangakai vawp det pa chuh ahi. Mi chengcheng dinga gitloh ngaihdamna a siem nung in, van a, Pathien Bangakai hihtheipa khut changlam akhun a va chu ta a.

⁴Pathien in amau haw sanga min lopi zaw a piek mah bangin, Chapa chuh Vânsâwlchâkte sanga lopi zawa siem in a um ta ngâl a.

⁵Vânsâwlchâkte lak ah, kuo kawmah e, zie thu haw hi a gen khâk sek? “Nang vang ka Chapa na hi ie, Tunia ka hun hin na hi tai,” tih leh, “A dingun Pa hi’ng ka ting, Amah chuh kei dingin Chapa hi’n a,” tih hi.

⁶Chun, Cha pieng masapen chuh van nuoia hih puih lut a hih tieng, “Pathien Vânsâwlchâkte chengcheng inle, Amah chibai u he’n,” a ti a.

⁷Chun, Pathien in Vânsâwlchâkte chungchâng thu achun ziehi a gen ahi: “Amah chun a Vânsâwlchâkte chuh huih a suoh sak sek a, A zenvielte le Meikuong a suoh sak sek hi,” tih hi.

⁸Chapa chungchâng thu achun Pathien in ziehi a gen a hii: “Aw Pathien, na Lalgam chuh kumkhuotuong a um ding ahi; Dikna leng tiengkhut chule Na gam leng tiengkhut chuh ahi ngâl a,

⁹Diktatna chuh na ngailul a, Sukkhelhna vang chuh na haw a. Zieziekchun, Pathien, na Pathien chun, Na lawite sang chun Lawpna thau a hun nuh tam zawk ahi,” tih leh,

¹⁰“Nang, LALPA, a tûngin Leisiet kingakna na phuhdawk a hi ta a, Vante le na khut suok ahi;

¹¹Ziehaw chuh hung beimang intin, Nang vang chuh um den ding na hi; Silhlechen guolin hung lui untin,

¹²Puon guolin ziel in na tin; Silhlechen guol mai in, hung kidang ta’n a, Himahleh, nang vang chuh na ngêi ngêi na hi zing a, Na kumte haw le bei diek puo’n a,” ti’n.

¹³Himahleh, Vânsâwlchâkte lak ah kuo chungchâng thu ah e, ziehi a gen khâk sek? “Na melmate na kêngpêk ngakna a Ka siem masang sieh chuh Ka changlam ah chu zing in,” a ti khalo ahi.

¹⁴Amau haw chuh thagau, Pathien nasem leh, hukdamna goluoh dinga a sawl dawkte chuh ahiu hi.