Read Gangte HEBRAI 10 Bible Online

HEBRAI 10 - Gangte bible

HEBRAI 10

¹Dan thu chuh, tunung a thilpha hung um dingte lim banga um chauh ahi a, a tak a hih loh ziek chun, kum chenga a kithawihna ngei mah uh a a kithawihnau chun, Pathien kawma hungte chuh subukim thei diek puo’n a.

²Khuti hi kileh, Pathien hote chuh khatvei a sukthien ngâla um in, gitloh zieka mawh kichansakna um ta lo in, kithawih haihsan ta khawp lo ding ahiu hi?

³Himahlele, zie kithawihnahaw achun, kum chengin gitloh geldawkna a um zaw sek hi.

⁴Bâwngchal leh kelhaw thisan chun gitlohna haw sukmang theih guol a hi puoh ngâl a.

⁵Zieziek tak chun ahi, Krista chuh zie khawvel a a hung lai khan, “Kithawihna leh thillat na na deih puoh a, Kei dingin taksapum nei na guot sak zaw a;

⁶Hâlmanga kithawihna gan maichâm a hâlte leh, Gitloh dinga kithawihnate haw achun kipahna himhim na nei puoh a.

⁷Chun kei chun, ‘Aw Pathien, ngaitie! Dan lehkhabu a ka chanchin zik a hih guolin, Na deihlam hih dingin ka hung ie,’ ka ti a,” a tih kha.

⁸Amasa ahin, “Kithawihna le, thillat le, hâlmang kithawihna le, gitloh thawihna le na deih puoh a, ziehaw achun le kipahna na nei diek puoi,” a ti a. (ziehaw chule Dan guola lat ahi a.)

⁹Ziephet chun, “Aw Pathien Ngaitie, na deihlam hih dingin ka hung ta ie,” ana ti tai. A nihna hi a tundin theihna dingin a masa chuh a lâkmang a hi tai.

¹⁰Khutichun, Isu Krista chun, Pathien in hih dinga a deihlam chuh hun hih in, amah sapum ngêi chuh khatvei a hun lân in, I gitlohnateu apat chun sukthientho in I um tau hi.

¹¹Chun, Judate thiempu tin chun, ni chenga a zenviel na nau sem in leh, tamtak vei kithawihna ngêi mah chuh a lân u a; himahleh ziehaw chun gitlohnate chuh a lamang thei diek puoi.

¹²Krista chun vang, kumkhuo a dinga gitloh thawihna dinga set theih, kithawihna khat lân in, Pathien khut changlam ah a va chu zaw ta a.

¹³Zie tak achun, Pathien in a melmate chengcheng a kêngpêk ngakna a a siem masang sieh chuh a ngak zing ta a.

¹⁴Kithawihna thillat khat mai chun, gitlohna apat a sukthien sate chuh, kumlekhuo a dingin sukbukim in a um tau hi.

¹⁵Chun, Thagau Thiengtho chun le ei hetpih a:

¹⁶“Zie nihaw nung chuleh, a kawmuh a thu ka gawlh ding chuh ziehaw hi ahi, LALPA chun a tii; A lunggil u ah ka dân siem haw chuh kawih ing ka ting, A lunggil uh ale zik ing ka” ti a a gen nung khan,

¹⁷“A gitlohnau leh a sukkhelhnau hezing ta puo’ng ka,” a ti ngâl a.

¹⁸Khutichun, ziehaw chuh ngaihdam a hih tâk nung chun, gitloh lâkmangna dinga thillat chuh a mamawh ta puoh ngâl a.

¹⁹Khutichun, suohpihte haw, Isu thisan zal chun, Mun Thiengtho pên achun, zalen taka lut theihna I nei tau hi.

²⁰Eihaw ading in puonzak, zie chuh a sapum ngêi chuh ahi; hun hawng in, lam thak leh hing ngêi chuh a hun hawng tai.

²¹Tichun, Pathien inkawte chunga Thiempu Lienpen chuh I nei tau a.

²²Zieziekchun, I lunggil uh a sielephahetna a thiemmawh kichansakna chuh sukthien saka um in, I sapum hawu le tui thieng a silngim a um in, taksanna bukim leh lunggil tak takin Pathien kawm lam naih hitiu.

²³I taksan kinepnau hi a lawn loh na dingin tuchak zing hitiu, thutiempa Pathien chuh a taksanum ngâl a.

²⁴Chun, hehpih leh thilpha bawla kichawktho dingin kingaihtuoh pih chiet hitiu;

²⁵Mi khenkhatte hih dân guola, I kivawpkhawmna sekteu haihsan diek lo in, kitîlkhoh tuoh zawi tiu, LALPA Ni chuh hung nai tel tel a na het u hin, kihah tîl zawsem sem un.

²⁶Thutak hetna bukim chuh I chan nung uh a, I hetsa sau a I gitloh u chun, gilote dinga kithawihna um ta hiel puo’n tin,

²⁷Vaihawm sakna lauh-um huoisie tak leh, Pathien dodalte kanggam ding lungnatna mei chuh hung um zaw ta ding ahi.

²⁸Mosi Dan thu khawksalo mi chuh, hetpih nih le thum ahim thu’n, lainatna tello in a thi sek ui.

²⁹Pathien Chapa tawhden a, thugawlh thisan, amah sukthienna chuh musit a, lungsietna Thagau sumuolpho chuh, zie sanga bangti tienga na zaw a thuok taka ngaih hi dingin a na ginchak?

³⁰Phuba himhim kei lak ding ahi, kei ma’n dinthuk ka tih leh, “LALPA chun a mite chungthu ngaihtuoh sak ina,” ti kit pa chuh I he ngâl uh a.

³¹Pathien hing khuta kiek chuh thil tizat-um tak ahi!

³²Na malai umdanteu khah geldawk zing sek un! Zie hun lai khan, Pathien vak chuh na chunguh a a vak nung khan le, thil tamtak na thuok sek uh a, himahleh, ziehaw chun a hun zo ngeilo uh ahi kha.

³³Khatvei leh tângphuong taka hosietna leh bawl gimtheih in na um u a, hun khat leh, gimtheih thuokte leh chiemnuih buk a bawla umte thuok pihte na hiu a.

³⁴Suongkul tânga thuokte chuh na lainat uh a, thil phazaw, kumlekhuo a um den ding chuh nangmau ngêiin van ah na nei ui tih kihet in, na thil neih teu hun lâksakte le kipâk takin na thuok ngâl uh a.

³⁵Khutichun, na hansannau chuh mansak kiu in, zie chuh kipahman hun muh sak ding ahi ngâl a.

³⁶Pathien deihlam hih a, a thil tiem chuh mu dingin thuokhatna na kiphamawh uh a puo!

³⁷Pathien lehkha thu’n: “Chawmkhat hal leh, A hung ding pa chuh hung ding ahi ngâl a, Sawt hal ta puo’n a.

³⁸Himahlele, ka mi diktatte chun taksanna’n hing un au. A lak uh a kuole, a nungchawn u chun chuh, Ka lungthim in amau achun kipahna him him nei puo’ng ka,” ti a a gen guolin.

³⁹Eihaw vang nungchawn a mangthai ding mi I hi puou a; taksanna nei a hukdam I hi ngâl uh a.