Read Gangte HEBRAI 12 Bible Online

HEBRAI 12 - Gangte bible

HEBRAI 12

¹Khutichun, eihaw vang, hetpih meipi nasa takte um kimvela um I hih ziek u hin, ei sukawlawk ta cheng leh, gitloh eimau a bek chak hi mu’n paih thai tingun, I masang uh a kitaihsiekna um ahin, thuokhat takin tai hitiu.

²Chun, Isu, I taksannau siempa leh subukimpa lam chuh en zing hitiu. Amah chun, a masanga lawpna a um ziek chun, zahchâkna chuh ngaidau in, kross achun a thuok a, tichun, Pathien lalchutphah changlam achun a va chu ta a.

³Khutichun, na thagau lam uh a na hung lungkiek uh a, na hung chawlh zieng lohna dingun, a chunga thiltung leh, mi gilote apat a muhdahna a thuokna haw chuh ngaihtuoh tiem u khai!

⁴Gitloh do in, thisan pawt khawp in na pang puou a,

⁵tîlna thu, chate gaih banga na kigaihna thuu khah na na hengilh tau ie! “Ka cha, LALPA thununna chuh dâwn sak lo in um ki’n la, A hilhgaih a na um inle, kithahdah diek ki’n;

⁶LALPA chun a hehpihte chuh a thunun sek a, Cha a a ngaih cheng chuh a zêp sek a puo!” tih hi.

⁷Na thuok uh hi, nangmau thunun na dingin ahi; chate chunga hih bangin, Pathien in na chunguh a a hih ahi. Pa thunun loh cha kuo a um kha leh?

⁸Cha chengcheng lawh sek, thununna chuh lawh lo a na um uh chun chuh, cha tak tak hilo in, zaucha hilo ding na hiu hi?

⁹Zielo chun le, ei thunun dingin, mihing lam ah pate le I nei u kha, ziete haw chuh I zah ngâl uh a. Ziehaw sanga nasazaw chun, I hinna dingun, thagau lama Pa thu thu’n um lo ding I hiu hi?

¹⁰Mihing lama I pateu chun, hun chawmcha khat sung chuh, pha a sak bang bangun ei na gawt sek ngei uh a, himahlele, Pathien chun, eimau mawng phatna ding leh, a thienthona I kikawppih theihna dingun ei thunun zawk sek uh ahi.

¹¹Chun, thununna himhim hi, a pet leh kipah-um in a kilang sek puoh a, thasiet um in a lang zaw sek hi, thuok muolsuoh nung vang le chuh, zie a sawihnem a umte ding chun, gah lungmuon-um tak, diktatna chuh a suoh sak sek hi.

¹²Khutichun, khut zawite chuh chal unla, khûp zawite chuh sukhat sak un!

¹³Kengbai chuh sukpel loh a, sukdam a a um zawk na ding in, na keng uh a dingin lam zang siem un.

¹⁴Mi chengcheng tawh kichama umna leh thienthona delh un, zie thienthona lo chun kuoma’n LALPA mu puo’n au.

¹⁵Pathien hehpihna apat a kiheimang lo dingin kivêng phau un. Na lak uh a kuoma’n, khatna zung bang ahim hung khang dawk a, zie thihna gu a chuh buoina nasatak hun suohdawk sek bang hih hi hiel kiu in.

¹⁶Chun, na lak uh ah, hûka kideihchakna ahim, Esau banga lunggil thanghuoi leh, Pathien zahlo a, a cha upa hihna an khatvei nêk a khawng tawbang hin um hiel kiu in.

¹⁷Zie nung chun, vangsakna chuh muh nuom in, mittui luong kawmin phachuomngai takin hawl mahleh, kisikna hun a muh loh ziekin, nawhmang in a um tai tih, na he ngâl u a.

¹⁸Nang haw vang, tânga meikuong khawih theih, mei a kâng leh, thimna leh meivawmte, huihpite,

¹⁹pengkun gitte leh aw git zakna muna a hung bang uh a kha hung na hi puou hi. Mipite chun aw a zak phet u khan, thu dang himhim a kawmuh a gen beh talo dingin a ngên u a,

²⁰“Ganhingte nasan in tâng chuh a sukkhak uh chun, suong a sehlup a um ding ahiu ui,” tih thupiek khah a thuok thei ta puoh ngâl u a.

²¹A thil muh uh chuh a tizat-um mah mah a, Mosi chun, “Ka lau in, ka kithing nasa mah mah hi!” a ti hiel ahi.

²²Nang haw vang, Zion tâng leh, Pathien hing khawpi, Angel sang tamtak te umna a chuh hung na hi zaw ngâl u a.

²³Chun, Pathien cha masate, kipâk taka kikhawmkhawmte, van a min zik chengcheng te leh, sapchuom mi chengcheng te thutan sak Pathien, mi diktatte thagau suphabukim leh,

²⁴Isu, thugawlh thak palai kawm leh, thisan theh, Abel thisan sanga thu phazaw gen kawma hung na hi zawu hi.

²⁵Thugenpa chuh a na deih lo kha’n lau, chingthei un! Lei a amau haw hilhgaihna thugen ana ngai lote bawn a suohchak loh uh chun, van apat a I kawm u a thu hun gen pa nungngatte hih, suokcha mawh zawsem hitiu!

²⁶Zielai khan a aw khan lei hi a sulîng a, tuhin chuh, “Khatvei chuh, leisiet mai hilo in, van le hun sulîng kit ka,” ti’n a tiem ta zaw a.

²⁷Chun, “Khatvei chuh hun sulîng kit ka,” tih thu hin, thil suktawih theih loh te chuh a um zing theihna dingin, thilsiem haw chuh suklîng leh lakchawna um ding ahi tih suklatna ahi.

²⁸Khutichun, lalgam suklîng zawh loh I chan ziekuh hin kipâk hitiu. Zieziekchun, zah leh ginggek kawmin Pathien kipah lam nasem hitiu.

²⁹Aziek chuh, I Pathien uh hi mi kâktum nuom mei ahi ngâl a.