Read Gangte HEBRAI 2 Bible Online

HEBRAI 2 - Gangte bible

HEBRAI 2

¹Zieziekchun, nakhanga I zak hawu kha phachuomngai taka I khawksak zawksem dinguh ahi, khutilochun kithawlh mang khâi tiu.

²I pileputeu kawma Vânsâwlchâkte manga thugen kha bawn a dik a, chun, sukkhelhna leh thu ngaih lohna chun ditthukna a muh ngâl u chun,

³Hiti lâwm lâwma hukdamna lopi hi thahthawt leuhing, bangti’na I suohchak theih mai zên dinguh? Zie hukdamna chuh a tûngin LALPA ngêi manga phuon a hi a, zie chuh a zata chun a dik ngêi hi tih, ei sukdet sak uh a.

⁴Chun, Pathien ngêi inle, melchikna leh thilmak tamtak te hihin, amah deih dungzuia Thagau Thiengtho thilpiek tawh amau haw chuh a hetpih a.

⁵Khawvel thak hung um ding, a chanchin I gen u khah, Pathien in vânsâwlchâkte nuoia vang a kawih puoi.

⁶Himahleh, Pathien lehkha thu khawitak ahim achun zie chuh gen in: “Mihiem hi bang a hi a, aw Pathien, na lunggulh sek a; Mihing chapa hile bang ahi a, na ngaihtuoh sek ahim?

⁷Amah chuh vânsâwlchâkte sanga neukhata nuoinung in na siem a; Lopina leh limbawlna lallukhuk na khuk sak a, Na khutsuok chunghaw achun lawiupa’n na siem kit a;

⁸A kêngpêk nuoi ah bangakai na kawih ta a,” ti’n. Khutichun, bangakai a nuoia a kawih ziekin, a nuoia kawih loh bangmah a nei puoi. Himahleh, tuhin vang chuh, thil chengcheng a nuoia um in I mu nai tadih puou hi.

⁹Himahlele, Isu chuh, Pathien hehpihna zieka mitin a dinga thi a hih theihna dingin, chawmkhat sung maia dingin vânsâwlchâkte sanga nuoinung zaw deuha siem in I muu hi. Tuhin vang chuh, thihna thuokna zieka lopina leh limbawlna lallukhuk chuh khuk saka um in I mu zaw tau ahi.

¹⁰Pathien, thil chengcheng siem a, vawpbitpa ding chun, cha tamtak a lopina kikawppih dingin, Isu thuokna bukim zieka siem chuh hih ding him a hi ngâl a. Isu mawng chuh Hukdamna a puilut pa khah a hi ngâl a.

¹¹Amah chun mipite chuh a gitlohnateu apat chun a hih thiengtho ta a, amah leh sukthientho a umte chuh Pa khata pawt a hi ngâl u a. Zieziekchun, Isu chun amau haw chuh “Suohpihte,” tih chuh a zakcha puoi.

¹²Amah chun Pathien kawmah: “Na thilhihte chuh ka suohpihte kawmah gen dawk ing ka ting, A kikhawp khawmnau achun hun pakcha ding ka hi,” ti’n.

¹³Chun, “Pathien achun ka taksanna ngachak ing ka,” le a ti a. Chuleh, “Entiem u, kei leh, Pathien ei piek chapangte hi,” a ti kit a.

¹⁴Tichun, chapangte hi, phehlevo leh thisan neite ngêi ahiu a, zie tawbang mah chun Isu ngêi chule a mihiem hihnau chuh nei in, amau haw tawbang chuh a hung hi ta a. Zie chuh, thihna chunga thunei, Setan thahatna chuh a thihna zieka a sukmangthai theihna ding leh,

¹⁵Thih lauh zieka damsung suok a um cheng chengte chuh a hukdawk theihna dingin.

¹⁶A panpih sekte chuh vânsâwlchâkte ahi sek hiel puou a, “Abraham suonte chuh ahiu hi a panpih sek te chuh!”

¹⁷Khutia chuh, mipite gitloh ngaihdam a hih theihna dinga, Pathien kawma a zenviel nasepna a chuh, Thiempu Lienpen, mi lainat thiem a hihna dingin, suohpihpa bang a hung um ahi zawi.

¹⁸Amah mawng chun, thepna tuoka, a na thuok tâk ziekin, thepna tuokte chuh a panpih thei hii.