Read Gangte HEBRAI 3 Bible Online

HEBRAI 3 - Gangte bible

HEBRAI 3

¹Khutichun, suohpih thiengtho, van sapna chang khate haw, I taksan uh Sawlchak leh Thiempu Lienpen, Isu chuh ngaihtuoh un.

²Pathien inkawte chengcheng laka Mosi taksan a um guol khan, amah chuh zie nasep sem dinga guotpa, Pathien lam achun a taksanum hi.

³insung kaihuoi chuh a inkawte sanga a limbawl zawk bang un, amah chuh Mosi sanga lopi zawk semna mu kham a ngaih a hi ta ngâl a.

⁴Zieziekchun, In tincheng chu mi kuo ahim in a sak ahi a, himahleh, thil cheng cheng bulpi chuh Pathien ahi.

⁵Chun, tunung a Pathien in thu a gen ding haw chuh gen dawkin, Mosi chuh Pathien inkawte laka zenviela pang taksanum tak a hung hi tai.

⁶Krista vang chuh, Pathien inkawte laka Chapa taksanum ahi. A inkawte chuh eimau haw hi I hiu a, a tâwp chana I hansannau leh, I kinepnau leh I suonnau hi dettaka I tukchak phawt u chun.

⁷Khutichun, Thagau Thiengtho gen guol mah in, “Tuni a aw na zak u chun,

⁸Gamthip a patep a um a, A suklungnat lai guol u khan, Na lung uh sukhauh kiu in;

⁹Zie tak achun na pulepateu chun, ei patep u a, Kum sawmli sunga Ka thilhih haw chuh mu zing ngâl in.

¹⁰Khutichun, zie suon haw chung achun ka lungkim ta puoh a, a kawm u ah: A lunggil un a ngai khiel zing sek u a, ka lampite le a he puou, ka ti a.

¹¹Ka thupiekte zawp ding le a niel zing tau hi, ka ti a, ka lungnat a ka kihâksiel guol khan, ‘Ka chawlhna achun lut hiel puo’n au!’” ti’n.

¹²Suohpihte, chingthei un, khutilochun, Pathien hing chuh puksan dingin, na laku ah khatto chungah ginchak lohna lungthim phalo hung um kha’na,

¹³“Tuni,” a tih sung u hin, ni chengin kitîlkhoh tuoh zing zawu in, khutilochun, na lak uh a khatto hi, gitloh thepthak a, lungkhauh deuh deuh hung um kha’n lau.

¹⁴Krista tawh pang khawmte I hi ta ngâl u a, a tûng pên a I kimuonpih u khah, a tâwp tienga dettaka I tukchak phawt u chun.

¹⁵“Tunia a aw na zak u chun, A suklungnat lai guol u khan, Na lung uh sukhauh kiu in,” a tih sung cheng hin.

¹⁶Himahleh, mi khenkhat chun za zing ngâl in a sulungna sek uh a, zie te chuh Aigupta apat a Mosi puih dawk ahi vek puou hi.

¹⁷Himahleh, kum sawmli sung a lungkim lohna khah kuo te chung ahi? Sukhielte, a luong uh thaleka kitalte chungah khan hilo ahim?

¹⁸Chun, thu ngailote kawm ngâllo achun, kuo kawmah e, “Chawlhna ka piek ding gamtiem achun lut hiel puo’n au,” ti a a kitiem khah?

¹⁹Khutichun, ginchak lohna ziekin a lut thei ta puou hi tih I heu hi.