Read Gangte HEBRAI 4 Bible Online

HEBRAI 4 - Gangte bible

HEBRAI 4

¹Zieziekchun lau hitiu, khutilochun, a chawlhna lutna ding thutiem chuh ana um zing ngâl in, na lak uh a khatto ting lo in hung um kha vei un lau.

²A kawmuh a gen guol mah khan, Chanchin Pha chuh eihaw kawma le gen ahi ngâl a. Thu kigen chuh a za nau a, himahleh, amau dingin bangmah phatchuomna a um puoi; a zak u chuh taksanna a a pawm loh ziek un.

³Ei uh gingchate hih a chawlhna achun I lut tau hi. Lei kisiem tûng apat a sep zawh sa himahleh, Ka lungnat a ka kihâksiel bang khan, ka chawlhna achun lut hiel puo’n au.

⁴Khawitak mun ahim achun, ni sagih thu hiti bang hin a gen a puo, “A ni sagih ni chun, Pathien chuh a nasep chengcheng apat chun a châwl ta a,” ti’n.

⁵Zie thu mah chuh gen in, “Chawlhna dinga ka piek ding gam achun lut hiel puo’n au,” a ti kit a.

⁶Khutichun, mi khenkhat zie chawlhdamna a lut ding thutiem a um nak lai ziek leh malaia Chanchin Pha gen masate a ginchak loh u a, a lut loh ziekun,

⁷Hun sawttak nung in David mang in, Tuni ti’n, ni khat a guot kita. “Tuni hin a aw na zak u chun, Na lunggil uh sukhauh kiu,” ti a kigen bang khan.

⁸Joshua’n mipite ana chawlhdam sak hita leh, zie nung chun ni dang thu chuh gen lo ding ahi.

⁹Khutichun, Pathien mite ding chun, ni sagih ni a Pathien a chawlh bang khan, chawlhni chawlhni ana um zing hi.

¹⁰Tichun, kuole, Pathien in a tiemsa chawlhna mu ta chuh, Pathien ngêi, a mah nasepna apat a a chawlh bang khan, a nasepna apat chun châwl tei ina.

¹¹Zieziekchun, kuo ahim khat zie ginchak lohna etsakna banga um a, a puk loh na dingun zie chawlhna a lut ding chun phachuomngai hitiu.

¹²Pathien thu hi a hing a, thil a hih thei a, chemzâm hiem tuok sangin le a hiem a, hinna, thagau leh guh kisuktuohna, theng sukhen thei hiela sun thei ahi; chuleh, lunggel leh lungthim ngaihtuohte hetuok pai zieng thei ahi.

¹³Thil kisiem, amah mitmuh a kilanglo bangmah a um puoi; I chanchin uh I tutna ding pau mitmuh achun, bangakai hi, ngawnchang leh kihawngsa a um ahi ngâl a.

¹⁴Tichun, van haw cheng zawt pai a, chieh pa, Thiempu Lienpen, lopi tak, Isu Pathien Chapa chuh I neih ziekun I thu taksan u hi pawm chak hitiu.

¹⁵Thiempu Lienpen, I hatlohnau ei hetpih a ei thuok pih khalo nei I hi puoh ngâl u a; eihaw guola bangakaia thepna tuoksa, hilele, gitlohna bei, nei I hi zawu ie.

¹⁶Khutichun, zahngaihna I muh theihna ding u leh, panpih I ngaih nau a a hun taka lungsietna panpihna I muh theihna dingun, lungsietna lalchutphah chuh hâng takin naih hitiu.