Read Gangte HEBRAI 5 Bible Online

HEBRAI 5 - Gangte bible

HEBRAI 5

¹Thiempu Lienpen ding chuh, gilote zieka thilpiek leh kithawihna a lat khawm theihna ding u a mihiem lak apat teldawk ahiu a; Pathien kawma a thasang u a zenviel dinga pan sak ahiu hi.

²Amau mawng chule, lam chuom chuom a hatlohna a dim a hiu a, zieziekchun, bangmah helote leh, thil hihkhielte chung achun a zahngai sek ui.

³Amau mawng chule hatlohna a dim a hih ziekin, mi dangte ding maia gitloh thawihna lân lo in, amah gitloh thawihna ding ngêi inle a lân sek hi.

⁴Kuoma’n thiempu Lien hihna zieka limbawlna chuh amau in a kilak kha puou hi. Pathien sapna ziek chauh in mi chuh Thiempu Lien in a pang sek ui, Aron a hih mah bang in.

⁵Khutibang mah in, Krista chule, Thiempu Lienpen a kisiem dingin amah a kisulopi, puoi, zie malak chun: “Nang vang ka chapa na hi ie, Tuni hin ka hun hin na hii,” ti a, a kawma gen pa khan a suklopi zawk ahi tai.

⁶Chun, mun dang khat mah ah, “Nang vang Melkisedek umdan banga kumsawt a Thiempu na hi ie,” ti’n a gen a.

⁷Amah chun, phehlevo a a umlai nihaw khan, thihna laka amah hukdawk theipa kawm achun hahpi a kiko leh, mitthi thiek kawmin, pauchamna leh ngetna a nei a. Tichun, a kingaihniem ziek leh, a kipumpiek ziek chun, Pathien in a ngaitha ta a.

⁸Chapa hiel himahlele, thuoknate apat chun, thu awihna chuh a sin ta a.

⁹Tichun, bukim taka a um nung in, a thu zawpte chengcheng dingin, hukdamna bulpi a hung hi tai.

¹⁰Tichun, Pathien in, Melkisedek guola Thiempu Lienpen dingin a guot ta a.

¹¹Amah chungchâng thu ahin gen ding tamtak ka nei u a; himahleh, na hettheih loh ziekun, na kawm u a genchet le a haksai.

¹²A hun ngaihtuoh vangin, sinsakna nasem thei dinga kilawm na hi tau a; himahleh, Pathien thudik abul apat hun hilh ding mi mamawh kit na hitau maw? Buh gum hilo a, nawi sen nuom nalai bangte na hi tau hi!

¹³Kuole, nawi chep nalai chuh, chapang ahi nalai u a, thil dik leh diklo thu ahin bangmah hetkalna a nei nai puou hi.

¹⁴Buh gum vang chuh piting sate, sielepha hekhen thei dinga a ngaihtuohnau sawizawi te a ding ahi.