Read Gangte HEBRAI 6 Bible Online

HEBRAI 6 - Gangte bible

HEBRAI 6

¹Khutichun, Krista thubul kihilhna lam chuh dâwn talo in, pitinna lam zuon hitiu; thilhih thisa apat a lungheina leh, Pathien lama taksanna,

²baptistma te leh, khut ngak thu te leh thawhkitna thute leh, kumsawt a vaihawmna thu dân lam sinsakna leh, suongphuh phut kit ta lo in.

³Malam zuonin chieh hitiu! Pathien in pha a sak chun, zie chuh hih tei hitiu.

⁴Chun, khatvei khawvak changsa haw chun, van thilpiek chuh a tep kha tau a; Thagau Thiengtho chang ahi tau a,

⁵Pathien thu pha, tunung a hung um ding, thilhih-theihna chuh tepkhasa a hi tau hi.

⁶Zieziekchun, amau haw chuh a puk uh a a hih chun, a lungheina dingun tundin kit guol ahi puou hi, Pathien Chapa chuh amau dinga khêndên sawn kita, sumuolpho a hih ziekun.

⁷Lei, a chunga guoh tui kie chuh na dâwn zing a, mi’n a sep sakte dinga ancheh-lohing hun gahsuoh sek chuh Pathien in hamphatna a piek ahi a.

⁸Himahlele, hamlingnei leh buolhaw a hung keh chun chuh, hansie buokkhum a hung hi sek a, a tâwp achun hâltum ahi sek hi.

⁹Himahlele, suohpihte haw, khutibang thil chuh gen mahleng, nanguh vangin chuh zie sanga hamphatna phazaw, na hukdamnau tel ngêi chuh na nei ui tih ka hun ginchak uh na hiu hi.

¹⁰Na nasep u leh, a min zieka hehpihna na latsak sek uh, mithiengthote na zenvielnau, tu tieng a le na hih zing uh chuh hengilh dingin Pathien chuh mi diktatlo a hi puoh ngâl a.

¹¹Himahlele, a tâwp tienga kinepna bukim mu dingin, na taimat ngêi mah uh a taimat suoh dingin ka hun ti mah mah ui.

¹²Chun, thadah lo a, taksanna leh thuokhatna vanga Pathien thutiem mute hizaw dingin ka hun deih uh na hiu hi.

¹³Pathien in Abraham kawma thu a hun tiem lai khan, a thutiemsa chuh hih ngêi dingin a kitiem a. Amah sanga lienzaw a um loh ziekin, amah min ngêi mang chun thu a tiem ta a.

¹⁴“Thawnlo in vang hun pie tei tei ing ka ting, suon tamtak le hun pie ngêi ngêi ing ka,” ti’n a kihâksiel ta a.

¹⁵Khutichun, thuokhat taka a thuok muolsuoh nung in, thil tiem chuh a mu ta ngêi a.

¹⁶Mihiemte hin a sang u a lienzaw sâm in a kihâksiel sek uh a, kinielna tincheng sukcham na dingin le, kihâksiel hi a tawpna ahi sek hi.

¹⁷Khutichun, Pathien in thutiem goluoh dingte kawm achun, a thilhih ding chuh a sukdanglam loh ding zie chien taka a suklat nawp ziekin, a thil tiem haw achun a kihâksiel sek ahi.

¹⁸Zie chun then kit theih loh thil nih a um ta a, zie thu achun le Pathien chuh a lepchieh ngeilo ahi. Khutichun, eihaw, amah a kihumbitna mute hin, I masang uh a kinepna um chuh tuchak dingin, nasa taka sukhat in I um tau hi.

¹⁹Zie kinepna chuh I hinnau thik-âi guolin I nei u a. Zie chuh a bita, a det a, van Ho-In puonzak thiengtho sungnung pên tiengin a lut tai.

²⁰Zie tak achun Isu chuh, Melkisedek umdan guola, kumsawt a Thiempu Lienpen hung hi’n, eihaw thasang in I masang u ah a chieh tai.