Read Gangte JAKOB 2 Bible Online

JAKOB 2 - Gangte bible

JAKOB 2

¹Ka suohpihte haw, I Lalpau Isu Krista, Lopina LALPA chuh taksang kawmin, mi deihchuom nei kiu in.

²Kikhawpna In ah mi, sana zungbuh but, puon hawihtak silh hung lut leu le, chun, mi neilah, puon sie tak silh hung lut leu le;

³Puon hawihtak silh chuh na khawksak zawk uh a, a kawma, “Nang chuh zie mun pha ahin chu’n, nang chuh tak akhun dingin, a hihloh leh, ka keng zul ahin chu’n.”

⁴Na tih u chun, na lungthim uh a khenchuom nei leh, ngaihtuohna phalo nei a, mi awimawhte hung hilo ding na hiu hi?

⁵Ka suohpih deihtakte, ngaitiem u, Pathien in zie khawvel thila chagahte hi, taksanna lama neizo ding leh, amah hehpihte kawma a gam tiem chuh luoh dinga a tel hilo a hi?

⁶Nang haw vangin mi chagah chuh na sukzahhuoi zawk uh ahi. Mi neizote chuh nanguh hunam a hun bawl leh, vaihawmna In a hun kailut sekte khah ahi puou maw?

⁷Min zahum tak, na kisapnau gensiete khale amau hilo maw?

⁸Himahlele, Pathien lehkhabu ah, “Nangmah na kihehpih bangin, na vengte na hehpih ding ahii,” tih Lenggam dân hi na zawp uh chun, na bawlphau hi.

⁹Amahvang chuh, mi zah chuom na neih u chun, na sukhiel ui, Dan in, dân sukhiel a a hun seh na hih ziekun.

¹⁰Kuo’n le, Dan zawp kim mahleh, thu khata a sukkhelh chun, a bawncha a mawhchang a um a hih tho ziekin.

¹¹“Zawlsai kih,” tipa chun, “Tuolthat kih,” le a ti ngâl a. Khutichun, zawlsai kimahleh chin le, tuol na thah chun, Dan sukhiel na hi himhim tai.

¹²Tichun, suohchak sakna dana vaihawm sak dingte bangin thu gen un la, thil le hih un.

¹³Mi chunga zahngaihna tel lo a hihte chuh, zahngaihna tel lo a vaihawm sak in um ina; himahleh, zahngaihna chuh vaihawmna chung achun a guolzo sek hi.

¹⁴Ka suohpihte haw, mi’n, “Taksanna ka nei hi,” ti mah lele, thilhih a neih loh ngâl chun, bang phatsakna a? Khutibang taksanna chun amah a hukdam thei hi?

¹⁵Suohpihpa ahim, suohpihnu ahim, sangawn a um in, nichenga nek ding tasam ta leu,

¹⁶Chun, na lak uh a kuo a him in, “Thamuong takin chieh inla, lum tak leh vah takin um un,” tiu un la, taksa dinga a thil sinmawh uh chuh na piek loh ngâl u chun, bang phatsakna a?

¹⁷Khutibang mah in, taksanna chuh thilhih nei lo in, amah maia a um chun a thi ahi.

¹⁸A hii, mi kuo ahim in, “Nangin taksanna na nei a, ken thilhih ka nei a; na taksanna chuh na thilhih tello in nei etsak ah, chun, ken ka thilhih in ka taksanna hun etsak ka,” ti maithei na hiu hi.

¹⁹Pathien chuh khat ahi tih, na ginchak a hi maw? na hih pha nai! thitha te’n le a gingchau a, a kithing sek uh a puo!

²⁰Aw mi manloh pa, thilhih tello a taksanna chuh bangmah ahi puoi tih na he nuom hi?

²¹I puu Abraham chun a chapa Isak maichâm chunga a piek lai khan, thilhih ziekin thiem a chang hilo maw?

²²Taksanna chun a thilhih tawh a sem khawm a, chun, thilhih ziekin, a taksanna chuh a bukim tai tih na hêi.

²³Pathien lehkhabu’n, “Abraham in Pathien a gingcha a, zie chuh a diktatna a san sak ahi,” tih thu khah, a hung guitung a, tichun, Pathien guolpa a kiminvawh in a hung um ta a.

²⁴Taksanna ziek mai hilo in, thilhih ziek zaw’n mi’n thiem a chang sek ui, tih na he tau hi.

²⁵Khutibang mah in, Rahab, nawhchizuoknu khan le, Israel te laka enthate khah a na lawp a, lampi chuom a a sawl mang lai khan, thilhih ziekin thiem a chang hilo maw?

²⁶Thagau tello in, sapum chuh a thi ahi, khutibang mah in, thilhih tello in, taksanna chule a thi ahi.