Read Gangte 1 PETER 2 Bible Online

1 PETER 2 - Gangte bible

1 PETER 2

¹Khutichun, gitlohna chengcheng te, dawha a kilemna chengcheng te, gukhahnate, kimitthipna te, gensietna chengcheng te,

²Haihsan unla, chasen, piengthakte bangin, thagau lam nawitui, bangmah tawh hel loh, na dâwn uh a, na hung khanlet uh a, hukdam na hung hih theihna dinguh chuh utchau in.

³Pathien Lehkhabu chun, “LALPA chuh mi lungsiet thei tak ahi tih a gen chuh nangmau mawng in na mudawk ta ngâl uh a,” ti a a gen guol khan.

⁴LALPA, Suong Hing, mihiemte’n thil manloh banga a nawlh uh, Pathien ngaih a vang chuh ten dawk leh lul tak kawm achun hung un.

⁵Chun, nang haw le, suong hingte guola, thagau lam ho In a sak dawkin na um tau a, Isu Krista zâla Pathien pawm tâk, thagau lam kithawihna lân dinga, thiempu thiengthote banga na zenviel theihna dingun.

⁶Zieziekchun, Pathien Lehkhabu achun, “Ngaitiem u, Zion achun a ning a suong phachuom pen, ten dawk, lul tak chuh ka kawih ahi; kuole, amah gingcha ta chuh muolpho hiel puo’n au,” tih zik ahi.

⁷Khutichun, nanguh a gingchate dingin, zie suong chuh lul tak ahi, a gingcha lote dingin vang chuh: “In sate suong deih loh khah, Zie mawng chuh a ning a suong phachuom pen a hung hi tai,” a tih kha.

⁸Chun, Pathien Lehkhabu mun danga, “Pukna suong leh dalna suongpi tawh” ti a a gen guol khan. Thu chuh a taksan loh ziekun a kipalpai sek uh a; zie chuh, Pathien in amau haw dinga a phasak chuh ahi.

⁹Himahlele, khawthim apat a pawt a, a vak maktak a lut dinga hun sampa phatna chuh na etsak theihna dingun, nanguh vang nam ten, leng thiempute, nam thiengtho, Pathien mite ngêi; na hung hi tau hi.

¹⁰Ma khan, Pathien mi na hi puou a, tuhin chuh, a mite na hung hi tau a; makhan chuh, Pathien zahngaihna na mu puou a, tuhin chuh, Pathien hehpihna na mu ta ngâl uh a.

¹¹Deihtakte, malzin leh khuolzin na hih ziekuh hin, thagau do sek pa phehlevo utnate hi haihsan dingin ka hun nget na hiu hi.

¹²Jentel te, laka na tawihzieu chuh kilawm tak hi hen, khutichun, thil gilo hihte guola a hun gensiet sek nau achun, na thilhih phat uh a muh hawu ziekin, veh a a um tieng u leh Pathien sulopi thei un au.

¹³LALPA zalin, mihiem, thuneitute nuoi achun kitulut un, thunei pên, leng lien kawm ahim,

¹⁴thil gilo hihte gawt ding leh, thilhih phate pakcha dinga a guot, gam vaipawte kawma le.

¹⁵Mingawlte thugen ngawlhuoi takte, thilpha hih a na sukthip uh hi, Pathien deihlam tak ahi ngâl a.

¹⁶Zalen na hiu a, himahlele, na zalennau chuh gitloh khuhna’n mang lo in, Pathien suok a umna’n mang zawu in.

¹⁷Mi chengcheng limbawl un. Suohpih tapoh chuh hehpih unla, Pathien lau unla, Lalpen chuh limbawl un.

¹⁸Suokte haw, ginggek in, na puteu thu thu’n nung un; mipha leh mi nunnemte kawm mai ah hilo in, mi nunsiete kawmah le.

¹⁹Mi’n, Pathien deih bang a hetthiem ziekin, thuok loh ding ding thuok a, a lungkham chun, zie chuh Pathien pawm tâk ahi.

²⁰Na gitloh uh a, khutthak na thuok uh chun, thuokhat mahleu chin le, pahchakna banga na lawh sek uh? Amahvang chuh, thil na hih phat ziekuh a thuok a, thuokhat taka na um uh chun, zie chuh Pathien pawm tâk ahi.

²¹Zie tawbang hih dinga chuh Pathien in a hun sap na hiu a puo; Krista ngêi khan le nang haw sika thuokin; a nunga na zuih dingun, etkal ding a hun nutsieh na hiu hi.

²²Amah chun thil a sukhiel puoh a, a kama le lepchieh thu a pawt ngêi diek puoi.

²³Mi’n a gaih inle, a gai thuk puoh a, a thuok lai inle, a vau diek puoh a, himahlele, a kinepna chuh Pathien, diktaka hih sek pa achun a kawih zaw sek hi.

²⁴Gitloh lama thi a, diktatna lama I hin theihna dingun, Krista mawng chun kross lêk a khan a sapum in I gitlohna hawu a puo a, amah kizêpna kigawlh haw chun sukdam in na um tau hi.

²⁵Belam mang guola mang na hiu a, himahlele, tuhin vang chuh, na thagau uh chingpa leh vawppa chuh zui dingin a kawm lam achun na kîkkit tau hi.