Read Gangte 1 PETER 4 Bible Online

1 PETER 4 - Gangte bible

1 PETER 4

¹Khutichun, Krista’n taksa ngeia a thuok ziekin, nanguh le zie tawbang ngaihtuohna chuh nei in, kisuhat un: kuole, taksapum ngeia thuoksa te chun gitloh a haihsan sek ngâl a.

²Zieziekchun, tu a kipat hin, zie leisiet a na hin sung chenguh chun, Pathien deihlam a um in, mihiem utna banga um ta lo in hing un.

³Na hunteu chuh Jentel te nawp lam hihna’n leh, hûkna haw a le, sapum utna haw a le, uain hehna haw a le, zu mun lawpna a le, zu nekkhawmna a le, milim hona, muhdahum taka umna’n tuma cheng khah a hun tai!

⁴Ziehaw achun, amau haw nawpsak bawl takluot banga na bawl lohnau ahin mak a hun sau a, a hun gensiet sek uh ahi.

⁵Amau haw chun, mihing leh mithite ngaihtuoh dinga kisazosa, Pathien kawm achun a chanchin uh hun gen ding ahiu hi.

⁶Taksa a um mihiemte guola vaihawm saka a um u a, thagau a Pathien banga a hin theih na ding u a a kawm u a chanchin pha gen a um ahi.

⁷Himahlele, thil chengcheng tawpna ding chuh a nai ta a. Zieziekchun, na paucham theihna dingun, lungthim diktak pu’n, chingkieu in um un.

⁸Bang cheng sangin, gunchuh takin kihehpih tuoh chiet unla, hehpihna’n gitloh tamtak a melhkhuh thei ngâl a.

⁹Phunchiek lo in, kitunsak tuoh unla;

¹⁰A mitakip in, thilpiek na muh dungzui un, Pathien lungsietna tincheng vawp sawntawlawi phate bangin, zie chun kizenviel tuoh chiet un.

¹¹Mi kuo’nle, thu a gen chun, Pathien thu bangin gen hen, mi kuo’nle a zenviel chun, Pathien in utna a piek dungzui in zenviel hen; khutichun, Isu Krista vangin Pathien chuh thil bangakai ah limbawl in um thei ina; lopina leh vaihawmna chuh kumkhuotuong in amah a ahi ngâl a. Amen.

¹²Deihtakte haw, na lak uh a patepna haksa tak hung um, nangmau etchetna dinga na chunguh a hungtung hi, thil bang ahim khat, um ngeilo thil hungtung guolin, maksa kiu in.

¹³Krista thawkna thuokpih te na hih ziekun, kipâk zawu un; khutichun, a lopina a hung kilak tieng leh, nanguh le lawp takin um thei unlau.

¹⁴Krista min zieka hosiet na hih uh chun, na hamphau hi, zie chuh lopina Thagau, Pathien Thagau ngêi chuh na chungu ah a um hi tihna a hi ngâl a.

¹⁵Himahlele, na lak uh a kuoma’n, tuolthat a hih ziekin ahim, gucha a hih ziekin ahim, thil gilo hih a hih ziekin ahim, mi dangte thilhih chawkbuoi a hih ziekin a him in thuok kihen.

¹⁶Himahlele, Kristien a hih ziekin thuok mahleh, zakcha kihen; Krista minpu na hih ziekuh chun, Pathien pakcha zawu hen.

¹⁷Vaihawmna chuh pat a hun ta a, Pathien mite chung ahin pat hi ding ahi. Eihaw chunga pat a hih chun, Pathien apat a Chanchin Pha gingcha lote tawpna ding chuh bang tawbang phet a hi ta dem!

¹⁸Pathien Lehkha thu’n, “Mi diktatte bawn, hukdam a hih hâm hâm uh chun, Pathien khawksalo leh mi gilote chun, khawia a mai uh lâkdawk ding ahi ta ding um?” a tih guol khan.

¹⁹Zieziekchun, Pathien phasak lam banga thuokte chun, thilpha bawl in, a thagau uh chuh a Siempa taksanum tak kawm achun vawp sak hen.