Read Gangte 2 PETER 2 Bible Online

2 PETER 2 - Gangte bible

2 PETER 2

¹Malai khan le, mite lak achun thiemgau lêmte a um sek uh kha, zie tawbang mah chun, nang haw lak ah le, sinsaktu diklote hung pawt ding ahiu hi. Khutichun, sietna, thugin diklo hun puo lut un tin; amau haw hukdampa LALPA ngêi chuh kizuksan in, amau haw chung ngêi ah, kintaka manthaina hun tunsak un au.

²Khutichun, mi tamtakin a hûkna lam uh chuh hun zui un tin, amau haw ziek chun, Thudik Lampi hi gensiet in hung um ina.

³Chun, sumduh ziekin, lepchieh thu’n sumkawlveina’n hun mang un tin; himahlele, masang apat a a chungthuu tanna ding chuh guot zawhsa ahi ta a, amau haw hihsie ding pa chu le a ipmu diek puoi!

⁴Chun, Vânsâwlchâkte’n thil a sukkhelh lai uh khan, Pathien in a hâwi puoh a, gawtmun ah a paih lut vek a, a chungthuu chuh vainung leh tan sak dingin a sit a, kawkhuk thim ah a khum tai.

⁵Pathien in malai khawvel khah a hâwi puoh a, Pathien limsak lo te umna khawvel achun tuisang let sak in; diktatna thugen, Noah leh mi dang sagih chauh chuh a hukdam ta a.

⁶Pathien in Sodom leh Gomorra khawpi chuh thiemmawh chan sak in, mei in a sumangthai ta a, tichun, Pathien khawksaklote chunga thil hungtung dingte etsakna dingin a hun mang ta a.

⁷Himahlele, mi hûkte nunlekhan phalo takte zieka lungkham mah mah, Lot, mi diktat chuh a hukdawk ta a.

⁸Zie mi diktat pa chuh a lak uh a um in, ni chenga a thil phalo hihteu chuh a muh leh a zak chun, a suna mah mah sek ngâl a.

⁹Khutichun, LALPA chun amah khawksakte chuh thepna apat hukdawk dân leh, mi nunsiete chuh Vaihawm Ni a ding chun gawt kawma sit dân a hêi;

¹⁰Taksa lama utchakna thanghuoi hihte leh, vaihawm sakna musitte vang chuh, Vaihawm Ni a dingin gawt kawma sit dân a he zawsem hi. Zie tawbang sinsaktu diklote chuh, ngawl hân leh amah kiletsakte ahiu a, chunglam lopina changte nasan le zahchâk lo in, a gensie zaw sek ui.

¹¹Vânsâwlchâk, hatna leh thilhih theihna neite bawnin, LALPA ma achun a chungthuu kam zahmawh in a gensie kha puou hi.

¹²Himahlele, zie ganhing lunggelna neilo, mata sukmangthai mai dinga sa a piengte bang hin, thil a hetlohteu chuh a gensie sek ui. Zieziekchun, amau sietna ziekin beimang ding ahiu hi.

¹³A taksa utnau suktai na dinga, sun chang lai taka guolvak a kipei buoi chuh nuom a sak lam uh ahi a; na guolvaknau a a hung tel un, zahchâkna leh muolphona ahiu a, mithepna guolvak a tel a hih sek ziekun!

¹⁴Mit a zawlsai a dim leh, gitloh haihsan theih loh bang a nei uh a; lung det lote a zawl thau a; awhchâkna nei ding him a sinsak a umte ahiu hi. hansie thuok chate ahiu hi!

¹⁵Beor chapa Balaam, lawh deihna zieka thil sukhielpa lampi chuh a hawh tâk ziekun, lampi dik chuh a pet mangsan tau a, a vakmang tau hi;

¹⁶Himahlele, amah chuh a gitlohna ziekin hilhgaih in a um a. Sabiltung pautheilo chuh, mihiem pau in a hung pau a, ngawlhuoi taka thiemgaupa thilhih ding chuh a khap ta a.

¹⁷Ziete haw chuh, tuikhuk tui umlo leh, meibuol huih in a mût lêng viel viel tawbang ahiu hi; amau a ding chun khawthim sah tak chuh kumkhawtuong a ding a sit sak ahi.

¹⁸Thu manloh leh thanghuoi tak takte chuh gen in, gitloh na lak apat taidawk tungte chuh, taksa utchakna lam achun a zawl lut sek ngâl uh a.

¹⁹Amau haw chuh, sietna insung suok hi kawm zing ngâl in, suok pawt ding thu poh mite kawmah a tiem sek uh a, zawh a a umna mah uchun, zie mawng chun suok in a siem sek ahi.

²⁰LALPA leh Hukdampa Isu Krista a hetna ziekuh a, zie khawvel thanhuoinate hi a taih dawk san nung uh a, ziete haw mata chuh a um kit uh a, zawh a a um u chun, a umzieu nunung chuh, a tunga sangin a hung sie zaw ta sek hi.

²¹Diktatna lampi chuh het nunga, thupiek thiengtho, a kawmuh a vawp saka um nungngat sang chun, diktatna lampi chuh a na he kileu, amau dinga phazaw ding ahi ngâl a.

²²“Uicha a luok lam ah a kîkkit a, vawkpi kibuol ngimsa le, buonthuok laka kibuol dingin a kîkkit hi,” tih paunak diktak tawbang hi a chunguh a hung um ahi tai.