Read Gangte 2 PETER 3 Bible Online

2 PETER 3 - Gangte bible

2 PETER 3

¹Deihtakte, tu a na kawmuh a ka hun zik hi, ka lehkhathâk a nih veina ahi tai. Zie lehkhathâk te nih akhan, zie thilte haw hi hun hetnawnsak kitin, na lunggil u ah ngaihtuohna thieng tak hun chawhthawh kit ka guot ahi.

²Malaia thiemgau thiengthote thu gen leh, LALPA leh Hukdampa apat a thupiek, na sawlchakteu in a hun pieksawn uh khah na hetzing uh ka nawp a hii.

³A masapen in, ziehi heu in, ni nunung achun, mi, a hinnau amau deih banga puih manga umte hung kilang ding ahiu hi. Ziete haw chun hun nuihsan un tin uh,

⁴“A hungkitna thutiem chuh khawia um a hi ta’m? I pulepateu chuh a na thi zo tau a, himahlele, thil chuh leisiet siem tunga a um ngei ngei in a um zing a puo!” hun ti’n au.

⁵Ziehaw hi hesa sa’n, a kihetmawh sak sek ui: Pathien thu’n, malai in vante a na um uh a, leisiet hile tui apat leh, tui laka um khawm in a na um a;

⁶Zielai a leisiet um chuh tui in a na chup mang ta a, a mangthai tai tih hi.

⁷Himahlele, tu a van leh leisiet umte hi, zie Pathien thupiek mah chun, meia sukmangthai dinga sit a hi tai. Pathien khawksalo mite chunga vaihawmna ni leh, sukmangthai ni a dinga sît a um a hi tai.

⁸Himahlele, suohpihte, zie thu kamkhat hi hengilh kiu! LALPA ngaih chun ni khat hi kum sangkhat tawbang ahi a, kum sangkhat hile ni khat tawbang phet ahi, tih hih.

⁹Mi khenkhat in, LALPA chuh muong a sak bangun, a thutiem hih ding chun a muong hiel puoi. Kuomah manthai deihlo a, mi chengcheng, a gitlohnau apat lunghei dinga deih zaw’n, nangmau haw zieka lungdieh a hi zaw ie.

¹⁰Himahlele, LALPA Ni chuh gucha bangin hungtung tei ina. Zie Ni chu leh, vante chuh nasa taka gi’n mangthai in tin; van a thilte chuh katum in sukmangthai in um intin, chun, lei leh a sunga umte chengcheng hi hung bei vek ina.

¹¹Zie thil haw chuh khutibanga chuh mangthai suok ding ahi tih na het ziekun, Pathien ni khuo hungtun phat ding chuh,

¹²Kinem leh hah nawpa nuom a na ngak lai uh hin, umdan thiengtho leh, Pathien khawksakna lam achun, bang tawbang mi na hi ding u leh? Zie Ni khuo a tun ziek chun, vante hung kang in, mangthai intin, thil bulte haw le meia hâltum in um ta’n au.

¹³Himahlele, Pathien thutiem; van thak leh lei thak, a sunga diktatna um ngêi chuh, ngak in I um zawu ahi.

¹⁴Zieziekchun, deihtakte haw, khutibang Ni khuo chuh kinem na hih ziekun, buok beklo leh paulap beia, lungmuong taka na um uh a hun muh theihna dingin, thatnawp suoh un.

¹⁵Chun, I Lalpau thuokhat zie chuh, hukdamna dinga hunlemchang a hun piek bangin ngai un; I suohpihpau deihtak Paul in le, a kawma Pathien in chitna a piek dungzuia, na kawmuh a a hun zik bang khan.

¹⁶A lehkhathâk chengcheng achu zie thu haw hi a hun gen sek chuh ahi. Ziehaw achun, thu het haksa tak tak bang a um sek a, ziehaw chuh miching lo leh, mi lunglawngte’n, Pathien Lehkhabu thu dang a ngaih kâwi bangun, diklo takin a hilhchien sek u a. Khutichun, amau leh amau a kisukmangthai lawh sek ui.

¹⁷Khutichun, suohpihte, nangun zie thu chuh na na het masak ziekun, chingthei un, khutilochun, mi gilote diklohna a puih manga um in, a detsa puk kha’n lau.

¹⁸Amahvang chuh, I Lalpau leh Hukdampa Isu Krista lungsietna leh hetna achun na khanglien un. Tuhin leh kumkhuo’n, amah kawm achun lopina um ta hen. Amen.