Read Gangte 1 JOHAN 2 Bible Online

1 JOHAN 2 - Gangte bible

1 JOHAN 2

¹Ka naute, thil na sukkhelh lohna dinguh a zie thu hi na kawmuh a ka hun zik ahi. Chun kuo’n le thil a sukkhelh chun, Pa kawma ei nget sakpa, Isu Krista mi diktat chuh I nei ui.

²Amah chuh I gitlohteu lutchamna a hii; eihaw gitlohna mai hilo in, mi chengcheng gitloh lutchamna le ahi.

³Chun, Pathien thupiekte I zawp u chun, zie achun amah I heu hi tih I kiheu hi.

⁴A thupiekte zawp sam lo in. “Amah ka hêi,” ti chuh mi lepchieh ahi a, amah achun thutak a um puoi.

⁵Himahlele, kuole a thu zawp vang chuh. amah achun Pathien a hehpihna a bukim takzet ahi tai. Pathien tawh pumkhat in I um ui tih zie ahin I heu hi;

⁶“Pathien tawh pumkhat in ka um hi,” ti pên chuh, Krista um bang bangin a um ding ahi.

⁷Deihtakte, thupiek thak vang na kawm u ah ka hun zik puoh a. Thupiek lui, atûng apat na neihsau khah ka hun zik zawk a hii. Zie thupiek lui chuh, atûng apat na thu zaksau khah ahi.

⁸Amahvang chuh, thupiek thak hun zik le hita veng ka ti, a ziek chuh, thudik chuh Krista leh nangmau haw a muh a a um tâk ziekin. Thimna chuh a bei ta a, chun, vak tak chuh a hung vak tâk ziekin.

⁹Amah suohpih haw ngâla, “Khawvak ah ka um hi,” ti pên chuh, tutieng hin le khuothim a um ahi zing hi.

¹⁰Kuole, amah suohpih hehpih chuh, khawvak achun a um zing a, amah achun kisuihna him a um puoi.

¹¹Amah suohpih haw pa vang chuh, khawthim achun a um a, thim lak ah a vakviel a, khawthim in a mit a sukdûk tâk ziekin, a chiehna le a he sek puoi.

¹²Ka naute, Krista min zieka na gitlohnateu ngaihdam a hih tâk ziekin, na kawmuh a ka hun zik ahi hi.

¹³Pate, amah, atûng apat um zing khah na het ziekun na kawmuh a ka hun zik a hi hi. Tanglakte haw, migilo chuh na zawh tâk ziekun, na kawm u ah ka hun zik ahi hi.

¹⁴Ka naute, Pa chuh na het ziekun na kawmuh a ka hun zik ahi hi. Pate, amah atûng apat umzingpa chuh na het ziekun, na kawmuh a ka hun zik a hi hi. Tanglakte, na hat uh a, Pathien thun nangmau ah a um zing a. Mi gilo chuh na zawh tâk ziekun, na kawmuh a ka hun zik ahi kha.

¹⁵Khawvel hi hehpih kiu inla, khawvel a thil umte hile hehpih diek kiu un. Mi kuo’nle, khawvel a hehpih chun, Pa a hehpihna amah ah a um puoi.

¹⁶Khaw- vela thil um chengcheng, taksa utchakna te, mit utna te, chaponate haw hi, Pa a pawt a hi puoh a, khawvel a pawt ahi zaw ngâl a.

¹⁷Khawvel hi, a utchakna haw puma bei kawm zel ahi, himahleh Pathien deihlam hihte vang chuh kumkhuo’n um zing ina.

¹⁸Naute, hun nunung pên chuh a nai tai! Krista dodilpa hung ina tih, na zak uh khah, tuhin le Krista dodilte tamtak a hung pawt tau hi; zieziekchun, hun nunung pên a nai tai tih I heu ie!

¹⁹Amau haw chuh I lak uh apat in a pawt uh a, eihaw tawh I kitimatnau a um loh ziekin. Eihaw tawh kitimatna um hile chuh, I kawmuh a um zing ding a hi ngâl uh a. Himahlele, eihaw tawh I kitimatnau a um puoi tih suklatna dingin, ei taihsan sek uh ahi.

²⁰Krista apat in Thagau Thiengtho thau nuhna chuh na chang uh a, zieziekchun, na bawn un thudik chuh na he tau hi.

²¹Thutak chuh na het loh ziekuh a ka hun zik a hi puoh a, na het ziekuh leh, Thutak achun lepchieh bangmah a pawt kha puoi tih na het ziekun ka hun zik zawk a hii.

²²Isu chuh Krista a hi puoi, tite khela lepchieh kuo a um? Krista dodilte chuh, Pa leh Chapa kilepsan nuomte hi ahiu hi.

²³Kuole, Chapa kilepsan chun Pa le a pawm diek puoi; Chapa awite vang chun, Pa le a pawm ahi.

²⁴Nanguh vangin, atûng apat na thu zak uh khah, na lunggil u ah vawp pha zing un. Zie atûng apat na zak uh khah na vawp zing uh chun, nanguh le, Chapa leh Pa achun um zing unlau.

²⁵Chun, ziehi ahi, Krista mawng in thu ei tiem khah, kumsawt a hinna hih.

²⁶Zie nangmau haw hun puih mang guote thu khah, na kawmuh a ka hun zik ahi.

²⁷Nanguh vangin, Krista kawm apat thau nuhna chang na hiu kha. Zie Thagau Thiengtho chuh nangmau a a um sung cheng, kuomah hun sinsak ngai puon lau. Thagau Thiengtho chun bang cheng a hun sinsak a, thu dik lo hilo in, thudik tak a hun sinsak sek ziekin. Khutichun, Thagau hun sinsaknate chuh zawp unla, amah tawh pumkhat a um hiding na hiu hi.

²⁸Khutichun, naute, amah ah um zing un; tichun, amah a hung kilak tieng leh, hangsan tak leh, zakcha lo a, a hungna Ni a chuh na um theihna dingun.

²⁹Amah chuh mi diktat a hii tih, na hetuh chun, kuole, thil dik hih chuh, Pathien cha a hii tih na het dinguh ahi.