Read Gangte 1 JOHAN 4 Bible Online

1 JOHAN 4 - Gangte bible

1 JOHAN 4

¹Deihtakte, thagau tapoh gingcha kiu, amahvang chuh, thagau chuh, Pathien apat a hih leh, hih loh khuoltuok masa’n, patep un. Thiemgau lêm tamtak khawvel ahin a hung pawt tâk ziekun.

²Zie ahin Pathien Thagau chuh he thei in lau, thagau tapoh, Isu Krista chuh mihing taksa pu’n a hung hi, ti a pang chuh Pathien a hung kipan a hii.

³Himahlele, thagau tapoh, Isu Krista panpih lo chuh, Pathien a hung kuon ahi puoi; zie chuh Krista dodilpa, thagau hung ding na zak u khah ahi a, tuhin le khawvel a um zingsa ahi tai.

⁴Naute, Pathien a na hiu a, ziehaw chuh na zo tau hi, nangmau a Thagau um chuh, khawvel a thagau um sanga chuh a hatzawk ziekin.

⁵Thiemgau lêmte chuh khawvel a um ahiu a, khawvel a um bangin a pau sek uh a, khawvel in a thuu a ngaitha sek uh ahi.

⁶Himahlele, eihaw Pathien a I hiu a, Pathien hete chun I thuu a ngaitha sek ui; Pathien a te lo chun I thuu a ngaitha sek puou hi. Ziehaw achun, thagau dik leh diklo I hekal uh ahi.

⁷Deihtakte, kihehpih tuoh chiet hitiu; hehpihna hi Pathien a hung kipan ahi ngâl a. Kuole, hehpihna nei ta chuh, Pathien hin ahi tau a, Pathien le a heu hi.

⁸Kuole, hehpihna neilo chun Pathien a he puou hi; Pathien chuh hehpihna ahi ngâl a.

⁹Zie taka hin Pathien in a hehpihna chuh I chungu ah a hun sulang tai, amah vanga I hin theihna dinguh a, a Chapa neihsun khawvel a a hun sawl ahin.

¹⁰Ziehi ahi hehpihna chuh; eimau in Pathien I hehpih ui ti ka hi puoh a, ama’n ei uh ei hehpih a, I gitloh uh lutchamna hi dingin, a Chapa a hun sawl hi ti ka hi zaw ie.

¹¹Deihtakte, Pathien in khuti lâwm lâwma ei uh ei hehpih chun, eimau haw le I kihehpih tuoh chiet dinguh ahi.

¹²Kuoma’n, bangtik lai inle Pathien a mu kha puou hi. Himahlele, I kihehpih tuoh uh chun, Pathien eimau ah um zing intin, a hehpihna le eimau ah bukim ta’n a.

¹³Amah ah I um zing ui tih leh, amah chuh eimau ah a um zing hi tih, zie hin I heu hi, a Thagau ei uh ei piek tâk ziek hin.

¹⁴Chun, Pa’n a Chapa chuh khawvel hukdampa dingin a hun sawl hi tih keihaw’n ka mu tau a, mi dangte ka hilh sawn uh ahi.

¹⁵Kuole, “Isu chuh Pathien Chapa a hii,” ti a pang ta chuh, amah achun Pathien a um zing a, Pathien le amah ah a um zing ahi.

¹⁶Pathien in hehpihna eihaw a dinga a neih chuh I heu a, gin le I ginchak uh ahi. Pathien chuh hehpihna ahi a, hehpihna a um zing chuh, Pathien ah a um zing a, Pathien le amah a um zing ahi.

¹⁷Vaihawmna Ni a dinga chuh lau lo a I um theihna dingun, hehpihna chuh eimau ah sukbukim in a um tai; zie chuh, zie khawvel a I hinnau hi, Krista a tawh kibang a hih tak zieka I neih dinguh ahi.

¹⁸Hehpihna achun lauhna himhim a um puoi, hehpihna bukim chun, lauhna a nawhmang zawk sek ahi. Zieziekchun, a laupa achun hehpihna chuh siem bukim in a um nailo ahi, lauhna achun gawtna a um ziekin.

¹⁹Pathien in eihaw ei hehpih masak ziekin, amah I hehpih uh ahi.

²⁰Mi’n, “Pathien ka hehpih ie,” ti’n, a suohpih haw leh, amah chuh lepchieh ahi. A suohpih, a muh sa zing bawn a hehpih loh chun, Pathien a muh khâk loh pa chuh bangti’n a a hehpih theih ding?

²¹Krista kawm apat, zie thupiek hi I nei ui, “Kuo’n le, Pathien a hehpih chun, a suohpih le a hehpih ding ahii,” tih hi.