Read Gangte 1 JOHAN 5 Bible Online

1 JOHAN 5 - Gangte bible

1 JOHAN 5

¹Kuole, Isu hi Krista a hii tih gingcha chuh Pathien cha a hi a, kuole, Pa hehpih chun, cha le a hehpih sek hi.

²Zie ahin Pathien chate I hehpih ui tih I heu hi, Pathien I hehpih uh a, a thupiek haw I zawp uh a hin.

³Pathien I hehpihnau chuh ziehi ahi, a thupiek haw I zawp uh hih; a thupiek haw chuh a giksak puoh ngâl a.

⁴Pathien chate taphawt chun, khawvel a zo zel ngâl a, ziehi ahi, khawvel zawh a muolsuohna chuh, I taksannau hih.

⁵Isu hi, Pathien Chapa ahi tih gingchate ngâllo chun, kuo a khawvel zo sek leh?

⁶Ziehi ahi tui leh thisana hung chuh, Isu Krista ngêi chuh, tui mai in ahi puoh a, tui leh thisan in ahi zawi; hetpihtu chuh Thagau ahi.

⁷Aziek chuh, van achun hetpih thum a um a, Pa tawh, Chapa tawh Thagau thiengtho; zie thum te hi khat ahi.

⁸Chuleh, leichung ah hetpih thum a um a, Thagau tawh, tui tawh, thisan ahi. Zie thum te hi khata um ahiu hi.

⁹Mihiem hetpihna bawn I ginchak uh chun, Pathien hetpihna chuh a hatzaw ngâl a; Pathien hetpihna chuh ziehi a hii, “Ka chapa chanchin ka hetpih tai,” tih hi.

¹⁰Khutichun, kuole Pathien Chapa gingcha ta chun, amah lunggil mawng ah, zie hetpihna chuh a nei hi; kuole, Pathien gingcha lo chun, amah chuh lepchieh a hih sak ahii, Pathien in a Chapa chanchin a hetpih chuh a ginchak loh ziekin.

¹¹Hetpihna chuh ziehi a hii, Pathien in ei uh kumsawt hinna ei pie a, zie hinna chuh a Chapa a um ahi.

¹²Kuole, Chapa nei ta chun, hinna chule a nei a, Chapa neilo chun hinna chuh a nei puoi.

¹³Pathien Chapa min na ginchak u a, kumsawt a hinna na nei ui tih na het theihna dingun, zie thu hi na kawm u a ka hun zik ahi.

¹⁴Ziehi Pathien lama I hansan nau chuh ahii, bang hitaleh, a deih lama I nget takphawt uh, ei na zak sak sek hih.

¹⁵Bang hita leh, I nget takphawt uh, ei na zak sak sek hi tih, I hetuh chun, a kawma I thil nget pên u chuh ei pie tai tih I heu hi.

¹⁶Kuo’n le a suohpih, thihna kham hilo gitlohna hihin mu ta leh, nget sak intin, tichun, Pathien in a ngen pa kawm achun, thihna kham hilo gitlohna hihpa ding, chun hinna pie’n a. Thihna kham gitloh a um a, khutibang lam achun a nget sak ding ka tih ahi puoi.

¹⁷Thil hihkhelh chengcheng hi gitloh ahi a, himahlele, thihna kham hilo le gitloh a um hi.

¹⁸Kuole, Pathien cha hita chun gitloh a hih zingzing ta puoi; Pathien Chapa chun a hum bit sek ziekin. Migilo chun a suna thei puoi.

¹⁹Khawvel pumpi hi zie Migilo vaihawmna nuoi a chuh um hi himahleh, Pathien a I hiu hi tih I he ngâl uh a.

²⁰Chun, Pathien Chapa chuh a hung a, het theihna ei piei tih I heu a, khutichun, Pathien diktak chuh I he tau hi. A Chapa Isu Krista tawh I kipumkhatna zal uh chun, Pathien diktak chu tawh kipumkhat in I hing uh ahi. Amah chuh Pathien diktak a hi a, kumsawt hinna le ahi.

²¹Ka naute haw, milim pathien lak apat chun kikiengkawih un.