Read Gangte VAIHAWMTE 11 Bible Online

VAIHAWMTE 11 - Gangte bible

VAIHAWMTE 11

¹Chun, Gilead mi Jeptha chuh mihat hangsan ahi a, nawhchizuok chapa ahi a, a pa chuh Gilead mi ahi.

²Chun, a pa chun chapa dang le a nei a, tichun, a zi chapa te chuh a hung pitit phet u chun Jeptha chuh a nawhdawk u a, a kawmah, “Nang hin ka pau go luoh thei puo’n la, numei dang tawh a cha na hi ngâl a,” a tiu a.

³Khutichun, Jeptha chuh a suohpihte kawm apat chun a taimang ta a, Tob gam ah a um tai. Chun, Jeptha kawm achun mi manloh taktak haw chuh chiehkhawm in amah chuh a kipawl pih tau hi.

⁴Chun, hiti hi ahi a, zie nung chun Amon suonte chun Israel chate chuh a hun do u a;

⁵Khutia Amon suon te’n Israel chate a hun do phet u chun, Gilead upate chuh Tob gam a um Jeptha chuh sam dawk dingin a chieh tau hi.

⁶Chun, Jeptha kawm achun, “Hung inla, Amon suonte tawh ka kido nau a hin lawiupa’n hung pang tie,” a va tiu a.

⁷Chun, Jeptha chun Gilead upate kawm achun, “Nei muhdah ziek u a ka pa in a kipata nei nawhdawk uh hilo ka him? Bang a ti a na lungzîn phet u a ka kawma hung na hiu hi?” a na ti a.

⁸Chun, Gilead upate chun Jeptha kawm achun, “Zie ziek taka chuh tu ahih na kawm u a hung ka hiu hi, ei zui inla, Amon suonte do na leh Gilead gama um chengcheng te chunga lawiupa a pang ding na hi,” a tiu a.

⁹Chun, Jeptha chun Gilead upa haw kawm achun, “Amon suonte do dinga In lama nei puihkit u a, LALPA’n amau chuh ei zawh sak chun na lawiupau in ei pansak tak tak na’n lau maw?” a ti a.

¹⁰Chun, Gilead upate chun a kawmah, “LALPA chuh I kal u a hetpih hi hen; na thugen bang tak chun hih ngêi ing kau,” a tiu a.

¹¹Khutichun, Jeptha chuh Gilead upate kawm achun a chieh ta a. Gilead mipite chun a luchang ding u leh a lawiupa dingun a na siem tau a. Chun, Jeptha chun Mizpah khuo a LALPA masang ah a thu chengcheng chuh a gen dawk ta a.

¹²Chun, Jeptha chun Amon lengte kawm achun, “Bangti dana hiti ahi ka gam do dinga hung kisa mai na hi ta’m?” ti’n palai a sawl a.

¹³Chun, Amon suonte lengpa chun, “Israel chate Aigupta gam apat a a hung pawt lai u khan ka gam ei lâksak u a, Amon apat in Jabok leh Jordan tiengin, zie gam haw chuh lung-awi takin ei hun pie kit mai in,” ti’n Jeptha palai te chuh a na dâwng a.

¹⁴Tichun, Jeptha chun Amon suonte leng kawm achun palai a sawl kit a.

¹⁵A kawmah, “Jeptha’n hiti hin a tii, Israel chate’n Moab gam a lak sak puou a, Amon suonte gam le a lâksak diek puou hi.

¹⁶Aigupta gam akipat a a hung pawt u khan Tuipi San tiengin gamthip khah a hawh pai u a, Kadesh a tung u a.

¹⁷Israel te’n Edom leng kawmah, ‘Lungsiet takin na gamsung hawh pai ung kau,’ ti’n palai a sawl u a. Himahleh, Edom leng chun a na ngaitha nuom puoh a. Khutibang mah chun Moab leng kawmah a sawl kit u a, himahlele, a na phalsak diek puoh a, tichun Israel chate chuh Kadesh mun achun a cheng tau hi.

¹⁸Tichun, amau chun gamthip chuh a hawhpai u a, Edom gam leh Moab gam chuh a kimvel u a, Moab gam suohlam pang a chieh in, Amon luigal langkhat lam ah a kikulh tau a, Moab gamsung achun vang a lut hiel puou hi. Amon chuh Moab gamgi chin ahi ngâl a.

¹⁹Chun, Israel chate chun Amor mi Sihon kiti Heshbon leng kawmah palai a sawl u a; a kawmah, ‘Ka gam lam u a ka chieh na ding un lungsiet takin na gamsung hawh malam ung ka,’ a tiu a.

²⁰Himahlele, Sihon chun Israel chate chuh a gam hawhpai sak ding chun a taksang zo puoh a; tichun Sihon chun a sepaih chengcheng chuh Jahaz ah a samkhawm a, Israel chate chuh a do tau a.

²¹Chun, LALPA Israel te Pathien chun Sihon leh a mite chengcheng chuh Israel chate khut ah a pie a, tichun, amau chuh a that tau a; khutichun Israel chate chun zie gama Amor mite gam haw cheng chuh a chang suok kêi tau hi.

²²Tichun, Amor te gamgi zul cheng apat a Jabok lui tieng in, gamthip apat Jordan lui tieng in a chang suok vek tau hi.

²³Khutichun, LALPA Israel Pathien in a mi Israel te ding a Amor mite gam chuh a lak sak ahi a, tuhin nangin na luoh kit thei ding a ahim?

²⁴Na pathien Kemosh in na chanvo ding a hun piek chuh na neih ding ahi puoh dem? Zie bang chun LALPA ka Pathien un ka masang u a a delhdawk mite gam chuh ka luoh dinguh ahi.

²⁵Moab leng Zippor chapa Balak sangin na hatzaw a ahim? Amah chun Israel chate kha a chawkbuoi in a do sek ngei em?

²⁶Israel chate chuh Heshbon leh a khawpel haw Aroer leh a khawpel haw leh Amon gamgi zula khawpi haw a kum zathum hiel a um lai u a khah bang zieka a na la lo a um zing na him?

²⁷Zieziekchun na chung ahin thil bangmah ka hihkhiel puoi, nang hi na hi zawi, nei do guot ziekin ka chunga hin thil na hihkhiel ahi: LALPA vaihawmpa chun tuhin Israel chate leh Amon suonte kikal ahin vaihawm hen, a tii,” ti’n.

²⁸Himahlele, Amon suonte lengpa chun Jeptha thuthak chuh a ngaihsak nuom puoh a.

²⁹Khutichun, LALPA thagau chuh Jeptha chungah a hung tunga, tichun Gilead leh Manasseh gam a kân a; Gilead gam a Mizpah a hawh malam a; tichun Gilead gama Mizpah apat in Amon suonte kawm lam achun a chieh a.

³⁰Chun, Jeptha chuh LALPA kawmah a kipautiema, “Amon suonte hih ka khut a nei piek ngêi ngêi chun.

³¹Hiti hi hi hen, Amon suonte zo a ka vaihkit tieng leh bang hileh ka kawtkhaka ei na tuok masapen chuh LALPA a ding hi henla, hâlmang kithawihna dingin mang ngêi ngêi ing ka,” a ti a.

³²Khutichun, Jeptha chuh Amon suonte do ding chun a kuon ta a; tichun, LALPA’n a khut ah a pie ta a.

³³Chun, Aroer apat Minith tiengin a zo a; khawpi sawmnih hiel chuh, chun Abel-keramim tiengin a zo a, tampi a that a. Khutichun, Israel chate masang achun Amon suonte chuh a hung guollah tau a.

³⁴Chun, Jeptha chuh Mizpah khuo a a In chuh a hung tung ta a, chun, ngaitie, a chanu chun khuongcha tawh kithuoh a lam kawm in a na muok a, a chanu neihsun ahi a, amah tihloh chuh chapa leh chanu dang a nei puoi.

³⁵Chun, tihi ahi a, amah chuh a vak muh phet chun a puon haw bawtthêk in, “E khai ka chanu, nei suniem na maizen a, kei ei sulungkham a pang na hi tai; LALPA kawmah ka na kipautiem ta ngâla, zie chuh zukkik thei ka hita puoi,” a ti a.

³⁶Chun, a chanu chun a kawmah, “Hepa, LALPA kawma kipautiem na hih chun, na kama thu pawt bang ngêi in ka chunga na hih mai ding ahi; LALPA’n na melmate Amon suonte chung achun phuba a hun lak sak ta ngâla,” a ti a.

³⁷Chun, a pa kawm achun, “Hiti bang hin ei hih sak in; tha nih sung ei zalen sak inla, tâng chung haw a sukletung a vak in, ka nungak na hi va sun ing ka, kei leh ka lawite haw tawh,” a ti a.

³⁸Chun, a pa chun le, “Chieh ta leh,” a ti a. Tichun, tha nih sung châm dingin a sawldawk ta a; tichun, a lawite chuh tawh a chieh tau a; tâng chung haw achun a nungak lai nite chuh a va sun ta a.

³⁹Chun, tihi a hung hi a, tha nih zawh chun a pa kawmah a hung vaikit ta a, ama’n le a kitiem guol ngêi in a chungah a bawl ta a. Chun, amahnu chuh pasal sukbuok loh ahi a. Tichun, zie chuh Israel te laka dân in a hung um tai.

⁴⁰Khutichun, Israel chanute chuh kum cheng leh ni li sung Gilead mi Jeptha chanu sun dingin a chieh sek ui.