Read Gangte VAIHAWMTE 13 Bible Online

VAIHAWMTE 13 - Gangte bible

VAIHAWMTE 13

¹Chun, Israel chate chun LALPA mitmuh in thil gilo a hih kit tau a, tichun LALPA’n Philistia te khut ah kum sawmli sung a pie dawk ta a.

²Chun, Jora khuo a Dan nam a mi khat a um a, a min chuh Manoah ahi; a zi chuh a chîng a hi a, cha a nei puoi.

³Chun, LALPA vânsâwlchâk numei kawm achun a hung kilak a, a kawmah “Ngaitie, a chîng na hi a, nauvawp khalo na hi; himahleh, hung gai in na tin, chapa hun nei ding na hi.

⁴Zieziekchun chingthei inla, uain leh zu himhim dâwn ki’n la, nek thienglo thil haw le ne hiel ki’n.

⁵Ngaitie, hung gai in na tin, chapa hing ding na hi ngâla; a sam na met ding ahi puoh a, naupang chuh sûl a a um lai apat in Pathien a dinga Nazarit mi hi ding ahi ngâla; amah chun Israel chate hi Philistia mite khut apat in hukdawk ding ahi ngâla,” a ti a.

⁶Khutichun, numei chun a pasal kawmah, “Pathien mi khat ka kawmah a hunga, a mel chuh vânsâwlchâk mel tawbang ahi a, lauh-um tak ahi; khawi gam mi na him ti’n ka dawng khel puoh a, amah chun le a min ei hilh diek puoi.

⁷Amahvang chuh ka kawmah, ‘Ngaitie, gai in na tin, chapa hing inla, tu a kipatin uain leh khamtheih thilte dâwn ki’n la, thil thienglo himhim ne hiel ki’n; naupang chuh sûl a a umlai apat in a thih tiengin Pathien a dinga Nazarit mi hi ding ahi ngâla,’ ti’n,” a gena.

⁸Khutichun Manoah chun LALPA kawmah a ngên a, “Aw LALPA, lungsiet takin Pathien mi na hun sawl khah ka kawmah hungkit henla, naupang hung pieng ding chuh bang ka lawh ding um tih ei hung hilh hen,” a ti a.

⁹Chun, Pathien in Manoah thugen chuh a ngaitha a, numei chuh phul a a chut lai in a kawmah Pathien vânsâwlchâk chuh a hung kilak kita; himahleh, a pasal Manoah chuh a kieng ah a um puoi.

¹⁰Khutichun, numei chuh kin takin a kisa a, a tai a, a pasal a va sama, a kawmah, “Ngaitie, ni khat ni a ka kawma hung pa khah a hungkit tai,” a ti a.

¹¹Tichun, Manoah chuh a kipana, a zi chuh a zui ta a, zie pa kawm lam chuh a zuon tau a, a kawmah, “Nang hih na him numei kawma thugen chuh?” a ti a. Chun, amah chun, “Ka hi,” a ti a.

¹²Chun, Manoah chun, “Na thugen guol tak chun hung tung hen: naupang um dingdan chuh bangti ahi dem, bangti’n ka enkawl ding um?” a ti a.

¹³Chun, LALPA vânsâwlchâk chun a kawmah, “Numei kawm a ka gen haw cheng kha chingthei takin ngaihtuoh hen,” a ti a.

¹⁴“Numei chun Grep gui apat a thil kisiem himhim chuh a nek loh ding ahi a, uain leh kham theih thil himhim a dâwn loh ding ahi; chun, thil thienglo himhim le a nek loh ding ahi; ka thupiek haw cheng khah vawp pha hen,” a ti a.

¹⁵Chun, Manoah chun LALPA vânsâwlchâk kawma chun, “Lungsiet takin a na khawngai inla, nang a ding in kelno khat hun guonggalh sak ing ka,” ti’n a thoh a.

¹⁶Chun, LALPA vânsâwlchâk chun Manoah kawma chun, “Ei thoh leh chin le an vang nelo ding ka hi; hâlmang thilpiek na guonggalh chun LALPA kawma na piek ding ahi,” a ti a. Manoah chun LALPA vânsâwlchâk ahi tih a he puoh ngâla.

¹⁷Chun, Manoah chun LALPA vânsâwlchâk kawm achun, “Na min bang ahim, na thugen bang taka a hung tun tienga ka hun limbawl theih na dingun?” ti’n a dawng a.

¹⁸Chun, LALPA vânsâwlchâk chun a kawmah, “Bang zieka ka min ei dawng na him? Amak ahi tih na hezing ngâla,” a ti a.

¹⁹Khutichun, Manoah chun kelno khat leh thilpiek a hun chawia, suongpi chung achun LALPA kawmah a lân ta a; chun, vânsâwlchâk chun thilmak tak a hih chuh Manoah leh a zi chun a en zing u a.

²⁰Chun, tihi ahi a, maichâm apat a meikhu chuh van lama a zam toh lai chun, LALPA vânsâwlchâk chuh maichâm a meikhu lak achun a chiehto ta a. Manoah leh a zi chun a en zing u a; a mai u a tuol si’n a bawkkhup u a.

²¹Tichun, Manoah leh a zi chun LALPA vânsâwlchâk chuh a mu kit ta puou hi; ziephet chun LALPA vânsâwlchâk ahi tih a heta a.

²²Chun, Manoah chun a zi kawmah, “Pathien mu I hih ziekin thi ngêi ding I hi,” a ti a.

²³Himahlele, a zi chun a kawmah, “LALPA’n ei suklup guot ahih chun hâlmang thilpiek leh. thai thillat te hih I khuta kipatin sang puo’n tin, zie thil haw cheng hile ei muhsak puo’n a, chun zie tawbang thil hile ei hilh hiel puo’n a,” a ti a.

²⁴Khutichun, numei chun chapa a hing ta a, a min ding in Samson a sau a. Chun, nausen chuh a hung khanga, LALPA’n a vangsak ta a.

²⁵Chun, Zorah leh Eshtaol, Mahanehdan kiti mun achun LALPA thagau in a hun suhalh pan ta a.