Read Gangte VAIHAWMTE 14 Bible Online

VAIHAWMTE 14 - Gangte bible

VAIHAWMTE 14

¹Chun, Samson chuh Timnah khuo ah a va chieh a, Timnah khuo a chun Philistia mi, numei khat hih a va mu a.

²Chun, a hung toh kit phet chun a nu leh a pa a hilh a, “Timnah khuo a Philistia te chanute laka numei khat ka mu a, ka zi dingin ei puih sak un,” a ti a.

³Ziephet chun a nu leh a pa chun a kawmah, “Na suohpihte chanute lak leh I chiteu lak ah numei a um puoh a ahim Philistia mi zektan loh te laka zi ding na va hawl mai chuh?” a tiu a. Chun, Samson chun a pa kawmah, “Ei puih sak mai un; ka deih mah mah mai hi,” a ti a.

⁴Himahlele, a nu leh a pa chun zie chuh LALPA hih ahi tih a he ngâl puou a; Philistia te chunga hun lemchâng hawl a hi ngâl a. Zie hun lai chun Philistia te chun Israel te chungah vai a hawm u a.

⁵Khutichun, Samson chuh a nu leh a pa tawh Timnah khuo achun a va chieh u a; Timnah khuo a grep huon khat hi a va tung u a, chun ngaitie, zie tak achun sakeibaknei vanglai khat hin a na ngîk a.

⁶Chun, LALPA Thagau chuh nasa takin a chungah a hung tunga; tichun, kelno a bawhtel bang mai in sakeibaknei chuh a bawttel ta a, khutngawn ahi ngâl a; himahleh, a thilhih chuh a nu le a pa kawmah a gen puoi.

⁷Chun, a va chieh u a, numeinu chu tawh a holim u a; Samson chun a deih mah mah zieng a.

⁸Chun, chawmkhat nung chun amahnu chuh pui dingin a chieh kita, sakeibaknei luong chuh en dingin a va pet phei a, chun, ngaitie, sakeibaknei luong achun khuoipi a na kai a, a zu le a um ta a.

⁹Chun, zie chuh a la a, a chieh kawmin a ne a, a nu leh a pa kawm chuh a tun phetin amau chule a pie a; himahleh, khuoizu chuh sakeibaknei luong a a lak ahi tih thu bangmah a hilh puoi.

¹⁰Chun, a pa chuh numei kawm achun a chieh suka, zie tak a chun Samson in guolvakna a siem a; zie chuh tangvalte hihdan ngeina ahih ziekin.

¹¹Chun, tihi ahi a, amah a muh phet un, a kawma um dingin a guolte mi sawmthum a hun pui tau a.

¹²Chun, Samson chun a kawm u ah, “Tuhin thu haksa hun dawng ing ka ting; guolvak hun ni sagih sunga nei hilh theih u a, na hetdawk zawh u chun puontheh sawmthum leh kithenna puon sawmthum hun pie’ng ka ting;

¹³Amahvang chuh nei hilhchet theih loh u chun nangun patngat puontheh sawmthum leh kithenna puon sawmthum nei piek dinguh ahi,” a ti a. Chun, amau chun a kawmah, “Na thu haksa chuh vak gen tie leh, na ngaitha’ng kau,” a tiu a.

¹⁴Amah chun a kawm u ah, “Netu apat a nek ding hung pawt a, Hattak apat a thum tak hung pawt,” tih hi a ti a. Chun, ni thum sung chun thu haksa chuh a hilhchien thei ta puou a.

¹⁵Chun, hiti hi ahi a, a ni sagih ni chun Samson zi kawmah, “Zie thu haksa hilhchien ding hin na pasal hi thêm in; a khutih loh chun, nang leh na pa inkawte hi mei a ka hun hâl dinguh ahi; ka neih teu ei lâksak ding leh suklungkham dinga maw nei chiel uh?” a tiu a.

¹⁶Tichun, Samson zi chuh a masangah a kap a, “Ei lungsiet hilo in, ei mudah na hi zaw hi; ka chipihte thu haksa na dawng a, keile lah nei hilh diek puoh a,” a ti a. Chun, amah chun a kawmah, “Ngaitie, ka nu leh ka pa le ka hilh puoh a, nang ka nun hilh diek ding a maw?” a ti a.

¹⁷Chun, guolvak ni sagih sung cheng chun a masangah a kap a kap mai ta a: chun, tihi ahi a, a ni sagih ni chun hah nget a a nget ziekin a zi chuh a hilh ta a; tichun, amah chun a chipihte kieng ah thu haksa chuh a hilh tai.

¹⁸Chun, a ni sagih ni, ni tum ma’n zie khuo a mite chun a kawmah “Khuoizu sanga thum zaw bang ahim le? Sakeibaknei sanga hatzaw bang ahim le?” a tiu a. Chun, amah chun a kawm u ah, “Ka bâwng la hin leilet lo hi leu chin chuh ka thu haksa hi hedawk hiel puo’n lau,” a ti a.

¹⁹Chun, LALPA thagau chuh a chungah nasa takin a hung tunga, tichun, Ashkelon khuo ah a va chieh a, mi sawmthum a va that a, a van uh haw chuh a sut saka, kithenna puon haw chuh thu haksa hilhchiente kawm achun a pie ta a. Chun, a lungna mah mah mai a, a pa In lam ah a chieh to ta a.

²⁰Himahlele, Samson zi chuh a kichên niu a a guol ding a a chiel, a lawipa kawma chun a na pie tau hi.