Read Gangte VAIHAWMTE 15 Bible Online

VAIHAWMTE 15 - Gangte bible

VAIHAWMTE 15

¹Tichun, zie nung chawmkhat hal chun hiti hi a hung hi a, buh-ât hun lai hin Samson chun kelno khat keng in a zi chuh a va veh a; a pa kawmah, “Pindan sung akhun ka zi kawmah va lut ding ka hi,” a ti a. Himahlele, a pa’n a lut ding a za nuom ta puoh a.

²Chun, a pa chun a kawmah, “Ken la na zi chuh na muhdah himhim hi’n a ka ti a, na guolpa ka na pie ta ve; a nau hi amah sangin a mel a hawih zaw hilo ahim? Lungsiet takin a naunu hih nei zaw mai in,” a ti a.

³Chun, Samson in a kawmah, “Tuhin vang Philistia te zakdah ding thilhih leng le mawhchang ta puo’ng ka,” a ti a.

⁴Khutichun, Samson chuh a kipan a, si-âl zathum a va man khawm a, meisel a la a, a mei chiet uh a zawm khawm a, a mei hawu kikal chiet achun meisel khat chiet a kanden a.

⁵Khutia meisel haw chuh a vak hâl kuong phet chun Philistia te buh ding lak achun a tailut u a, buhphal leh buh ding lai leh olive huon haw chuh a katum vek ta a.

⁶Khutichun, Philistia te chun, “Kuo hih ahi?” a tiu a. Chun, amau chun, “Timnah khuote mâkpa Samson hih ahi, a talpu pa’n a zi a lâksak a, a guolpa a neihsak ziekin,” a tiu a. Ziephet chun, Philistia te chuh a chieh to u a, numeinu leh a pa chuh a hâllum tau hi.

⁷Chun, Samson chun a kawm u ah, “Zie tawbang thil na bawl ziek u hin na chung u a phuba la nalai ding ka hi a, zie zawh tieng chuleh hih ta puo’ng ka,” a ti a.

⁸Tichun, nasatak in a do a, amau chuh tamtak a that a, chun a chieh suk a, Etam suongpi kek kal achun a um ta a.

⁹Khutichun, Philistia te chuh a va chieh to u a, Judai gam ah a kikulh tau a; Lehi khawpi chuh a buluh tau hi.

¹⁰Chun, Judai gam mite chun, “Bangti dana kei uh ei hung do dinga hung kuon mai na hiu em?” a tiu a. Chun, amau chun, “Samson man ding leh ka chung u a a hih banga amah chung a hih thuk dinga hung kuon ka hiu hi,” a tiu a.

¹¹Khutichun, Judai gama mi Sangthum Etam suongpi kek kal a chun a va chieh u a, Samson kawmah, “Philistia te hih I chung u a vaihawm ahiu hi tih helo na him? Bangti dana hiti bang a hih keihaw chunga hun hih mai na him?” a tiu a. Chun, amah chun a kawm u ah, “Kei chunga ahih bangun ken le amau chunga ka hih ahi,” a ti a.

¹²Chun, amau chun a kawmah, “Nang hi khauhuol a hun kân a, Philistia te khuta hun pie ding a hungsuk ka hiu hi,” a tiu a. Chun, Samson chun, “Nang u hin ei that lo dingin ka kawmah kipautiem un,” a ti a.

¹³Chun, amau chun a kawmah, “Hun that lo e, amahvang chuh hun kân ung ka tingun, a khut u a hun pie ding ka hiu hi; hun that hiel puo’ng kau,” a tiu a. Tichun khauhuol thak nih in a kân u a, suongpi apat chun a puito tau hi.

¹⁴Chun, Lehi mun a hungtun phet un Philistia te’n a na muok u a, a kiko vengvung mai u a; chun, LALPA thagau chuh a chungah nasa takin a hung tunga, tichun, a khut a kân nau khauhuol haw chuh patzang mei in a kâk tan a bang zieng ta a.

¹⁵Tichun, sabiltung khabeguh thak khat a mu a, a vak bana, a la a zie chun mi sangkhat a khen lum ta a.

¹⁶Chun, Samson chun, “Sabiltung khabeguh in mi sangkhat ka khênlum a, sabiltung khabeguh in ka tieng vum viehvuoh mai hi,” a ti a.

¹⁷Chun, hiti hi ahi a, zie thu chuh a gen zawh phet chun sabiltung khabeguh chuh a paih a, tichun, zie mun chuh Ramath-lehi a sa tau hi.

¹⁸Chun, Samson chuh a dang a hung châk mah mah a, LALPA a sama, “Nangin na suok khut hi mang in lopi takin nei na hukdawk ta a; tuhin, dangchâk a thi a, zektan loh te khuta puklut mai ding ka him?” a ti a.

¹⁹Himahlele, Pathien in Lehi muna kawkhuk chuh thakhat in a khitkek saka, tichun tui a hung kichikdawk a, zie chuh a vak dâwn phet chun a dangchâk chuh a hung hai ta a, a hung halh kit ta a. Khutichun, zie mun min ding chun En-hakore a sa a, tuni tieng in zie chuh Lehi mun achun a um zing tai.

²⁰Tichun, Philistia te hun lai chun Israel te chungah kum sawmnih vai a hawm hi.