Read Gangte VAIHAWMTE 17 Bible Online

VAIHAWMTE 17 - Gangte bible

VAIHAWMTE 17

¹Chun, Ephraim tânggama mi khat a um a, amin chuh Mika ahi.

²Amah chun a nu kawmah, “Dangka sangkhat leh zakhat na kawma pata kilamang, hansie na suoh na leh ka kienga na gen kha, ngaitie, zie dangka khah kei kawmah a um a puo, kei lak ahi,” a ti a. Chun, a nu chun, “Ka chapa, LALPA’n hun vangsak hen,” a ti a.

³Khutichun, dangka sangkhat leh zakhat chuh a nu a pie kita, chun, a nu chun, “Zie dangka hih keimah khut ngei in ka chapa a dingin, milim siemna leh milim a sun dingin LALPA kawmah ka lân hi, zie ziek chun tuhin hun pie kit ding ka hi,” a ti a.

⁴Chun dangka chuh a nu a vak pie a, a nu chun dangka sekel zanih chuh a la a, dangkaguo sek pa a pie a, amah chun milim in a hun siem a, milim in a hun sun saka: zie chun Mika In a chun a um ta a.

⁵Chun, Mika chun pathien In haw a nei a, Ephod leh teraphim a siem a, thiempu dingin a chapa khat chuh a kawihchuom ta a.

⁶Zie lai chun Israel gam ah leng a um puoh a; mitin chuh a mau phasak bang chiet in a um u a.

⁷Chun, Juda gama Bethlehem inkuon khata kipatin Levi chi tangval khat a um a, amah chuh khuolzin ahi.

⁸Zie pa chuh Bethlehem Juda khawpi apat in a pawt a, chênna ding hawla vak viel ahi. Tichun, a vakvielna a chuh Ephraim tâng gam a Mika In chuh a va tunga.

⁹Chun, Mika chun a kawmah, “Khawi apat a hung na hi?” a ti a. Chun, amah chun a kawmah, “Bethlehem Juda a um, Levi chi ka hi a, chênna ding mun hawla vakviel ka hi,” a ti a.

¹⁰Ziephet chun, Mika chun a kawmah, “Kei kawm ahin um inla, ka thiempu ding leh ka pa dingin um inla, kum khat in dangka sekel sawm hun pie’ng ka ting, puonsilh ding leh nek ding le hun pie ding ka hi,” a ti a. Khutichun, Levi mipa chuh a kawma um dingin a chieh ta a.

¹¹Chun, Levi mi chun zie pa kawma um chuh pha a sa a; tichun, zie tangval chuh a chapa khat bangin a um tai.

¹²Chun, Mika chun Levi chi chuh a kawih chuom a, tichun, tangval chuh a thiempu’n a um ta a; tichun, Mika In achun a um tai.

¹³Khutichun, Mika chun, “Tuzet hin chuh Levi chi thiempu ka nei ta a, LALPA’n ei vangsak tei ina tih ka hêi,” a ti a.