Read Gangte VAIHAWMTE 19 Bible Online

VAIHAWMTE 19 - Gangte bible

VAIHAWMTE 19

¹Chun, hiti hi ahi a Israel gama leng a umloh lai chun Levi chi mi khat hih Ephraim tânggam ah a um a, Bethlehem Juda numei khat mei in a nei a.

²Himahlele, a meinu chun zawl a saih sana, tichun, Bethlehem Judai gama a pa kawmah a taihsan tai: tichun, zie mun achun tha li hiel a va um a.

³Chun, a pasal chuh a kipan a, a suokpa tawh a sabiltung nih chuh pui in, amah chuh kamdam a zawl a lung-awi taka puihkit guo’n a va delhzui a; chun, amahnu chun a pa In ah a puilut a; chun, nungaknu pa chun le a na muh phetin a kipâk ten a.

⁴Chun, a talpupa chun a kawma um dingin a thoh a; khutichun. a kawmah ni thum a nichuong a, tichun, a neu in a dâwn khawm u a, a kawm u achun a um ta a.

⁵Chun, tihi ahi a, ni li ni chun zingkal matak in a tho a, amah chuh chieh dingin a kisa a, nungaknu pa chun a mâkpa pa kawm achun, “Chângthâk neukhat bêk ne’n la, kisuhalh tadih inla, zie zawh tieng chuleh chieh nan lau,” a ti a.

⁶Khutichun, a chu khawm u a, a nih u chun a neu in a dâwn u a; chun, nungaknu pa chun, “Lungthim nuom takin tuzan in giek kit unla, lungthim kipâk takin um tadih un,” a ti a.

⁷Himahlele, amah chuh chieh dingin a kipan a, mahleh a pu chun a thoh a, tichun a giek kit ta a.

⁸Chun, a ni nga zingkal chun vaima taka chieh guo’n a kipana; chun, numeinu pa chun, “Na lunggil suhalh tadih inla, nitâk ni nem tieng in um tadih un,” a ti a. Tichun, a nih u chun an a nekhawm kit tau a.

⁹Tichun, zie pa chuh a meinu tawh a suokpa chu tawh chieh dingin a kipan u a, nungaknu pa chun a kawmah, “Ngaitie, ni le a tâk ta a, tuzan chuh giek kit mai un, khuo thim ding le ahi ta hi; zie hin giek kit unla, lungthim chawldam taka na um theih na dingun, tichun, zingkal vaima taka tho in, na chieh mai puoh dem,” a ti a.

¹⁰Himahlele, zie pa chuh zie zan a giek kit ding chuh nuom lo in a kipandawk ta a, Jebus khuo zawn a va tung u a (zie chuh Jerusalem ahi) sabiltung nih leh a meinu chuh a pui a.

¹¹Jebus khuo kieng a tun u chun a vaigei ten ta a, a suokpa chun a kawmah, “Jebus khawpi ahin kichawl hiting un, giek mai hitiu,” a ti a.

¹²Chun, a pu chun a kawmah, “Israel suon hilo nam dang te khuo ah lut lo e; Gibeah khuo lam zuon zawi tiu,” a ti a.

¹³Chun, a suokpa chun, “Hung un, a hawizaw chuh hileh, chieh hitiu, Gibeah ahim Ramah ahim a chun giek hitiu,” a ti a.

¹⁴Khutichun, a chieh zel u a, Benjamin mite khuo Gibeah khuo kieng a tun un ni a tum ta a.

¹⁵Chun, Gibeah khuo a giek ding chun a lut tau a; khawpi sung achun a chuu a, a In u a giek sak nuom kuomah a um puou hi.

¹⁶Chun, ngaitie, teksepu khat hi a lokuonna apat in nitâk lam in a hung tunga, zie pa chuh Ephraim tânggam mi ahi a, Gibeah a va cheng ahi; zie mun a cheng te chuh Benjamin chite ahiu a.

¹⁷Chun, a vak kihei leh khawlai a lamlien a malzinpa chuh a vak mu a, a kawmah, “Khawi a chieh ding na hi? Khawia kipat a hung na hi?” a ti a.

¹⁸Chun, amah chun a kawmah, “Bethlehem Judai gam apat a Ephraim tânggam tawp lam a chieh guo ka hi, zie mun a chuh cheng ka hi a; Bethlehem Judai gam ah ka va chieh a, tuhin LALPA In a chieh guo ka hi a, kuomah cha a In a ei tunsak nuom a um puou hi.

¹⁹Ka sabiltung a ding vang buhpawl leh gan-an le ka nei ui; chun, kei leh na suoknu leh na suok kawma um tangvalte a ding hinle chângthâk leh uain te a uma; ka mamawh chenguh ka nei ui,” a ti a.

²⁰Chun, teksepu chun, “Lungmuong takin um in, na tâksap cheng chuh ken hun ngaihtuoh ing ka; khawlai a vang giek hiel kiu,” a ti a.

²¹Khutichun, a In ah a puilut a, a sabiltung te chuh an a pie a amau chun le a keng uh a sil u a, a neu in a dâwn tau a.

²²Khutia lawp leh kipâk taka a umlai u chun, ngaitie, zie khuo a Belial chapa khenkhat te chun a In chuh a hun um tau a, kawtkhak a hun khên u a, a Inneipa teksepu kawm achun, “Na in a hung tung pa khah hun puidawk ah, a na kipawlpih ding ka hiu hi,” a tiu a.

²³Chun, a Inneipa chun a kawm u ah a va pawt a, a kawm u ah, “Himaizen lo e, suohpihte, khuti lâwm lâwma gitlohna chuh bawl hiel kiu in; zie pa hih ka zinpa ahi a, khutibanga thil ngawlhuoi vang chuh hih hiel kiu in,” a ti a.

²⁴“Ngaitiem u, zie hin ka chanu nungak leh a meinu a um hi, amau chuh hun puidawk ing ka ting, amau hi pawngsuol in, pha na sak bang bangun a chunguh ah bawl mai un, zie pa chung ahin vang zie bang thil ngawlhuoi chuh hih kiu in,” a ti a.

²⁵Himahlele, a thugen chuh a ngai nuom puou a: khutichun, amah chun a meinu chuh a mana, a kawm u a chun a puidawk ta a; chun amau chun a na kuolpih u a, khuo vak macheng chun zan khuo’n a na suol u a, chun, khuo a hung vak phetin a thahdawk tau a.

²⁶Khutichun, numei chuh khawvak phetin a chieh a, a pasalpa tunna kawtkhak bul achun a puktha ta a, khawvak nung tiengin le tichun a um zing ta a.

²⁷Chun, a pasal chuh zingkal in a hung tho a, kawtkhak haw chuh a vak hawng a, chieh guo a a pawtdawk leh, ngaitie, a meinu chuh kawtkhak bul achun a khuta kawtkhak lam bân kawmin a na puktha kei mai ta a.

²⁸Chun, amah chun a kawmah, “Tho ah, chieh tai tiu,” a vak ti a; himahlele, a hun dawng ta hiel puoh a, tichun a sabiltung chungah a dawm kai a, tichun a kipan dawk a, a In lam zuon in a chieh ta a.

²⁹Chun, a In a tun phet chun, chemcha a la a, a meinu khut leh kengzung haw chuh phel sawmlenih suoh in a sem nêl a, Israel gam chengcheng ah a thakzak ta a.

³⁰Chun, hiti hi ahi a, a na mu ta cheng chun, “Israel chate Aigupta gam apat a a hung pawtdawk nung un hiti bang thil himhim hih tuni tieng hin a na um kha nai puoi; ngaihtuoh unla, kidawng unla, gen tiem u,” a tiu a.