Read Gangte VAIHAWMTE 20 Bible Online

VAIHAWMTE 20 - Gangte bible

VAIHAWMTE 20

¹Khutichun, Israel chate chengcheng-Dan apat a Beerseba tiengin Gilead mite tawh kipumkhat in Mizpah a LALPA kawmah a kikhawm tau a.

²Chun, phung tina Israel lawiupate chengcheng chuh Pathien mite kikhawp khawmna achun a va tel u a, keng sepaih, chemzâm mang thei nuoili zet ahiu hi.

³(Zie lai chun Benjamin suonte chun Israel chate Mizpah ah a chiehkhawm ui tih a na zau a.) Chun, Israel chate chun, “Bangti dana zie tawbang nunsietna hih hung um thei ahim, ei hilh tiem u?” a tiu a.

⁴Chun, Levi chi a mei a thah sak pau chun, “Benjamin chite chênna Gibeah ah ka mei tawh giek dingin ka va lut u a.

⁵Khutih lai chun Gibeah mite chun ei hun do ta mai u a, zan in ka giehna In uh a hun ûmkimvel u a; ei thah guou a, tichun, ka meinu chuh a suol u a, a thi ta a.

⁶Tichun, ka meinu luong chuh ka la a, abat-abat in ka ât a, zie chuh Israel chate chênna gam chengah ka thâk viela; Israel gama thil tizat um tak leh ngawlhuoi tak thil a na hih ta ngâl u a.

⁷Nang haw Israel chate haw, na bawn un a na ngaitha tiem u, na ngaihdan u leh pha na sak dân u chuh gen tiem u,” a ti a.

⁸Tichun, mipite chengcheng chuh kithuguol in a kipan dawk u a, “Kuomah a In lam u ah chieh kihen la, kuomah a In ale lut diek kihen.

⁹Gibeah te I bawl ding dân u chuh hiti hi hiding ahi; phunsân hiting un, amau do ding chun kuon to hitiu,” a tiu a.

¹⁰“Israel chate chunga thil diklo a hih bang u a hih ding leh Gibeah muna Benjamin te I do nau a mipite nek ding hun pie ding in Israel nam chengcheng laka pat in mi zakhat laka sawmkhat, sangkhat laka zakhat, singkhat laka sangkhat zel teldawk hitiu,” a tiu a. “Benjamin gama Gibeah muna a hung tieng u leh Israel chate chunga thil ngawlhuoi leh gilo a bawl u chuh phuba la ding I hiu,” a tiu a.

¹¹Khutichun, Israel chate chengcheng chuh kithuguol in zie khawpi chuh do dingin a kikhawm tau a.

¹²Chun, Israel namte chun Benjamin namte kawma achun, “Na laka u a hitibang nunsietna um hi bangti thu ahi ta?

¹³Zieziekchun, tuhin Gibeah khuo a Belial chapate chuh ei hun pie dawk un la, Israel gama thil phalo hi a beih theih na dingin a na that ung kau,” a tiu a. Himahlele, Benjamin chite chun a suohpih teu Israel chate thugen chuh a ngaihsak nuom puou a.

¹⁴Tichun, Benjamin suon te chuh Israel chate do dingin khawpi haw a chun a hungkhawm u a, Gibeah khuo a chun a lut tau hi.

¹⁵Chun, zie ni a Benjamin suonte khawpi a pata chemzâm chawia pawtte chuh Gibeah khuo ah mi zasagih kiteldawk te simloh in singnih leh sanggup ahiu hi.

¹⁶Ziehaw chengcheng lak achun veilawng zasagih telchuom diek a tel u a; abawn u chun vaisuongseh sep thiem ngên ahiu a, sam zang tieh le sep khiel lo chiet ahiu hi.

¹⁷Chun, Israel mipite chuh Benjamin te simloh in kido thiem chiet nuoili ahiu a, ziehaw chengcheng chuh galdo thiem ngên ahiu hi.

¹⁸Chun, Israel chate chuh a kipan u a. Bethel ah a chieh to u a, Pathien a dawng u a, “Benjamin suonte do ding a chieh masa ding kuo a?” a tiu a. Chun, LALPA’n, “Juda chieh masapen hen,” a ti a.

¹⁹Tichun, Israel chate chuh zingkal in a tho dawk u a, Gibeah khuo chuh a um tau a.

²⁰Tichun, Israel chate chuh Benjamin te do ding chun a kipan u a, chun, Israel chate chun Gibeah khuo a chun panmun siem in a huol tau a.

²¹Chun, Benjamin suonte chuh Gibeah khuo apat chuh a hung pawt u a, zie ni chun Israel chate chuh singnih leh sangnih a that u a,

²²Chun, Israel mipite chuh a kitil hangsan kit u a, a do pat na mun mah mah uh a chuh do kit dingin panmun a khawh kit u a,

²³Tichun, Israel chate chuh a chieh to u a, Pathien masangah nitâk lam tiengin a kap u a, “Ka suohpih uh Benjamin suonte do dingin ka va kuon kit ding um?” ti’n LALPA a dâwng u a.

²⁴Chun, LALPA chun, “Va kuon kit un,” a ti a. Chun, a ni nih ni chun Israel chate chun Benjamin suonte chuh do ding in a va naih kit u a.

²⁵Chun, Benjamin suonte chule a ni nih ni chun kido dingin Gibeah khuo apat in a pawt u a, Israel chate laka mi singkhat leh sanggiet a hun that kit tau a, ziehaw chengcheng chuh chemzâm chawi chiet ahiu hi.

²⁶Khutichun, Israel suonte chengcheng leh mipite chuh a chiehto u a. Bethel ah a chieh u a, a kap u a, zie ni chun LALPA masang ah nitâk lam tiengin an a ngawl u a; chun LALPA kawma hâlmang kithawih na leh chamna thillat a la’n u a.

²⁷Chun, Israel chate chun LALPA a dawng u a (zie lai chun Pathien thugawlh bawm chuh Bethel ah a um a,

²⁸Aron chapa Eleazar chapa Phinehas chuh a enkawl in a pang a). Mipite chun, “Ka suohpih pau Benjamin suonte chuh ka do kit ding um, ka haihsan mai ding um?” ti’n LALPA a dawng u a. Chun, LALPA’n, “Va do kit un, zing leh chuh na khut u a hun pie ding ka hi tai,” a ti a.

²⁹Chun, Israel chate chun Gibeah khuo kimvel achun a gûk a châng ding a kawih tau a.

³⁰Chun, Israel chate chuh Benjamin suonte do dingin a ni thum ni chun a kuon kit tau a, ni dang bang mah khan Gibeah do ding chun panmun a guonggalh kit tau a.

³¹Chun, Benjamin suonte chule amau do ding chun a hung kuon dawk u a, khuo chuh a hun taihdawk san u a; tichun ni dang bang mah in a hun do u a, a hun that pan kit ta mai u a, lam tuongpi Bethel khuo lampi leh Gibeah zawtna lamlien haw a chun Israel chate chuh sawmthum a that u a.

³²Chun, Benjamin suonte chun, “Amasa guol khan I masang u ah a taisie kit tau hi la,” a tiu a. Israel chate chun la, “Tai hiting un, khawpi apat hin kidelh dawk sak hiting un, lamlien lam ah zawl dawk hitiu,” a tiu a.

³³Tichun, Israel chate chengcheng chun a panmun u chuh a pawtsan u a, Baaltamar mun ah panmun a guonggalh u a; chun Israel te a gûk a a na chângte khah a panmun uh Maaregeba apat chun a hung pawt u a.

³⁴Chun, Israel chate laka teldawk mi singkhat in Gebeah chuh a do u a, a kido u chuh a na sa mah mah mai a: himahlele, Benjamin suonte chun zo lo ding ahiu hi tih vang a kihe puou hi,

³⁵Chun, LALPA’n Benjamin suonte chuh Israel chate masang a chun a guollah sak ta a; zie ni chun Israel chate chun Benjamin suonte chuh singnih leh sangnga leh zakhat a that u a; ziehaw chuh chemzâm chawi chiet ahiu hi.

³⁶Khutichun, Benjamin suonte chuh a guollah tau ui tih a hung kihe tau a; Israel chate chun Gibeah do ding a kawih gûk teu khah a muon zawk ziekun Benjamin suonte chuh a kinungzuk san uh ahi.

³⁷Chun, a gûk a châng pang haw chun Gibeah khuo chuh thakhat in a hun do u a; tichun a gûk a châng pang haw chuh a kikhenzak u a, Gibeah khawpi a mi chengcheng chuh chemzâm in a satlum vek tau hi.

³⁸Israel chate a gûka châng pang haw chun a kitiem bangun khawpi chung zawna meikhu a muh tieng u leh kido dinga taihdawk ding tih ahi.

³⁹Chun, Israel te chuh a kinungzuk tadih u a, tichun, Benjamin suonte chun a vak do pan u a; Israel suonte chuh sawmthum a that u a, “I kido masak niu guol khan I masang u ah a taisie kit tau hi,” a tiu a.

⁴⁰Himahlele, khawpi sung apat a mei a hung khut dawk vuohvuoh phet chun Benjamin suonte chuh a kinunghêi u a; tichun, khawpi chung zawna chun meikhu chuh van lam ah a kitung to nguohnguoh mai ta a.

⁴¹Tichun; Israel chate chuh a hung kihei phet u chun, Benjamin suonte chun lamdang a sau a; a chung u a thil phalo hung tung ding ahi tih a he tau a.

⁴²Khutichun, Israel chate masang achun gamthip lam zuon in a taisie tau a. Himahlele, a delhzui zel u a; khawpi apat a hung taidawk te chun zie mun achun a that zel u a.

⁴³Khutichun, Benjamin chite chuh a um bichilh tau a; a delh zel u a, ni suoh na lampang a Gibeah zawna chawlhmun a chun a delhpha tau hi.

⁴⁴Benjamin suonte chuh singkhat leh sanggiet a that u a, a bawn u chun mihat hangsan chiet ahiu hi.

⁴⁵Chun, a kilehhei kit u a, gamthip a Rimmon suongpi lam ah a tai tau hi; mi sangnga chuh lamlien ah a that u a, Gidom tiengin a delhzui zel u a, mi sangnih a thah beh kit nalai ui.

⁴⁶Khutichun, zie ni a Benjamin suonte a thah hawu chuh chemzâm chawi chiet singnih leh sangnga ahiu hi.

⁴⁷Himahlele, mi zagup te chuh gamthip lama Rimmon suongpi ah a tai u a; Rimmon suongpi a chun tha li a um u a.

⁴⁸Chun, Israel suonte chuh Benjamin suonte chungah a hung kipan kit u a; khawpi sunga um phawt chuh gancha hileh a muh phawt u chuh chemzâm in a satlum zel u a; zielo chule khuo a muh phawt u chuh a hâltum zel u a.