Read Gangte VAIHAWMTE 21 Bible Online

VAIHAWMTE 21 - Gangte bible

VAIHAWMTE 21

¹Chun, Israel chate chun Mizpah khuo ah, “I lak u a mi kuomah in I chanuteu Benjamin suonte zi dinga I piek loh hiel dinguh ahi,” ti’n a kihâksiel u a.

²Khutichun, mipite chuh Bethel ah a chieh u a, ngeihtak a kiko in, hahpi’n a kap u a.

³Amau chun, “Aw LALPA Israel te Pathien, bang zieka Israel te laka hiti bang thil hi hung um mai ahi tam, tuni hin bang zieka Israel nam laka khat kim lo ding ahi ta’m?” a tiu a.

⁴Chun, hiti hi a hung hi a, a zing chun mipite chuh zingkal vaima takin a tho u a, zie chun maichâm a siem u a; hâlmang kithawihna leh chamna thilpiekte a pieu a.

⁵Chun, Israel chate chun, “Israel nam LALPA kawma kikhawm te laka hung tello kuo a?” a tiu a. Mizpah khuo a LALPA masanga chieh lo phawt chuh, “Thah ngêi ngêi ding ahi,” ti’n a na kihâksiel ta ngâl u a.

⁶Chun, Israel chate chuh a suohpihpau Benjamin chung achun a kisik tau a; “Tuni hin Israel nam lak a phung khat mangthai ahi tai, a tih ziekun,

⁷A hing sun te zi ding chuh bangti’n I ngaihtuoh sak ta ding u? I chanu teu zi a neihsak loh dingin LALPA min sâm in I kihâksiel ta ngâl u a,” a tiu a.

⁸Chun, amau chun, “Israel nam lak ah kuo phung ahi Mizpah khuo a LALPA masanga hung kilang khalo chuh?” a tiu a. “Chun, ngaitie, zie a mipi kikhawp na mun a chun Jabesh-gilead mite khatchale a tel puou,” a tiu a.

⁹Mipite a hung kisim lai u chun, ngaitie, Jabesh-gilead gama cheng te khatchale a na pang lo a hiu a.

¹⁰Chun, mipi kikhawm te chun, mi hangsan chiet singkhat leh sangnih a sawl u a, “Chieh unla, Jabesh-gilead gama chêngte chuh numei leh chapang hileu le chemzâm in va satlum suok kêi un,” a tiu a.

¹¹“Na hih dân ding u chuh hiti bang hih hiding ahi, pasal cheng leh numei, numei pasal in a kuolpih taphawt chuh that vek un,” ti’n thu a pieu a.

¹²Chun, Jabesh-gilead gama cheng te laka chun nungak thiengtho, pasal tawh kisukha lo hiel zali a hun muu a, tichun, a um nau Shiloh achun a hun pui u a, zie mun chuh Kanaan gam a um ahi.

¹³Chun, mipi kikhawm te chun mi a sawl u a, Rimmon soungpi a kisel Benjamin suonte kieng a chun kichamna thu a thâk u a.

¹⁴Tichun, Benjamin suonte chuh a hungkit tau a; tichun Jabesh-gilead gama numei a hing hawih teu chuh a zi ding un a pie tau a; khutisa chun le a kihawm ting nai puou hi.

¹⁵Chun, Israel chate laka kipumkhatna LALPA’n a na suksiet tâk ziek chun, mipite chun Benjamin te chuh lainat um a sa mah mah tau a.

¹⁶Khutichun, mipi kikhawmte laka lawiupa haw chun, “A hing nalaite zi ding hih bangti’n I ngaihtuoh ding u? Benjamin suonte numei haw chuh I thah sak ta ngâl u a?” a tiu a.

¹⁷Amau chun, “Israel nam laka phung khat sukmangthai a a umloh na ding ngaihtuoh tei ding ahi.

¹⁸Himahlele, ei un la I chanu teu hi a zi dingun I pie thei puoh ngâl u a,” a tiu a. Israel chate chun, “Kuole Benjamin te zi a neihsak taphawt chuh hansie dawl in um hen,” ti’n I na kihâksiel ta ngâl u a.

¹⁹Chun, amau chun, “Ngaitiem u Bethel mâllam. Bethel a pata Sekem zawtna lamlien suohlam panga Lebanon simlam a um Shiloh khuo ah kum cheng leh LALPA dingin kut a um sek kha,” a tiu a.

²⁰Chun, amau chun Benjamin suonte kawma chun, “Va chieh unla, grep huon haw a chun va châng unla;

²¹Khutichun, a na en unla, chun, ngaitiem u, Shiloh khuo a nungak haw chuh lam dinga a hung tieng u leh, grep huon apat chun hung pawt unla, Shiloh nungak haw chuh na zi dingun man unla, Benjamin gam achun kipuih un.

²²Chun, hiti hi hi’n tin, a pateu ahim, a suohpih teu ahim ki-awi lo a ka kawm u a hung tieng u leh, a kawm u ah, ‘Ei lungsiet un, kido na a khan a zi dinguh I na sit sak ta puoh ngâl u a, nang un la na pie puoh ngâl u a; a na pie hi leu chin le thiemloh chang ding na hiu a,’ ti’n a na gen ing kau,” ti’n thu a pieu a.

²³Chun, Benjamin suonte chun khutibang chun a hih tau a, lam dinga hung te lak achun amau chiet zi dingin a na man u a, a kipuih u a; tichun, a gam lam u achun a chieh tau a, a khawpi teu chuh a siemthak u a; a sung achun a cheng tau hi.

²⁴Tichun, zie apat chun Israel chate chuh amau chi leh nam dungzui zel in a kikhen zak kit tau a; zie apat chun amau gam luoh na chiet ah a chieh kit tau hi.

²⁵Zie lai chun Israel gam ah leng a um puoh a; mitin chuh amau phasak dân chiet in a um ui.