Read Gangte VAIHAWMTE 3 Bible Online

VAIHAWMTE 3 - Gangte bible

VAIHAWMTE 3

¹Chun, Israel chate Kanaan gama galdo a chieh kha lote patep na dinga LALPA’n a um sakte chuh ziehaw hih ahiu hi.

²Ziete chuh Israel suonte tuma a galdo dân ana he khalo te a ding leh a diek in, galdo dân a sinsak theih na ding a a um sak ahiu hi.

³Ziehaw chuh Philistia leng ngate, Kanaan mite, Zidon te, Lebanon tânga um Hiv te Baalhermon tâng apat a, Hamath khuo lutna tienga cheng te ahiu hi.

⁴LALPA’n Mosi manga amau suonte kawma thu a na piek khah a zawp u leh zawp loh uh hetna dinga Israel chate patepna dinga um ahiu hi.

⁵Chun, Israel chate chuh Kanaan mite. Hit mite. Amor mite, Periz mite, Hiv mite, Jebus mite lak achun a cheng tau a.

⁶Chun, a chanu teu chuh zi’n a nei u a, a chanuteu chule gamdang mite chapate chuh a neihsak u a, a pathien teu na chuh a sem tau a.

⁷Chun, Israel chate chun LALPA mitmuh in thil gilo a na hih tau a. LALPA a Pathien u chuh a hengilh u a, Baal haw leh Ashtaroth na a sem tau a.

⁸Khutichun, LALPA chuh Israel te chung achun a lungna ta a, tichun, Mesopotamia gama leng Kushan-rishathaim khut ah a pie ta a: tichun, Israel chate chuh Kushan-rishathaim nuoi achun kum giet a um tau a.

⁹Chun, Israel chate chun LALPA a sap phet u chun, LALPA’n Israel chate hukdawk dingin Kaleb naupa Kenaz chapa Othniel chuh a hun pie ta a.

¹⁰Chun, LALPA thagau chuh a chungah a hung tunga, tichun, Israel chate chunga vaihawm in a pang ta a. Othniel chuh galdo dingin a kuon dawk a, Mesopotamia leng Kushan-rishathaim chuh a khut ah a pie a, a zo ta a.

¹¹Tichun, gamsung chuh kum sawmli sung gâlmuong in a um ta a, tichun, Kenaz chapa Othniel chule a thi ta a.

¹²Chun, Israel chate chun LALPA mitmuh in thil gilo ana hih kit tau a; khutichun, LALPA mitmuh a thil gilo a na hih tâk ziek u chun, LALPA’n Moab leng Eglon chuh Israel chate sanga hatzaw’n a hun siem ta a.

¹³Khutichun Eglon chun Amon suonte leh Amalek te chuh a kithuohpih a, Israel chate chuh a zo u a, Jerikoh tum khawpi kiti chuh a la tau a.

¹⁴Tichun, Israel chate chuh Moab leng Eglon nuoi ah kum sawm leh kum giet a um tau hi.

¹⁵Himahleh, Israel chate chun LALPA a sap phet u chun LALPA’n Gera chapa Ehud, Benjamin chi, mi veilawng chuh amau haw hukdawk dingin a hun guot sak ta a; Israel chate chun Moab leng Eglon kawm achun thilpiekte leh sieh a pie tau a.

¹⁶Chun, Ehud chun chemzâm hiemtuok, tawng khat a sau in a sek a, zie chuh a malpi changlama puonnuoi ah a tai ah a vawp a.

¹⁷Tichun Moab leng Eglon chuh kipahman a vak pie a; Eglon chuh mi thau tak mai ahi a.

¹⁸Chun, kipahman a vak piek zawh phet chun, kipahman hun puote chuh chieh kit dingin a hilh a.

¹⁹Amah chuh Gilgal khuo kienga suong sêkna mun apat in Eglon kieng ah a vaikit a, a kawm achun, “Thuguk hun hilh ding ka nei hi,” a ti a. Chun, Eglon chun a suok te kawm achun, “Thip chilchel un,” a ti a. Tichun a suokte chun a pawtdawk san vek tau hi.

²⁰Chun, leng chuh amah mai a a insung dap zîn zên a a chut lai in Ehud chuh a va lut a, a kawmah, “Pathien in na kawma gen ding thu ei hilh hi,” a ti a. Chun, leng chuh a chutna apat chun a hung ding dawk ta a.

²¹Ziephet chun, Ehud chun a khut veilam in a changlam malpi a chemzâm chuh a zuk dawka, a gilpi chuh a sut sak ta a.

²²A chemga chule a tum hiel a, chemzâm chuh a thau chun a châwp chak kêi a, chemzâm chuh a bawt dawk zo ta puoh a; a nungzang lama a let pai ziekin.

²³Khutichun Ehud chuh bithaliep ah a hung pawtdawk a, pindan kawt chuh a khâk a, a kamkhum a, a taihsan tai.

²⁴Chun, a pawt nung chun a suokte chuh a hung u a; pindan kawtkhak kikam chak kêi a muh u chun, leng chuh insung a kichawldam hi’n a, ti’n a ngaihtuoh u a.

²⁵Tichun, zahchâk um khawp hiel in a ngak u a, khutia chuh pindan kawtkhak a hun hawn loh hiel phetin, chabi a lau a, kawt chuh a hawng tau a; a leng pau chuh tuonglai achun a thi sa’n a na kuol tai.

²⁶Ehud chuh khutia a ngak sung u chun a na kigelhmang man ta a, Suong sêkna mun khah a pêl a, Seirah lam ah a taidawk tai.

²⁷Chun, hiti hi ahi a, zie gam chuh a tun phetin Ephraim tânggam achun pengkun a mût a, Israel chate tânggam apat in a kawmah a chieh suk u a; amah chun ma a pui ta a.

²⁸Chun, amah chun a kawm u ah, “Ei hun zui un, LALPA’n na melmau Moab te chuh na khut u ah a hun pie tai,” a ti a. Tichun, a zui suk u a, Moab mite kaihmun Jordan lui achun a khâk tan u a, kuomah galkaih a phal sak ta puou a.

²⁹Zie ni chun Moab te chuh mi âwm khauh chiet leh mihat hangsan chiet singkhat hiel a that u a; khatchale a suokcha puou hi.

³⁰Khutichun, Israel chate chun Moab te chuh zie ni chun a zo tau a, gamsung chuh gâlmuong in kum sawmgiet sung a um tai.

³¹Chun, zie nung chun Anath chapa Shamgar chuh a hung kilang a; amah chun bâwng sutna mawlh in Philistia mite chuh zagup hiel a sun lum a; tichun, Israel chate chuh a hukdawk tai.