Read Gangte VAIHAWMTE 4 Bible Online

VAIHAWMTE 4 - Gangte bible

VAIHAWMTE 4

¹Ehud thih nung chun Israel chate chun LALPA mitmuh in thil gilo a hun hih kit tau a.

²Tichun, LALPA’n amau chuh Hazor a vaihawm, Kanaan lengpa Jabin khut ah a pie dawk ta a; a sepaih hotu chuh Sisera ahi a, Jentel gam Haroseth muna cheng ahi.

³Jabin chun thik kangtalai zakuo hiel a nei a; kum sawmnih sung chuh nunsie tak leh ningkhel takin Israel chate chung achun vai a hawma; ziephetchun, Israel chate chuh LALPA kawmah panpihna ngên in a kiko tau a.

⁴Chun, zie lai chun Lapidoth zi Deborah thiemgaunu chuh Israel te chunga vaihawm ahi.

⁵Chun, amah chuh Ephraim tânggam a Ramah leh Bethel kikal a tum thing nuoi achun a um sek a. Israel chate chuh thutan sak dingin a kawmah a hung khawm sek u a.

⁶Chun, Kadesh-naphtali gama Abinoam chapa Barak chuh a vak thuthak a, a kawmah, “LALPA Israel Pathien in, ‘Tabor tângah va chieh inla, Naphtali suonte leh Zebulun suonte singkhat puikhawm in.

⁷Tichun, Kishon lui ah Jabin sepaih hotu Sisera chuh a kangtalaite leh a sepaih haw cheng tawh hun sawl ing ka; amah chuh na khut ah hun pie’ng ka,’ ti’n thu a pie hilo ahim?” a ti a.

⁸Chun; Barak in a kawmah, “Nei zuih ding leh chieh ing ka ting, ahi’n nei zuih loh leh vang chieh lo ding ka hi,” a ti a.

⁹Chun, amah chun, “Hun kitawn pih tei ding ka hi a, amahvang na chiehna achun minphatna lawh lo ding na hi, a ziek chuh LALPA’n Sisera chuh numei khut ah pie ding ahi ngâl a,” a ti a. Chun, Deborah chuh a kipan a, Barak chuh tawh Kadesh lam achun a chieh tau a.

¹⁰Chun, Barak chun, Zebulun te leh Naphtali te chuh Kadesh mun ah a samkhawm a, chun mi singkhat in a zui to u a, Deborah chule a kawm u achun a va chieh ta a.

¹¹Khutichun, Ken mi Heber kiti Mosi talpupa Hobab suon a mi chuh Ken mite laka kipat a nuokdawk in Kadesh kienga Zanaim mun ah puon-In a zak a.

¹²Chun, Sisera chun Barak chuh Tabor tângah a chieh to hi tih a heta a.

¹³Tichun, Sisera’n a kangtalai chengcheng, thik kangtalai zakuo leh a lawite Jentel gama Haroseth khuo apat in Kishon lui ah a tawlkhawm ta. a.

¹⁴Chun, Deborah chun Barak kawmah, “Kipan in, LALPA’n na khuta Sisera a piek ding ni chuh tuni hih ahi. Na kawma LALPA umlo a na ngaihtuoh ahim?” a ti a.Khutichun, Barak chuh a sepaih singkhat tawh Tabor tâng apat chun a chieh suk tau a.

¹⁵Tichun, Barak leh a sepaihte’n a vak do phet u chun, Sisera leh a sepaihte chuh LALPA’n a masang u ah. a kithehzâk sak veka, Sisera chuh a kangtalai apat chuh a kum tha a, keng in a tai ta a.

¹⁶Khutichun, Barak chun kangtalai leh sepaihte chuh Jentel te gam Haroseth tiengin a delhzui ta a; Sisera sepaih chengcheng chuh chemzâm in a that vek u a. Khatchale a suokcha a um puou hi.

¹⁷Sisera chuh Ken mi Heber Jael puon-In ah a tailut a, Hazor leng Jabin leh Ken mi Heber inkuonte chuh zie hun lai chun a kiho thei mah mah u a.

¹⁸Chun, Jael chuh Sisera muok dingin a hung pawt a, a kawmah, “Hepu, hung inla, ka kawmah hunglut inla, lau ki’n,” a ti a. Tichun, puon-In sung achun a kawmah a lut a; amah chun puonzak lieh ah a selgu a.

¹⁹Chun, a kawmah, “Lungsiet takin tui dâwn ding ei hun pie tie, ka dang a châk taluoi,” a ti a. Chun, bâwngnawi bel chuh a hun hawng a, a dâwn saka, a khuh kit ta a.

²⁰Chun, a kawmah, “Puon in kawtkhak a khan ding inla, insung akhan mi a um em ti a hung dawng a um u leh, kuomah a um puoi,” a na ti zel in, a ti a.

²¹Tichun, Heber zi Jael chun puon-In kilhna a la a, a khut khat in sek a chawi a, awlcha cha’n a zuon phei a, puon-In kilhna chun a chalpâng ah tuol tawh a kilhden ta a; amah chuh a thachawl ziekin a ihmut a nuom mah mah ngâl a; tichun, a thi ta a.

²²Chun, ngaitie, Barak in Sisera a hun delhzui chuh kituok pih dingin Jael chuh a va pawt a, a kawmah, “Hung tie, na mi delh pa chuh hun etsak ing ka,” a ti a. Tichun, a kawmah a va chieh a, ngaitie, Sisera chuh a thi sa’n a na um ta a, puon-In kilhna chuh a chalpânga kiphut zing kawm chun

²³Zie ni chun Pathien in Israel chate khut achun Kanaan lalpa Jabin chuh a pie ta a.

²⁴Tichun, Israel chate chuh Kanaan lalpa Jabin chuh a sukmangthai kei macheng u chun Kanaan lalpa Jabin chung a chun a khut khauh deuh deuh zieng tau hi.