Read Gangte VAIHAWMTE 8 Bible Online

VAIHAWMTE 8 - Gangte bible

VAIHAWMTE 8

¹Chun, Ephraim mite chun Gideon kawmah, “Bang zieka Midian te do dinga kei uh nei chiel loh ahim? Bang zieka hiti a chuh nei bawl ahim?” ti’n a gen u a.

²Chun, amah chun a kawm u ah, “Nang haw hihtheih khel chuh bang ka hih thei chuom u a ahim? Nanguh Ephraim te’n neucha na hih u chuh ka nam pumpiu hih sangin a thupi zaw hilo ahim?

³Pathien in Midian te leng Oreb leh Zeeb chuh na khut u ah a hun pie ta a, nang haw sangin hih phat chuom bang ka nei a ahim?” a ti a. Khutichun, zie thu chuh a vak gen phet in a chunga a lungnatnau chuh a hai ta a.

⁴Chun, Gideon leh a kawma mi zathum umte chuh Jordan lui a va tung u a, a galkai u a, châwl mahleu le a gâlteu chuh a delhzui zel u a.

⁵Chun, Sukkoth khuo a mite kawma chun, “Lungsiet takin ka nungzuite hih chângthâk pie tiem u a chawl ta bêk un, Midian leng Zebah leh Zalmuna delh ka hiu,” a ti a.

⁶Chun, Sukkoth khuo a miliente chun Zebah leh Zalmuna chuh na man nai ngâl puou a, “Bang zieka sepaihte chuh chângthâk pie ding ka hiu em?” a tiu a.

⁷Gideon chun, “Aphâi, LALPA’n Zebah leh Zalmuna chuh ka khut a ei piek tieng leh thalek ling leh hamlingnei te chun na taksa teu chuh sun ek duok duok mai ding ka hi,” a ti a.

⁸Chun, zie apat chun Penuel ah a va chieh a, a kawm u ah khutibangmah chun a gen kita, chun Penuel khuo mite chun Sukkoth khuo a mite gen bang chun a na dâwng u a.

⁹Chun, Penuel khuo a mite kawma chun, “Chamna thu puo a ka hungkit tieng leh zie kulh hi hun hihchim ing ka,” a ti a.

¹⁰Chun, Zebah leh Zalmuna chuh Karkor ah a sepaihte tawh a um u a. Thalek gama sepaih haw laka chun singkhat leh sangnga chauh hing hawih in a um u a; nuoikhat leh singnih chuh thah in a um tau hi.

¹¹Chun, Gideon chuh Nobah leh Jogbehah suohlam a puon-in a chêngte lampi achun a chiehto a, sepaih haw chuh a do a, sepaih haw chulah muong tak in a na um ngâl u a.

¹²Chun, Midian leng nih Zebah leh Zalmuna chuh a taisie tau a; amah chun a delhzui a, a mana, sepaihte chengcheng chuh a subuoi vengvung mai ta a.

¹³Chun, Joash chapa Gideon chuh Heres lampi a kidona mun apat chun a hung vaikit a.

¹⁴Chun, Sukkoth khuo a tangval khat hih a mana, thu a dawng a, tichun, Sukkoth khuo a milien haw leh upate min chengcheng chuh a zik sak veka, abawn in sawm sagih leh sagih ahiu ui.

¹⁵Chun Gideon chuh Sukkoth khuo a mite kawm achun a va chieh a, “Zebah leh Zalmuna chuh na man nai ngâl puou a, bang zieka na mite chuh chângthâk pie ding ka hiu em? nei tih khum vang vei u kha, En un zie hin a um tau hila!” a ti a.

¹⁶Tichun, zie khuo a upate chuh a man u a thalek ling leh hamlingneite chuh mang in Sukkoth mite chuh a gawt ta a.

¹⁷Chun, Penuel khuo kulh chuh a sukchim saka, khuo a mite chule a that ta a.

¹⁸Chun, Gideon chun Zebah leh Zalmuna kawma chun, “Tabor tânga na mi thah te khah bang tawbang mi ahiu em?” a ti a. Chun, amah chun, “Nang tawbang mah hi ahiu hi, leng cha batna a nei chiet mai ui,” a ti a.

¹⁹Chun, Gideon chun, “Ka suohpihte, ka chanute ngêi ahiu a puo; amau haw chuh a na hinghawih hi leu chin hun that lo ding hi veng,” a ti a.

²⁰Chun, a chapa upapen Jether kawm achun, “Khaile, nangin that ah,” a ti a. Himahlele, tangval chun a chemzâm a zûk dawk puoi; tangval tûng a hih ziekin a lau a ahi.

²¹Tichun, Zebah leh Zalmuna chun, “Nang hung kipan inla, ei hung that mai in, pating leh pating kibawl ding ahi a puo,” a tiu a. Ziephet chun, Gideon chuh a kipana, Zebah leh Zalmuna chuh a that ta a. Chun, a sangawngsau ngâwng u a kicheina van umte chule a la a.

²²Zie nung chun Israel chate chun Gideon kawmah, “Nang leh na chapate leh na chapate chate tiengin ka chung u a vaihawm in pang tau in, nangin Midian te khuta kipatin nei hukdawk ta ngâla,” a tiu a.

²³Himahlele, Gideon chun a kawm u ah, “Ken vang na chung u ah vaihawm puo’ng ka ting, ka chapa’n le na chung u ah vaihawm diek puo’n a; LALPA’n na chung u ah vaihawm zaw’n a,” a ti a.

²⁴Gideon mah in a kawm u ah, “Thil khat vang hun nget ka nuom hi, mitin in na gâllâk hawu laka bilbah ei pie chiet tau u,” a ti a. (Ishmael te ahih ziekun sana bilbah a nei chiet ngâl u a).

²⁵Chun, amau chun a dâwng u a, “Hun pie na lawm ing kau,” a tiu a. Khutichun, puon a phah u a, mitin in a gâllâk teu bilbah haw chuh a hun pie dawk chiet tau a.

²⁶Chun, zie sana bilbah a piekkhawm u chuh a gikdan sekel sangkhat leh zasagih a ting hi; sana thikkuolte, bilbah te, Midian lengte puon sandup leh a sangawngsau ngâwng a thikkuol awhteu simloh ahi.

²⁷Tichun, Gideon in ziehaw apat chun Ephod a siem a, a chênna Ophrah khuo a chun a kawih ta a; tichun, Israel chate chengcheng chun a Pathien uh taihsan in zie milim chuh a ho tau a; tichun, Gideon leh a inkawte a ding chun zie chuh thâng a hung hita a.

²⁸Khutichun, Midian te chuh Israel chate masang achun tawhniem in a hung um tau a, a tawilawk thei ta puou hi. Tichun, Gideon damsung chun gam chuh gâlmuong in kum sawmli sung a um tai.

²⁹Chun, Joash chapa Gideon chuh a chieh a, amah In achun a cheng den ta a.

³⁰Tichun, amah hin thâk ngêi chapa sawm sagih a nei a, zi tamtak nei ahi ngâla.

³¹Chun, Sekem khuo a a meinu chun le chapa a hin saka, a min dingin Abimelek a sa a.

³²Chun, Joash chapa Gideon chuh têkkûn a dam in a thi a. Chun, Abiezrite gama Ophrah khuo ah a pa Joash thân ah a vui tau hi.

³³Chun, hiti hi ahi a, Gideon thih nung chun Israel chate chuh a hung nungchawn kit tau a; Baal a hun ho kit tau a, Baal-berith chuh a pathien dingun a hun siem tau hi.

³⁴Chun, Israel chate chun a kimvel u a melma te laka hukdawk sek LALPA a Pathien u chuh a hengilh tau a.

³⁵Tichun, Gideon chate chunga theihtawp a phatna suoh sek pa inkawte chung achun le phat a suoh diek ta puou hi.