Read Gangte JUDA 1 Bible Online

JUDA 1 - Gangte bible

JUDA 1

¹Juda, Isu Krista sawntawlawi leh, Jakob suohpihpa apat, Pathien hehpih; Isu Krista dinga sukthientho, sapa umte kawm achun:

²Zahngaihna te, chamna te, hehpihna te, na chungu ah sukpun in um hen.

³Deihtakte, a tângpi a hukdamna I chan danteu thu khah na kawmuh a hun zik ka guot lai takin, mi thiengthote kawma taksanna thu khatvei vawp saka umna thu lam ah chun, thanuom taka bawla, nanguh hun tîl dingin, na kawmuh a lehkha zika taimat suoh ding tih, ka hun he dawk a.

⁴Mi kuote ahim, I lak uh a hin, a gûka bawka, hung kithawlh lut a um ngâl uh a, ziete haw chun, a nunlekhan sietnau kizumzelna ding chun, I Pathien uh hehpihna thu chuh a hilo lama la kâwi in, I Lawiupau leh, I Lalpau neihsun, Isu Krista chuh a kizuksan uh a. Malaia kipatin, Pathien Lehkhabu’n, a mawhchanna ding thuu chuh a na genlawksa a hi ta ngâl a.

⁵Chun, khatvei chuh, bang cheng heta mahleu chin le, LALPA chun Aigupta gam apat in mite a hukdawk a, zie nunga a gingchalote a sukmangthai zie thu haw khah, hun geldawk sak kit ka nawp ahi.

⁶Chun, vânsâwlchâkte’n, amau sawlchak hihna kivawp lo a, a chênnau taihsan zawte chuh, Ni lopi, vaihawmna a dingin, khawthim nuoi ah, kumkhuotuong kânna a chuh kân sa’n kawih ahi tai.

⁷Sodom leh Gomorra, a kimvel uh a khuote tawh, khutibang mah in, kideihchakna a kipumpiek in, nunsie taka a um tâk ziekun, kumsawt a meia gawtna thuok in, etsakna dinga tâk dawka a um bang uh khan.

⁸Khutibang mah in, ziete haw chun le, muh lawk thil nei in, a taksa teu chuh gitlohna hih dingin a siem uh a; Pathien thuneihna chuh musit in, chunglama lopitak umte chule a gensie sek ui.

⁹Zie tawbang chuh, Mikael, vânsâwlchâk chungnung pên khan le a hih puoi. Mosi luong chung châng a, Diabol tawh a kiniel lai uh khan le, Diabol chuh thiemmawh chan saka, hosiet a ngam puoh a, “LALPA’n hun gai zaw hen,” a ti zaw ahi kha.

¹⁰Himahlele, ziete haw hin, thil a het loh chenguh a gensie sek uh a, gamsa haw banga pienpih hetna a neihteu chuh, ziete mawng chun amau haw chuh a sumangthai sek ahi.

¹¹A chunguh a gik hi! Kain lampi chuh a hawh uh a. Dangkasum duhchakna ziekin, thil diklo, Balaam in a sukkhelhna mah ah khan, amau leh amau a kibun lut uh a. Korah helna bawl bang khan a hel uh a, amah bang mah khan, sukmangthai in a um tau hi.

¹²Ziete haw chuh, kihehpihna guolvakna a na kawmuh a a tel tieng uh leh, suongpi, tui chup suoksa tawbang ahiu a, lauhna zie helo, belam chinga amau kivakte tawbang ahiu hi. Meitang tui puo lo, huih mût lawn viel tawbang ahiu a, thinggah lo, chavang nasan ale gah lo, thing, a zung puma kibawtdawk ahiu a,

¹³Tuisuohgiet kinawk banga, amau thilhih zahchâk um tak, tui phuon banga hun suoh dawkte ahiu a; aksi leng viel, amau dinga thim sah tak sit sakte chuh ahiu hi.

¹⁴Chun, ziete kawm achun, Adam a thâk a khang sagihna Enok chun, hun sawttak apat in a chanchin uh chuh a na genlawk ahi tai,

¹⁵“Ngaitiem u, mi chengcheng chunga vaihawm ding leh, Pathien khawksalote’n, Pathien khawksalo kawma a thilhih cheng cheng teu leh, Pathien khawksalo, mi gilote’n, amah a gensietnau cheng cheng teu zieka mawh chansak dingin, LALPA chuh a vânsâwlchâk sang tamtak te tawh hung ding a hii,” ti’n.

¹⁶Ziete haw chuh phunchiekte leh, mi awihmawh hatte ahiu a, amau utna bang zelin a um uh a, a kam sung un kiletsakna thu thanghuoi tak tak a gen uh a, amau phatchuomna ding deihna ziekin, mi Pahchak lim a thawh sek ui.

¹⁷Himahlele, deihtakte, nanguh vangin, I Lalpau Isu Krista sawlchakte’n thu a gensau haw khah geldawk zing un.

¹⁸“Hun nunung achun, Pathien khawksa lo a, amau utna dungzuia um in, mi nuihsante hung um un au,” ti a, na kawmuh a gen hawu khah.

¹⁹Ziete haw chuh, taksa mi, Thagau neilo, lawitum siemte chuh ahiu hi.

²⁰Himahlele. deihtakte, nanguh vang, na taksan uh Thiengtho pên chung achun, nangmau kilem to un.

²¹Thagau Thiengtho thilhih theihna a paucham in, Kumsawt hinna, a hun piek ding, I Lalpau Isu Krista khuotuohna ngak kawmin, Pathien hehpihna achun kivawp phau un.

²²Mi khenkhat, ginleduop a umte chuh khuotuoh un.

²³Abang, mei apat ladawk meng unla, hukbit un; abang a gitloh utchaknau nin behna silhlechen tieng nasana then, lau kawmin khuotuoh un.

²⁴Tichun, na kipalpuk lohna dinguh a hun veng thei leh, amah lopina ângsung a nin beklo hiela, kipâk taka nanguh hun tun theipa,

²⁵I Hukdampau, Pathien takpa mai kawm achun, I Lalpau Isu Krista vangin, lopina, chungnunna, vaihawmna, leh thuneihna chengcheng, phat himhim um ma’n le, tu’n le, chuleh, kumkhawtuong in um zing ta hen. Amen.