Read Gangte THUPHUON 1 Bible Online

THUPHUON 1 - Gangte bible

THUPHUON 1

¹Isu Krista thuphuon dawk; Pathien in a sawntawlawite hetsak dinga a kawma a piek, thil hungtung vak zieng ding thute chuh ahi. Zie chuh a vânsâwlchâk sawl in, a sawntawlawi Johan a hun hetsak a,

²Tichun, Johan chun, a thil muh chengcheng chuh a gen dawk ta a. Ziehi, Johan in, Pathien apat a thu leh, Isu Krista’n a kawma thudik a phuondawk, a gente chuh ahi:

³Zie hilhlawkna bu thu sim a, ngaitha a, a sunga thu kizik zawpte chuh a hamphau ui; zie thil haw hungtunna ding chuh a nai ta ngâla.

⁴Johan chun, Asia gama sapchuom haw lawi sagihte kawm achun: A umlaitak leh um sapa leh hung um kit ding pa kawm apat leh, a lalchutphah masanga Thagau sagih um haw kawm apat leh,

⁵Isu Krista, thu hetpih taksanum tak, mithi lak apat a kaihthawh a um masapen ding pa leh, leia lengte vaihawmpa kawm apan chun A lungsietna leh chamna na kawm u ah um hen. Ama’n ei hehpih a, a thisan in I gitlohnau apat ei tandawk a,

⁶tichun, a Pathien leh Pa lenggam thiempu nasem dingin ei siem ta a. A hii, Isu Krista kawm mawng achun, lopina leh vaihawmna chuh kumkhawtuong in um hen. Amen.

⁷Ngaitiem u, amah chuh meipi haw chunga hung ding ahi ie! Mit tin chengin amah muu un tin uh, amah sunte mawng khan tawh; khawvel a nam chengcheng in le amah kahcham un au. A hi. Amen!

⁸“Kei a Bul leh a Tawp chuh ka hi,” LALPA Pathien, A umlai tak leh um sapa leh, hung um kit ding pa, Bangakai hihtheipa chun a tih ahi.

⁹Kei Johan, na suohpihpau, Isu nungzui, lenggam mite chunga gimtheihna hungtung, thuokhat taka hun thuokpih pa chuh ka hi. Pathien thu leh, thu dik, Isu phuondawk chuh ka gen ziekin, Patmos tuikuol achun kawih in ka um a.

¹⁰LALPA ni achun, Thagau in ka hung um a, chun, ka nung lam ah, pengkun gi tawbang, aw ngeih tak in,

¹¹“Na thil muh ding chuh. lehkhabu ah zik inla, sapchuom haw lawi sagih, Ephesi khuo te, Smurna khuo te, Pergamos khuo te, Thuatira khuo te, Sardis khuo te, Philadelphia khuo te leh Laodikei khuo haw achun thâk ah,” a tih ka za a.

¹²Tichun, ei hopihpa chuh muh guo’n ka vak kilehhei a, chun, sana thaumei kawihna sagih ka mu a,

¹³Thaumei kawihna lak achun, Mihiem Chapa tawbang, kêngpêk phiet a puon silh, a awma sana kâwnggak a kigak le ka mu a.

¹⁴Chun, a luchang leh a sam chuh belam mul vam guolin ahim, vuk bang a him in a vam a. A mit haw chuh mei guolin a kuong zawt zawt a;

¹⁵A kengpekhaw chuh sumeng nawtval leh kihal thiengsa tawbang ahi a, chun, a aw chuh tui kikhawhtha gi guolin a gi hum hum a.

¹⁶A khut changlam achun aksi sagih a chawi a, a kam apat chun chemzâm, a nih lang tuoka hiem hih a hung pawt a. A mel chuh, nisa sat vanglai tak tawbang hin a vak hi.

¹⁷Amah ka muh phet chun, a thi tawbang in a keng bul ah ka puk ta a. Chun, amah chun a khut changlam chuh ka chunga nga’n, ka kawmah, “Lau dah ta’n, Kei a Masapen leh a Nunung pên chuh ka hi.

¹⁸A hingzingpa chuh ka hi! Ka hung thi a, himahleh, ngaitie, kumkhuotuong a dingin ka hung hing kit tai. Thihna leh Thihna khawvel chung achun thu ka nei tai.

¹⁹Khutichun, na thil muh sate leh, thil um laite leh, tunung a thil hung um dingte thu chuh zik ah.

²⁰Ziehi, ka khut changlama aksi sagih um na muh te leh, sana thaumei kawihna sagihte thuguk chuh ahi. Aksi sagihte chuh, sapchuom haw lawi sagihte vânsâwlchâk ahiu a, thaumei kawihna sagihte chuh, sapchuom haw lawi sagihte chuh ahiu hi.