Read Gangte THUPHUON 15 Bible Online

THUPHUON 15 - Gangte bible

THUPHUON 15

¹Chun, van ah melchikna dang, lopi tak leh mak tak hi ka mu a. Vânsâwlchâk sagih, gawtna sagih chawi hi a um a; zie chuh Pathien lungnat tawpna pên suklatna a hih tâk ziekin, gawtna tawpna pên chuh a hi tai.

²Chun, lim-et tuisuohgiet, mei tawh kihel tawbang hi ka mu a. Zie achun, sahang leh a lim leh, a min tiemtehna nambar chunga guolzote chule ka mu a. Amau haw chuh Pathien kingkang chawi in, lim-et tuisuohgiet tawbang pang achun a dinguh a.

³Pathien sawntawlawi Mosi la leh Belamno la: “Aw LALPA Pathien, Bangkim hihthei, Na thilhihte chuh a lopi in, a mak a; Nang, namtin Lalpen, Na lampi chuh a diktat in, a dik ngâl a!

⁴Aw LALPA kuo a na min zah lo a, Pakcha lo ding? Nang mai a Thiengtho na hii; Na thilhih diktatte chuh a kiphuon tâk ziekin, Namtin cheng chuh hung in, Nang hun ho un au,” tih hi a sau a.

⁵Zie nunga chuh ka vak et leh, van a Ho-In pindan sungnung chuh a kihawng a,

⁶Ho-In apat chun vânsâwlchâk, gawtna sagih chawi, puon vam ngim tak silh a, a âwm uh sana kâwnggak a kigak hi a hung pawt dawk uh a.

⁷Ganhing lite laka khat chun, vânsâwlchâk sagihte kawm achun, Pathien, kumkhawtuong a hingzingpa lungnatna a dim, belhbu sagih chuh a pie a.

⁸Khutichun, Ho-In chuh Pathien lopina leh thilhih theihna apat a meikhu chun a hung dim ta a, tichun, vânsâwlchâk sagihte gawtna sagih chuh a kichaih masang sieh, kuomah Ho-In sung achun a lut thei ta puou hi.