Read Gangte THUPHUON 17 Bible Online

THUPHUON 17 - Gangte bible

THUPHUON 17

¹Chun, vânsâwlchâk sagih, belhbu sagih chawite laka khat chuh ka kawmah a hung a, ka kawmah, “Hung tie, luipi tamtak panga kisa, khawpi lopi taka nawchizuok lopitak nu gawtna ding chuh hun etsak ding ka hi.

²Leia lengte chun amah chuh a deihcha sek uh a, khawvel a mite chule, a mi deihchak nawpna uain chun vâk kham in a um sek ui,” a ti a.

³Khutichun, amah chun thagau in gamthip ah ei pui a; Pathien gensietna min a dim, sahang, luchang sagih leh ki sawm nei, gamsa sandup chunga chu numei khat ka mu a.

⁴Zie numei chun puonsandup leh san-au a silh a, sana leh suong mantam leh. tuikawkchang in a kichei a. Sana khawn, thil kihdak-um leh nen a dim, a mi deihchakna thil buok a dim set, a khut in a chawi a.

⁵A chalpâng achun thuguk, “BABULON KHUO LOPI NAWHCHIZUOKTE LEH LEICHUNG A KIHDAK-UMTE NU,” ti a min kizik a um a.

⁶Zie numei chuh mi thiengthote thisan leh, Isu min zieka thaha umte thisana kham chun ka mu a. Ka muh phet chun mak ka sa mah mah mai a.

⁷Vânsâwlchâk chun ka kawmah, “Bang zieka maksa na him? Numei leh amahnu puo sahang, luchang sagih leh ki sawm nei thuguk chuh nang hun hilh ding ka hi.

⁸Sahang na muh khah khatvei khah a hing a, himahleh, a hing zawm ta puoi. chun, thampikuo-âwng apat in hung pawtdawk intin, manthaina ah chieh ina. Leia mihingte, khawvel kisiem tung apat Hinna Lehkhabu a min kizik lote chun. sahang chuh a muh tiengu leh maksa’n dim un au. Khatvei khah a hing a; tu’n a hing kit ta puoh a; himahleh hung kilang kit ding ahi ngâl a.

⁹“Zie hin chitna leh hetna neite het theihna a um hi. Luchang sagihte chuh, numei chutna tâng sagihte chuh a hi a. Leng sagihte le ahiu hi.

¹⁰Ngate chuh a um nalai a; khat pên chuh a hung um tadih puoi; a hung um tieng chuleh, hun chawmkhat sung chuh vaihawm ina.

¹¹Sahang, khatvei hing a, hing talo khale a giet tinna a hi a, sagihte laka tel mah khale a hii; manthaina ah chieh ina.

¹²Chun, ki sawm na muh te khah, leng sawm, lalgam nei nailo te chuh ahiu a; dâkkâl khat sung vang chuh sahang tawh, lengte bangin thuneihna hung chang un au.

¹³Zie sawmte chun thukhat kisa’n, a thilhih theihnau leh, a thuneihnau chuh sahang kawm achun pie’n au.

¹⁴Ziete haw chun Belamno chuh do un tin; himahleh Belamno chun, a telte, leh amah nungzui ginumte chu tawh amau chuh zo unau; amah chuh Lalte Lal leh, Lengte Leng a hih ziekin,” ti’n.

¹⁵Vânsâwlchâk mah chun ka kawmah, “Nawhchizuoknu chutna tui na muh te khah, namte, mipite, chitin te leh pau tinte hi ahiu hi.

¹⁶Chun, ki sawm na muh te leh sahang khan nawhchizuoknu chuh mudah un tin; a thil neih chengcheng lâksak vek un tin uh; sangawn in taihsan un tin; a sa neu un tin uh, mei in hâltum un au.

¹⁷Pathien thu haw chuh a tun masang sieh, amau deihlam a hihna dingun leh, thukhat kisa a, a gam u chuh vaihawm dinga sahang kawma a piek theihna dingun Pathien in a lunggil u ah utna a pie ta ngâla.

¹⁸“Chun, na numei muh khah, khuo lopi, leia lengte chunga vaihawm chuh ahi,” a ti a.