Read Gangte THUPHUON 2 Bible Online

THUPHUON 2 - Gangte bible

THUPHUON 2

¹“Ephesi khuo a sapchuom haw lawi vânsâwlchâk kawm achun hiti hin zik ah: “A khut changlama aksi sagih chawipa, sana thaumei kawihna sagih laka vak vak pa khan, zie thu haw hi a gen ahii,

²Na sep zie te, na gim ziete leh, na thuokhat ziete, migilo na ngaih theih loh ziete ka hêi. Sawlchak hisâm lo a, sawlchak kitite chule na patepa, lepchieh ahiu ui tih le na he ta a.

³Thuokhatna le na nei a, ka min ziekin na thuok ta a, na chau puoh ngâl a.

⁴Himahlele, demna ka hun nei hi, na hehpihna masapen na haih tâk ziekin.

⁵Khutichun, na puksansa chuh gel zing inla, lunghei in, na thilhih masapen khah hih kit ah, khutilochun, na kawmah hung ing ka ting, na lunghei loh vang leh, na sana thaumei kawihna khah a mun apat chawn ding ka hi.

⁶Himahlele, ziehi na phatna chuh ahi, Nikola lawi thilhih haw na hawt hih, zie chuh ken le ka hawt sek him ahi.

⁷“Thagau in sapchuom haw lawite kawma thu a gen hih, bil nei chun zau he’n. “A zo ta cheng chuh, Pathien Paradise a um, Hinna thinggah chuh nek sak ing ka a ti ie, ti’n.

⁸“Chun, Smurna khuo a sapchuom haw lawi vânsâwlchâk kawm achun hiti hin zik ah: “A masapen leh Nunung pên, thi a hung thokitpa khan zie thu haw hi a gen ahi;

⁹Na gimtheih ziete, na chatgah ziete, himahleh, na hausa ngâl a! Juda tak hilo a, Setan kikhawpna laka tel hizaw ngâla, Juda kiti haw hun gensietna le ka hêi!

¹⁰Na thil thuok ding haw hi lau ki’n; ngaitie, patepa na um theihna dingin, Diabol chun na lak uh a mi khenkhat chuh suongkul a hun khum ding a hii; tichun, ni sawm sung gimtheihna thuok unlau. Himahlele, thih tiengin taksanum in na um in, tichun, hinna lallukhuk chuh hun pie’ng ka.

¹¹“Thagau in sapchuom haw lawite kawma thu a gen hi, bil nei chun zau hen. “A zo ta cheng chuh, thih nihna chun bangmah lawh thei puo’n a, a ti ie, ti’n.

¹²“Chun, Pergamos khuo a Sapchuom haw lawi vânsâwlchâk kawm achun hiti hin zik ah: “Chemzâm, a nih langtuok a hiem, hiem tak chawipa khan zie thu haw hi a gen a hii;

¹³Na umna, Setan chutphah umna khah ka hêi; keia dingin taksanum takin na um a, ka thu ei hetpihpa Antipas, Setan umna a, na lak uh a a thah uh, ka mi taksanum tak, umlai nasan khan le, nei taksanna hi na kilepsan puoh a.

¹⁴Himahlele, neukhat demna ka hun nei hi, na lak uh a Balaam sinsakna zui, mi khenkhat na umpih ziekun, amau chun, Israel chate chuh milim hona sa a nekna dingun leh, kideihchakna thanghuoia gilo dinga a puih theihna dingin, Balak chuh a sinsak sek uh a.

¹⁵Nang le, Nikola lawi sinsakna thu, khutibang mah a zuite kuote ahim na umpih ngâl a.

¹⁶Khutichun, lunghei ah, tichun, na kawmah hung vak ka ting, ziete haw chuh, ka kam apat a chemzâm pawt hin do ing ka.

¹⁷“Thagau in sapchuom haw lawite kawma thu a gen hi bil nei chun zau hen. A zo tacheng kawm achun, manna selguk khenkhat chuh pie ding ka hi. Chun, a kawmuh achun, suong vam, a chunga min thak kizik, a mute ngâl lo in a het loh uh chuh pie chiet ing ka, ti’n.

¹⁸“Thuatira khuo a sapchuom haw lawi vânsâwlchâk kawm achun hiti hin zik ah: “Pathien Chapa, mit meikuong tawbang neipa, a kengpekhaw sumeng nawtval tawbang pa khan, zie thu haw hi a gen ahii:

¹⁹Na thilhih ziete, na hehpih ziete, na taksan ziete, na zenviel ziete, leh na thuokhat ziete ka hêi, na thilhih nunung pên te chuh, a tunga sang khan a nasa zawi tih le ka hêi.

²⁰Himahlele, demna ka hun nei hi, thiemgaunu kiti, Jezebel khah na thuok theih ziekun, amahnu chun, ka sawntawlawite chuh, kideihchakna thanghuoi leh, milim hona sa nekte a sinsak in, a puimang sek ngâl a.

²¹Chun, lungheina dingin a kawmah hun ka tiem sak a. himahlele, a mi deihchak nawp chuh a haihsan nuom diek puoi.

²²Ngaitie, amah leh a zawlsaihpihte chuh zalkhun a paih ding ka hi, tichun, gimtheihna nasatak in thuok un au. Ziehi, a thilhih gitloh uh a haihsan loh uh chun tuhin hih ngâl ding ka hi.

²³A nungzuite cheng chule that ing ka ting, tichun, kei hi mi tin ngaihtuohna he pa leh, en pa ka hi tih, sapchuom haw lawi chengcheng chun he ta’n au. Na lak uh a mitin, a thilhih dungzui chiet un dinthuk ing ka.

²⁴“Himahlele, nanguh, Thuatira khuo a midang umte, zie sinsakna gilo chuh pawm lo a, mi dangte’n, ‘Setan thuguk,’ a tih sek uh hekha lote chung achun, puokgik dang himhim hun puok sak puo’ng ka, ka tih ahi.

²⁵Himahlele, ka hung masang sieh in, na neihsau vang khah tudet un.

²⁶Tichun, a zo ta cheng leh, a tâwp tienga ka thil deih haw hih ta cheng chuh, ken ka Pa apat a thuneihna ka muh bang mah hih a kawm u ah pieng ka.

²⁷Chun, namte chunga thik tienga vaihawm ding leh, lei bel banga sunel dimdem dingin thuneihna pie’ng ka.

²⁸Chun, zingsawl aksi chule a kawm u ah pie ding ka hi.

²⁹“Thagau in sapchuom haw lawite kawma thu a gen hi, bil nei chun zau hen! a ti ie,” ti’n.